Մոսկվան և Անկարան անցել են Թուրքիայում գազային հանգույցի նախագծի իրականացմանը․ «Գազպրոմի» ղեկավար

Մոսկվան և Անկարան անցել են Թուրքիայում գազային հանգույցի նախագծի իրականացմանը։ Այս մասին հայտարարել է «Գազպրոմի» ղեկավար Ալեքսեյ Միլլերը՝ ամփոփելով 2022 թվականին ընկերության աշխատանքի նախնական արդյունքները։ Այս մասին հաղորդում է Business-gazeta.ru-ն։

«Գազի համաշխարհային շուկան արագ կզարգանա, և երկարաժամկետ կանխատեսումների համաձայն՝ առաջիկա 20 տարում սպառումը կաճի 20 տոկոսով։ Հետեւաբար, իհարկե, մտածում ենք ապագայի, մեր նոր նախագծերի, էներգետիկ անվտանգության մասին։ Ցանկանում եմ նշել, որ մեր ծովային գազատարները՝ «Թուրքական հոսքը» և «Կապույտ հոսքը», վստահորեն աշխատում են։ Եվ հիմա Թուրքիայի հետ միասին սկսել ենք աշխատել այս երկրում գազային հանգույցի նախագծի վրա։ Այս որոշումն ընդունվել է երկու պետությունների ղեկավարների մակարդակով, և մենք արդեն սկսել ենք դրա գործնական իրականացումը։ Գազային հանգույցը կապահովի բնական գազի շուկայում թափանցիկ և արդար գնագոյացումը»,- ասել է նա։

Միլլերը հավելել է, որ 2022 թվականը շատ բարդ է ստացվել, էներգակիրների շուկաներում տեղի են ունեցել տոտալ փոփոխություններ։