Հրաչյա Սարգսյանի մեկամյա գործունեության ընթացքում արձանագրված սկանդալներն ու «մութ կետերը»

Վերջին մեկ տարվա ընթացքում մամուլում պարբերաբար հրապարակումներ էին հայտնվում կապված Երևանի քաղաքապետարանում արձանագրված այս կամ այն խախտումների հետ: Այդ հրապարակումների մի մասը ուղեկցվում էր ապացույցներով, իսկ մյուսը մասը հարցեր էր առաջացնում, որոնց պատասխանները հանրությունը այդպես էլ չի ստացել: Սակայն, փաստացի տվյալները բավարար էին, եթե միանգամից երկու կառույց՝ ՄՊՀ-ն և ՊՎԾ-ն, ուսումնասիրություններ էին սկսել Երևանի քաղաքապետարանում:

Դիցուք՝ մամուլը օրեր առաջ գրել էր, որ Երևանի քաղաքապետարանի նկատմամբ նոր վարույթ կհարուցվի: Պատճառը 2021 և 2022 թվականներին ավտոբուսների ձեռքբերման գործընթացն է, ինչը շատ հարցեր է առաջացրել Մրցակցության պաշտպանության հանձնաժողովի մոտ:

Ըստ հանձնաժողովի՝ 2021 և 2022 թվականների ընթացքում ավտոբուսների ձեռքբերման նպատակով կազմակերպված գնման ընթացակարգերի հրավերների տեխնիկական բնութագրերով առերևույթ սահմանվել են այնպիսի պահանջներ, որոնք կարող է հանգեցնել գնման ընթացակարգերի հնարավոր մասնակիցների համար անհավասար պայմանների ստեղծմանը և տնտեսական մրցակցության սահմանափակմանը: Բացի այս, արձանագրվել է տեխնիկական բնութագրերով սահմանված չափորոշիչների միայն կոնկրետ մեկ սուբյեկտի կողմից արտադրվող փոխադրամիջոցների չափորոշիչներին համապատասխանելու հավանականությունը, ինչը կարող է վկայել այլ տնտեսավարողի հետ համաձայնության ձեռքբերման հնարավորության մասին:  Հանձնաժողովը դիմել է քաղաքապետարան 2021 և 2022 թվականների ընթացքում ավտոբուսների ձեռքբերման նպատակով հայտարարված գնման ընթացակարգերի վերաբերյալ տեղեկատվություն ստանալու նպատակով: Քաղաքապետարանը տրամադրել է ոչ ամբողջական տեղեկություն, բայց, չնայած դրան, հանձնաժողովը որոշել է կասեցնել հարուցված վարույթը: Սակայն, մամուլը համառորեն գրում է, որ  առաջիկայում վերսկսելու է վարույթը: 

Բացի այդ, Պետական վերահսկողական ծառայությունում ամփոփվել են Երևանի քաղաքապետարանում քաղաքաշինության ոլորտին առնչվող մի շարք մշտադիտարկումների արդյունքներ։ Մշտադիտարկումների համար հիմք են հանդիսացել Ծառայության կողմից ստացված տեղեկությունների, դիմումների, բողոքների, առաջարկությունների, փաստաթղթերի և հաղորդումների հիման վրա կատարված վերլուծությունները։ Մշտադիտարկումների արդյունքում արձանագրվել է, որ Երևանի քաղաքապետարանի պաշտոնատար անձանց կողմից թույլ տրված անգործության հետևանքով համայնքի բյուջեն զրկվել է լրացուցիչ 6.867.160.500 դրամի եկամուտ ունենալու հնարավորությունից։ Ընտրանքային կարգով առանձնացվել են թվով 43 խոշոր օբյեկտներ, որոնց նախահաշվային գները կազմել են 56.488.732.400 ՀՀ դրամ, որի համապատասխան տուգանքները կազմել են 6.213.760.500 ՀՀ դրամ, մինչդեռ 2011-2021թվականներին համայնքի պաշտոնատար անձանց կողմից օրենքով սահմանված վարչարարությունը չի իրականացվել և արդյունքում համայնքի բյուջեն զրկվել է լրացուցիչ 6.213.760.500 ՀՀ դրամի եկամուտ ունենալու հնարավորությունից: 

Իսկ ավելի վաղ հայտնի էր դարձել` Ծառայության կողմից Երևանի քաղաքապետարանում իրականացվել է  նաև 2018-2022թթ. ընկած ժամանակահատվածում պետական միջոցների տրամադրման համար հիմք հանդիսացող տեղեկատվության արժանահավատության գնահատման նպատակով ուսումնասիրություն, որի  արդյունքում հայտնաբերվել էին շուրջ 8.5 միլիարդ ՀՀ դրամի խախտումներ։ Ուսումնասիրության արդյունքներն  ամփոփվել և ուղարկվել էին ՀՀ գլխավոր դատախազություն՝ իրավական գնահատական տալու և հետագա ընթացքը լուծելու նպատակով:

Ընդամենը վերջերս էլ Երևանի ավագանու անկախ անդամ Իզաբելլա Աբգարյանը ֆեյսբուքյան իր էջում անդրադարձել էր մի շարք խախտումների, որոնք տեղ են գտել Հրաչյա Սարգսյանի պաշտոնավարման ընթացքում: Ըստ նրա՝ շինաշխատանքների մրցույթներն արվում են առանց նախագծի և նախահաշվի մրցույթների:

Երևանի քաղաքապետարանը նախորդ տարվա դեկտեմբերի 28-ի նիստում նվիրաբերություն ընդունելու մասին որոշում ընդունեց. Երևան քաղաքին նվիրաբերվեց 75 հատ քարե նստարան, 135 աղբաման և 60 հատ մոխրաման, որոնք տեղադրվել են Երևան քաղաքի Սարյան պուրակում, Օղակաձև զբոսայգում, Վարդան Մամիկոնյանի հուշարձանի շրջակայքում: Նվիրաբերողն էլ Սամվել Ալեքսանյանին պատկանող «Ալեքս էնդ հոլդինգ» և «Նոյ ինվեստ գրուպ» ընկերություններն էին: Հիշելով հայտնի Կամազների պատմությունը` ակամայից ինքդ քեզ հարց ես տալիս՝ իսկ ինչի՞ դիմաց է այս անգամ Ալեքսանյանն այսչափ առատաձեռն գտնվել:

Սա ընդամենը մի փոքր մասն է այն հրապարակային արված հայտարարությունների, որոնք վկայում են այն մասին, որ քաղաքապետարանում, ամեն դեպքում, այնքան էլ ամեն բան մաքուր չէ, որքան փորձում են ներկայացնել քաղաքային իշխանությունները: Անգամ, եթե գործ չունենք բացահայտ կոռուպցիոն դրվագների հետ, ապա վերը նշված հարցերը ունեն պարզաբանման կարիք, որպեսզի հանրության և հատկապես՝ երևանցիների մոտ չստեղծվի տպավորություն, որ քաղաքը կառավարվում է նախկին բարքերի լավագույն ավանդույթներով...