Արագ կողմնորոշվող «սկզբունքայինների» 10-յակը

Մի քանի քաղաքական հարթակներ ու բևեռներ փոխելը նախկինում արժանանում էր հանրային պարսավանքի: Հիմա ոչ ոք չի զարմանում, թե ինչպես կարող են իրենց այս կամ այն կուսակցությանը հավերժ նվիրաբերած մարդիկ հայտնվել այլ կուսակցություններում, կես ճանապարհից սեպարատ կուլիսային բանակցություններ վարել այլ քաղաքական ուժի հետ, իսկ վերջիններս էլ` գրկաբաց ընդունել նրանց: Հեղափոխությունից հետո այդպիսի դեպքերի պակաս չի զգացվում, նախկինում այս կամ այն կուսակցության հավատարիմ նվիրյալները 2018-ի ապրիլից հետո հանգրվանեցին ՔՊ-ում և որոշ ժամանակ, իսկ ոմանք՝ նաև մինչ օրս ՔՊ հավատարիմ զինյալների դերն էին տանում: Ներկայացնենք արագ կողմնորոշվող «սկզբունքային» պաշտոնյաների տասնյակը

1)  Ֆելիքս Ցոլակյան. Հանրապետական պատգամավոր, ԱԱԾ տնօրենի նախկին տեղակալ, Շիրակի նախկին մարզպետ և ՀՀ նախագահի վերահսկողական ծառայության նախկին ղեկավար Ֆելիքս Ցոլակյանը 2018-ին ՀՀԿ-ական միակ պատգամավորն էր, ով ձայն տվեց Նիկոլ Փաշինյանին և փաստացի վերջինիս օգնեցին իշխանության հասնել: Փաշինյանը, անշուշտ, լավության տակից դուրս եկավ. հեղափոխությունից անմիջապես հետո Ցոլակյանը նշանակվեց ԱԻՆ նախարար:

2) Տիգրան Մուկուչյան: Դիցուք՝ 2013-ին ԱԺ-ում բուռն բանավեճ էր տեղի ունեցել Նիկոլ Փաշինյանը և ԿԸՀ նախագահ Տիգրան Մուկուչյանի միջև: Մուկուչյանը, ի պատասխան Փաշինյանի հումորի, արձագանքել էր՝ «Հարցն այն չէ, որ իմ հասցեին եք վատ բաներ ասում, այլ հարցն այն է, որ ժողովուրդը ձեզանից ամեն ինչի վատ փաթեթավորմանն է սպասում: Այն, ինչ դուք ասեցիք իմ հասցեին, կարծում եմ, դուք էլ լավ գիտեք, թե ինչ է ասել Թումանյանը ձեր տեսակի մասին… ու հեռու է մինչեւ մարդը իր ճամփան»։ Այս պիտակավորումը չխանգարեց նրան, որ Մուկուչյանը հեղափոխությունից հետո ոչ միայն հրաժարական չներկայացնի, այլ շարունակի համագործակցել Նիկոլ Փաշինյանի հետ

3) Ատոմ Ջանջուղազյան. Երբ ընդդիմադիր Նիկոլ Փաշինյանը պնդում էր, որ Հանրապետական համայնքապետերը թալանում են բյուջեն, այն ժամանակվա ֆինանսների նախարար Ատոմ Ջանջուղազյանը, ըստ էության, Փաշինյանին մեղադրեց ստախոսության մեջ` հայտարարելով, որ ինքը թալանի որևէ դեպք չի իմանում: Հեղափոխությունից հետո Ջանջուղազյանը մի քանի տարի պահպանեց իր պաշտոնը՝ դառնալով Փաշինյանի տնտեսական ռեֆորմների կնքահայրը: Ջանջուղազյանը ջանք ու եռանդ չէր խնայում հանրությանը համոզելու, թե ինչ ճիշտ քաղաքականություն է որդեգրել Փաշինյանի կառավարությունը և որ այդ քաղաքականությունը տալիս է սպասված արդյունքները: Այնուհետև վերջինս նշանակվեց ոչ ավել ոչ պակաս՝ Վերահսկիչ պալատի նախագահ:

4) Արթուր Ջավադյան. ԿԲ նախկին նախագահ և ընդդիմադիր Նիկոլ Փաշինյանի հարաբերությունները նույնպես բավական լարված էին: Կողմերը չէին զլանում մեկը մյուսին մեղադրել ոչ պրոֆեսիոնալիզմի մեջ:

Հեղափոխությունից հետո Ջավադյանը, ով մնաց իր պաշտոնին, ամեն կերպ արդարացնում էր Փաշինյանի վարած քաղաքականությունը և գովերգում վերջինիս կառավարման շրջանում ունեցած ձեռքբերումները: Այնուհետև Ջավադյանը նշանակվեց Հատուկ հանձնարարություններով դեսպան:

5) Դավիթ Տոնոյան. Հեղափոխության օրերին ԱԻՆ նախարարի ժամանակավոր պաշտոնակատար Դավիթ Տոնոյանը Նիկոլ Փաշինյանի վարչապետ ընտրվելուց օրեր անց նշանակվեց ՀՀ պաշտպանության նախարար: Դավիթ Տոնոյանը 2010-2016 թվականներին զբաղեցրել էր Պաշտպանության նախարարի առաջին տեղակալի պաշտոնը: Թե ինչպես ավարտվեց այս համագործակցությունը՝ գաղտնիք չէ, Տոնոյանը այսօր կալանավորված է այսպես կոչված` անորակ հրթիռների գործով, սակայն պնդում է, որ Նիկոլ Փաշինյանը պատերազմում պարտությունը փորձում է գցել բանակի վրա, և ինքը պարզապես թիրախներից մեկն է:

6) Վալերի Օսիպյան,  Օսիպյանը ոստիկանապետ էր նշանակվել Հայաստանում թավշյա հեղափոխությունից և Նիկոլ Փաշինյանի՝ առաջին անգամ վարչապետ ընտրվելուց ու նշանակվելուց հետո՝ 2018 թվականի մայիսի 10-ին: «Այս որոշումը պետք է սիմվոլիկ նշանակություն ունենա, լավ սիմվոլ է, որ փորձենք այդ փշալարերի կուլտուրան Հայաստանից վերացնել», - Օսիպյանի նշանակման առնչությամբ հայտարարել էր Փաշինյանը: Օսիպյանը ազատվեց զբաղեցրած պաշտոնից 2019-ի սեպտեմբերին:

7) Շիրակ Թորոսյան. Հեղափոխությունից հետո մայիսի վերջին Շիրակ Թորոսյանը հայտարարել էր Հանրապետական կուսակցության խմբակցությունից դուրս գալու և խորհրդարանական գործունեությունը որպես ՀՀ ԱԺ անկախ պատգամավոր շարունակելու մասին։ Այնուհետև արտահերթ խորհրդարանական ընտրություններին Թորոսյանը  մասնակցեց «Քաղաքացիական պայմանագիր» կուսակացության ցուցակով և մինչ այսօր վերջինիս պատգամավորական կարյերան բարեհաջող կերպով շարունակվում է:

8) Կնյազ Հասանով. Վերջինս 2017-2019թթ.՝ ԱԺ պատգամավոր է եղել ՀՀԿ խմբակցությունում: 2019-2021թթ.՝ ԱԺ պատգամավոր է ընտրվել արդեն «Իմ քայլը» դաշինքի կազմում: 2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

9) Կարեն Համբարձումյան. ԲՀԿ-ի քվոտայով մարզպետ դարձած, ապա ՔՊ գիրկը նետված Համբարձումյանը նույնպես արագ կողմնորոշվող պաշտոնյաների շարքում էր: Կարեն Համբարձումյանը հեղափոխությունից հետո մի քանի ամիս զբաղեցրել է Սյունիքի մարզպետի պաշտոնը: Նրա աները Սիսիանի նախկին քաղաքապետ Աղասի Հակոբջանյանն է: Համբարձումյանը 2006-2018 թթ. ԲՀԿ անդամ է եղել, 2011 թվականից «Բարգավաճ Հայաստան» կուսակցության քաղաքական խորհրդի անդամ, սակայն մարզպետի պաշտոնից ազատվելուց հետո նա հեռացավ ԲՀԿ-ից եւ արդեն «Իմ քայլ»-ի կազմում դարձավ պատգամավոր, այժմ էլ ութերորդ գումարման խորհրդարանի պատգամավոր է: Սակայն հետաքրքիր է, որ ԲՀԿ-ից լինելու եւ հենց այդ քվոտայով մարզպետ նշանակվելու փաստը Աժ պաշտոնական կայքում առկա նրա կենսագրությունից խնամքով թաքցված է: 

10) Սարգիս Սահակյան. Արագածոտնի մարզի երբեմնի տեր ու տիրակալ, նախկին մարզպետ Սարգիս Սահակյանը հեղափոխությունից հետո միացել է ՔՊ-ին և ակտիվ աշխատում է ՏԻՄ-ում ՔՊ-ի թեկնածուների հաղթանակի համար։ Ինչպես ասում են՝ քաղաքական կրոնափոխության ևս մեկ բացահայտ դրսևորում..

Ինչպես տեսնում ենք ՝ Փաշինյանի թրի տակով անցնելը բնավ էլ արգահատելի քայլ չէ որոշ պաշտոնյաների համար, ովքեր տարիներ շարունակ դավանել են մի քաղաքական թիմի գաղափարախոսությանն և քաղաքական նպատակներին և հանկարծ՝ մեկ օրում առանց խղճի որևէ խայթի քաղաքական ճամբարափոխություն են կատարել՝ արագ կողմնորոշվելով ստեղծված իրավիճակում և դրսևորելով անխոնջ «սկզբունքայնություն»: Ինչպես ասում են՝ իշխանության համը քաղցր է...