Ինչ գործունեությամբ է աչքի ընկել Բելգիայում ՀՀ դեսպան Աննա Աղաջանյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ դեսպանների գործունեությանը՝ այսօր կանդրադառնանք Բելգիայի թագավորությունում ՀՀ արտակարգ և լիազոր դեսպան Աննա Աղաջանյանի գործունեությանը: Վերջինս դեսպան է նշանակվել 2020 թվականի օգոստոսի 4-ին՝ 44 օրյա պատերազմից ընդամենը մեկ ամիս առաջ:  Դեսպանի աշխատանքային գործունեությունը բավական հարուստ է: 1997-1998 թթ. եղել է ՄԱԿ-ում ՀՀ մշտական ներկայացուցչության առաջին քարտուղար (Նյու Յորք)։ 1999-2003 թթ. եղել է ԱԳՆ միջազգային կազմակերպությունների ՄԱԿ-ի բաժնի վարիչ, 2003-2006 թթ.՝ ԵՄ-ում ՀՀ ներկայացուցչության խորհրդական, 2006-2007 թթ.՝ ԱԳՆ միջազգային կազմակերպությունների վարչության մարդու իրավունքների բաժնի վարիչ, 2008-2009 թթ.՝ ԱԳՆ Եվրոպայի վարչության պետ, 2009-2013 թթ.՝ ԵՄ-ում ՀՀ ներկայացուցչության դեսպանորդ, 2013 թվականին ԱԳՆ աշխատակազմի քարտուղարության խորհրդական։ 2013 թվականի դեկտեմբերին նշանակվել է Ինդոնեզիայի հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Ջակարտա)։ Աննա Աղաջանյանի ամուսինը Թոմաս Յոախիմի Շուլցն է։

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է։ Այս առումով  դեսպանատան պաշտոնական կայքում հայ համայնքի ներկայացուցիչների և, ընդհանրապես, համայնքային կառույցների հետ համագործակցության մասին վկայող տեղեկությունները բացակայում են: Մինչդեռ Բելգիայում բավական կուռ հայ համայնք է առկա:  1980 թվականից Բրյուսելի համայնքում նշանակալի դեր ունի տեղի հայերի գլխավոր հավաքատեղին` Հայ տունը, որտեղ կազմակերպվում են բարեգործական եւ մշակութային միջոցառումներ: Գործում է ՀԲԸՄ մասնաճյուղը, «Արբակ Մխիթարյան» հասարակական կենտրոնը, Անտվերպենում բելգիահայ տիկնանց միությունը, ինչպես նաեւ հասարակական եւ մշակութային բնույթի մի շարք այլ կազմակերպություններ. «Արդիա», «Արաքս», «Հայկ», «Պրոգրես», «Լեւոն Շանթ», «Դեմոկրատների միություն», «Բելգիայի հայ երիտասարդաց միություն», «Նուարդ» եւ այլն: Բելգիահայ գաղութում ազգային կուսակցություններից առաջինը` ՀՅԴ տեղական կազմակերպությունը, ստեղծվել է 1997թ. հունիսին: Նրա հովանու տակ գործում են մշակութային եւ մարզական միություններ: 1998 թվականից իր աշխատանքն է սկսել Հայ դատի հանձնախումբը, որը համագործակցում է Ֆրանսիայի Հայ դատի հանձնախմբի հետ:

Արտաքին քաղաքականության արդյունավետ իմպլեմենտացիայի կարևորագույն տարրերից է եկեղեցական դիվանագիտությունը՝ մանավանդ, երբ խոսքը Հայաստանի արտաքին քաղաքականության մասին է։ Հայաստանյաց առաքելական եկեղեցու Բելգիայի հոգեւոր հովվությունը կազմավորվել է 1991թ. (ենթակա է Արեւմտյան Եվրոպայի հայրապետական պատվիրակությանը): Կենտրոնը Բրյուսելի Ս. Մարիամ Մագդաղենացի եկեղեցին է: Եկեղեցու հոգեւոր հովիվն է Հոգեշնորհ Տեր Զատիկ վարդապետ Ավետիքյանը` Արեւմտյան Եվրոպայի Հայրապետական Պատվիրակի Բենելուքսի փոխանորդ: Դեսպանը, սակայն, այս ընթացքում հանդիպումներ չի ունեցել հայ առաքելական եկեղեցու ներկայացուցիչների հետ: Վերջինս միայն ապրիլի 24-ին է այցելել  Բրյուսելի Սուրբ Մարիամ Մագդաղենացի Հայ առաքելական եկեղեցի:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Պաշտոնական լրահոսից տեղեկանում ենք, որ նմանատիպ հանդիպումը գրանցվել է նախորդ տարվա ապրիլին՝ Բելգիայում ՀՀ դեսպան Աննա Աղաջանյանն առցանց հանդիպում է ունեցել Սենատի նախագահ Ստեֆանի Դ՛Օզի հետ։ Բացի այդ, քաղաքավարական հանդիպում է անցկացվել Բելգիայի Ներկայացուցիչների պալատի նախագահ Էլիան Տիլյոյի հետ: Դեսպանը մասնակցել է նաև Ֆլամանական խորհրդարանում Լեռնային Ղարաբաղի հակամարտությանը նվիրված մտքերի փոխանակմանը։

Հանրային դիվանագիտությունը ակնհայտորեն դեսպանի ուժեղ կողմերից մեկը չէ: Դեսպանատան ֆեյսբուքյան պաշտոնական էջը առավելապես հիշեցնում է ԱԳՆ կամ կառավարության պատի թերթ, այստեղ գրեթե բացակայում է որևէ հիշատակում առ այն, թե ինչով է զբաղված եղել դեսպան Աղաջանյանը՝ 44-օրյա պատերազմից, նախորդ տարի սեպտեմբերին ադրբեջանական կողմի կազմակերած ագրեսիայից հետո: Իհարկե, հարգանքի տուրք մատուցելուց զատ:

Սակայն, պետք է փաստենք, որ դիվանագիտական ներկայացուցչության գլխավոր գործառույթը, այնուամենայնիվ, դա չէ: Չկա որևէ հիշատակում, թե այս ընթացքում Արցախի և Հայաստանի շահերի վրա լույս սփռող ինչ հարցազրույցներով  է հանդես եկել դեսպանը: Սեպտեմբերյան ագրեսիայի օրերին դեսպանատունը կիսվել է ԱԳ նախարարի տեղակալ Պարույր Հովհաննիսյանի հարցազրույցով․ հարց է առաջանում՝ իսկ ինչո՞ւ նմանատիպ հարցազրույցով կամ հարցազրույցների շարքով հանդես չի եկել ինքը՝ դեսպանը:

Ընդհանուր առմամբ, պետք է փաստենք, որ չնայած Բելգիայում առկա կուռ համայնքին և գործունյա համայնքային կառույցներին՝ վերջիններիս հետ դեսպանատան կոմունիկացիան բավական թույլ է, նույնը կարելի է ասել բելգիական իսթեբլիշմենթի հետ ՀՀ դիվանագիտական ներկայացուցչության կապերի մասին: Հաշվի առնելով, որ Բրյուսելը հանդիսանում է ՀՀ-ի համար առանցքային գործընկեր և այստեղ կայացվում են ՀՀ համար վճռորոշ որոշումներ՝ նման պասիվությունը կարող է լրջորեն հարվածել ՀՀ պետական շահերի իրացմանը:

Շարունակելի...