Իսրայելն արգելել է պաղեստինյան դրոշները ծածանել

Իսրայելի ազգային անվտանգության նախարար, ծայրահեղ աջ «Օսմա Յեհուդիտ» (Հրեական ուժ) կուսակցության առաջնորդ Իտամար Բեն-Գվիրը հայտարարել է, որ հրամայել է ոստիկանությանը կանխել պաղեստինյան դրոշները երկրի փողոցներում ցուցադրելու ցանկացած փորձ։

«Այսօր ես ոստիկանությանը հանձնարարել եմ արգելել ցանկացած Պաղեստինի դրոշի կամ ցանկացած դրոշի ցուցադրումը, որը ճանաչվել է որպես ահաբեկչական կազմակերպություն կամ բռնություն հրահրող Իսրայել պետության դեմ։ Մենք ամբողջ ուժով կպայքարենք ահաբեկչության և ահաբեկչության խրախուսման դեմ »,- գրել է նախարարը Twitter-ի իր էջում։

Հաղորդվում է, որ իսրայելցի նախարարը նման որոշում է կայացրել այն բանից հետո, երբ պաղեստինցի Քարիմ Յունուսը հունվարի 5-ին 40 տարվա ազատազրկումից հետո ազատ է արձակվել իսրայելական բանտից, իսկ Հայֆայի արվարձանում գտնվող նրա հայրենի Արարա գյուղի բնակիչները նրան դիմավորել են պաղեստինյան դրոշներով։