Կողոպտիչը սայթաքել է սառույցի վրա և ձերբակալվել

ԱՄՆ-ում ավազակը ատրճանակն օգտագործելու փորձի ժամանակ սայթաքել է սառույցի վրա ու գլուխը հարվածել գետնին, գրում է New York Post-ը։ Դրանից հետո հանցագործը ձերբակալվել է։

Լրատվամիջոցների տեղեկություններով՝ 30-ամյա Լուիս Սայբոչո-Օրդոնյեսը փորձել է թալանել ձեռնարկությունը և ատրճանակն ուղղել է փողոց դուրս եկած աշխատակիցներից մեկի վրա։ Այդ պահին տղամարդը սայթաքել է սառույցի վրա ու  գլուխը հարվածել գետնին։ Միջադեպի ականատեսները հարձակվել են գողի վրա, խլել նրա զենքն ու ոստիկանություն կանչել։

Դեպքի վայր ժամանած սպաները ձերբակալել են Լուիսին։ Այժմ տղամարդը կալանքի տակ է և սպասում է դատարանի որոշմանը։ Հաղորդվում է, որ գողության փորձի ժամանակ աշխատակիցներից ոչ ոք չի տուժել:

«Բարեբախտաբար, լուրջ վնասվածքներ չեն եղել, և հանցագործը ուղարկվել է բանտ»,- ասել է ոստիկանության վարչությունից։