Գեղարքունիքի մարզի 99 հանրակրթական դպրոց կապահովվի նոր գույքով

Գեղարքունիքի մարզի հանրակրթական 99 դպրոց ՀՀ Կառավարության կողմից տրամադրված միջոցների հաշվին ապահովվում է դպրոցական ժամանակակից գույքով։ Ինչպես տեղեկացրին Գեղարքունիքի մարզպետարանի ԿՄՍ վարչությունից, դպրոցական գույքի ձեռքբերման նպատակով պետական միջոցներից հատկացվել է շուրջ 127 միլիոն դրամ։ Ձեռք է բերվում 9 անուն գույք՝ սեղան, նստարան, գրատախտակ, կախիչ, պահարան, այլ իրեր։ Դեկտեմբերի 29-ի դրությամբ որոշ տեսակի գույքեր արդեն մատակարարվել են դպրոցներին, իսկ գործընթացը շարունակվում է։ Գեղարքունիքի մարզպետ Կարեն Սարգսյանը, տարեվերջյան խորհրդակցություն անցկացնելով  հանրակրթական դպրոցների տնօրենների հետ,  հանձնարարել է ուշադիր լինել, որպեսզի ներմուծվող գույքը լինի բացառապես որակական չափանիշներին համապատասխան։  Կարեն Սարգսյանն անդրադարձել է նաեւ մարզպետարանի կողմից որոշ դպրոցներում կատարված աուդիտորական ուսումնասիրությունների արդյունքներին եւ հանձնարարել՝ սեղմ ժամկետներում շտկել բոլոր արձանագրված թերություններն ու բացթողումները։

«2023 թվականի ընթացքում պետական աջակցությամբ, որպես առաջնահերթություն, լուծելու ենք մարզի 44 հանրակրթական դպրոցների ջեռուցման խնդիրները։ Աշխատանքներ ենք տանելու, որպեսզի զգալի թվով դպրոցներ, հրատապ ծրագրերի շրջանակներում, օգտվեն վերանորոգման կամ գույքի ձեռքբերման ծրագրերից։ Հաջորդ եռամսյակի ընթացքում մարզպետարան պետք է ներկայացնել դպրոցներում առկա խնդիրների ցանկը, որպեսզի տարվա ընթացքում պետական աջակցությամբ այդ խնդիրները հասցնենք նվազագույնի, այդ թվում նաեւ՝ դպրոցների բուժկետերի առկայության եւ կահավորման խնդիրները»,-ասել է մարզպետը։