Ինչով է 2022-ին աչքի ընկել Շենգավիթի թաղապետը. Ռազմիկ Մկրտչյանի «ձեռքբերումները»

2022թ. հունվարի 24-ին Շենգավիթ վարչական շրջանի ղեկավար Ռազմիկ Մկրտչյանը վերանշանակվեց այս պաշտոնում: Հիշեցնենք, որ Մկրտչյանը վարչական շրջանի ղեկավար էր նշանակվել 2018-ին՝ հեղափոխությունից հետո և կարելի է ասել` ամենաերկարակյաց թաղապետն է: Նրա կենսագրությունից տեղեկանում ենք, որ 2007-2009թթ. սովորել է Հայաստանի ազգային ագրարային համալսարանի հենակետային վարժարանում: 2009-2015թթ. սովորել և ավարտել է «Անանիա Շիրակացի» միջազգային հարաբերությունների համալսարանի իրավագիտության ֆակուլտետը՝ իրավագետի մասնագիտությամբ: 2009թ. ընդունվել է Հայաստանի ազգային ագրարային համալսարանի հողաշինարարություն, հողային կադաստր ֆակուլտետը: 2016-2018թթ. սովորել և ավարտել է Ավետիք Մկրտչյանի անվան տնտեսաիրավագիտական համալսարանի իրավագիտության ֆակուլտետը՝ ստանալով մագիստրոսի որակավորում: 2010-2012թթ. ծառայել է ՀՀ զինված ուժերում՝ որպես կուրսանտ, դասակի հրամանատարի տեղակալ (սերժանտ), այնուհետև 2016թ.-ին՝ ինժեներասակրավորային վաշտի հրամանատար, պահեստազորի լեյտենանտ:

Բավական ուշագրավ է համեմատել, թե ինչպես է տարիների հետ մեկտեղ փոխվել ամենաերկարակյաց թաղապետի սոցիալական վիճակը: 2018 թվականին վերջինս ներկայացրել էր դատարկ հայտարարագիր: Այժմ գանք 2021 թվականին: 2021-ին Մկրտչյանը գնել  է հողամաս Շենգավիթ վարչական շրջանում, աշխատանքից ստացված եկամուտները կազմել են 5,421,720.00 դրամ, ստացված վարկերն ու փոխառությունները՝ 21,796,954.00 դրամ:

Ռազմիկ Մկրտչյանի անվան հետ մամուլում մի շարք սկանդալային պատմություններ էին շրջանառվում: Դիցուք՝ թաղապետին մեղադրում էին Երևանում գիշերային ռազբորկաների մասնակցելու մեջ: Ինքը՝ Մկրտչյանը, պարզաբանել էր այդ դրվագը՝ նշելով, որ գիշերը պարզապես անցնում էր Թոխմախի մոտով, տեսել է դրվագը և օգնություն ցուցաբերել տուժածներից մեկին: 

Դրանից առաջ էլ SHAMSHYAN.com-ի տեղեկություններով՝ ոստիկանության Շենգավիթի բաժնի հետաքննչական բաժանմունքում նյութեր էին նախապատրաստվում Շենգավիթ վարչական շրջանի ղեկավար Ռազմիկ Մկրտչյանի, Շենգավիթ վարչական շրջանի ղեկավարի տեղակալ Համլետ Գրիգորյանի և Շենգավիթ վաչական շրջանի ղեկավարի օգնական Անդրանիկ Մինասյանի կողմից Շենգավիթի թաղապետարանում թաղապետարանի աշխատակցին ծեծի ենթարկելու փաստով։ Ավելին, այդ դեպքը, ըստ մամուլի, տեղի էր ունեցել Արագածի փողոցի վերջնամասում՝  Մկտրչյանի կողմից կառուցվող առանձնատան մոտ: 

Մեկ այլ դեպք էլ կապված էր նրա հետ, որ Ռազմիկ Մկրտչյանը հրավիրել էր ժողովի համայնքի բոլոր մանկապարտեզների տնօրեններին՝ հրահանգելով, որ իրենց հետ բերեն սննդամթերքի մուտք ու ելքի մատյանները: Այնուհետև Շենգավիթի թաղապետարան են եկել ոստիկաններ և պահանջել են, որ տնօրենները հանձնեն իրենց բոլոր գրանցամատյանները և առգրավել են դրանք: Թեև Մկրտչյանը հերքեց, որ ինքն է ոստիկաններին հրավիրել՝ ոստիկանությունը հերքել էր Շենգավիթի թաղապետ Մկրտչյանի խոսքը: Պարզվում է՝ հենց նա է գրություն ուղարկել ոստիկանություն: Այս կառույցի լրատվության վարչությունից միջադեպի կապակցությամբ պարզաբանում ստացանք. «Թաղապետարանից գրություն է ստացվել ոստիկանության Շենգավիթի բաժին, որ կասկածներ կան`իրենց ենթակայությամբ գերծող մանկապարտեզներում վարվող փաստաթղթերում կեղծիքների վերաբերյալ: Նյութեր են նախապատրաստվում».

Թե ինչո՞ւ են հակասում իրար ոստիկանության ու երիտասարդ թաղապետի ասածները, թող իրենք իրենց մեջ պարզեն, սակայն մի բան ակնհայտ է՝ չէին կարող 21 տնօրեններն էլ չարաշահում արած լինել, էլ չենք խոսում այն մասին, որ, ըստ էության, տնօրեններին շուրջ 6 ժամ վարչական շրջանի շենքում պահելով՝ խախտել են նրանց  ազատ տեղաշարժի իրավունքը:

Այժմ տեսնենք, թե ըստ վարչական շրջանի պաշտոնական ֆեյսբուքյան էջի՝ աշխատանքային և գործնական ինչ ձեռքբերումներով է աչքի ընկել վարչական շրջանի ղեկավարը: Դիցուք՝ բազմաբնակարան մի շարք շենքերում տեղադրվել են մուտքեր, ի դեպ թաղապետարանից չեն մոռացել նշել, որ  վարչական շրջանը որևէ պարտավորություն չունի և նշված աշխատանքներն իրականացվում են որպես աջակցություն: Շարունակվել են բակերի հիմնանորոգման աշխատանքները, ՄԱԿ-ի զարգացման ծրագրի շրջանակներում տանիքի վերանորոգման աշխատանքներ են ընթանում «Երևանի հ.145 մսուր-մանկապարտեզ» ՀՈԱԿ-ում։ Կատարվել են ապօրինի կառույցների ապամոնտաժման աշխտանքներ, սակայն, նշենք, որ այս դեպքում որոշ բնակչներ հայտնել են իրենց դժգոհությունը։