ԵՀ ղեկավարը կողմ է ԻՀՊԿ-ն ահաբեկչական կազմակերպությունների ցուցակում ներառելուն

Եվրամիությունը պատժամիջոցների նոր փաթեթ է պատրաստում Իրանի դեմ՝ հանրապետությունում մարդու իրավունքների խախտումների ֆոնին, հայտարարել է Եվրահանձնաժողովի ղեկավար Ուրսուլա ֆոն դեր Լեյենը, հայտնում է Reuters-ը։

Նրա խոսքով՝ Իրանի իշխանությունները դաժանորեն են արձագանքում երկրում տեղի ունեցող ցույցերին։

«Իրանի վարչակարգի արձագանքը դաժան է և սարսափելի, նրանք ոտնահարում են մարդու հիմնական իրավունքները <…> Մենք իսկապես քննարկում ենք պատժամիջոցների նոր փաթեթ, և ես կաջակցեի նաև, որ Հեղափոխական գվարդիան [ԻՀՊԿ] ներառվի այս ցուցակում»,- ասել է ֆոն դեր Լեյենը։

Ինչպես նշել է ԵՀ ղեկավարը, եվրոպացի մի շարք նախարարներ կողմ են Իսլամական հեղափոխության պահապանների կորպուսը ահաբեկչական խմբավորումների ցուցակում ներառելուն, և նա աջակցում է նրանց։ Նա նաև ընդգծել է, որ իրանցի էլիտար զինվորականների հետ կապված նման որոշումը ճիշտ է համարում։