Ինչ գործունեությամբ է աչքի ընկել Սիրիայի Արաբական Հանրապետությունում ՀՀ դեսպան Տիգրան Գևորգյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Սիրիայում ՀՀ արտակարգ և լիազոր դեսպան Տիգրան Գևորգյանի գործունեությանը: ՎԵրջինիս կենսագրությունը բավական ուշագրավ է․  2005-2007թթ.՝  Եգիպտոսի Արաբական Հանրապետությունում ՀՀ դեսպանության առաջին քարտուղար, 2007-2008թթ.՝ ՀՀ ԱԳՆ Մերձավոր Արևելքի վարչության Արաբական երկրների բաժնի առաջին քարտուղար, 2008թ՝ ՀՀ ԱԳՆ Մերձավոր Արևելքի երկրների վարչության Արաբական երկրների և Իսրայելի բաժնի վարիչ, 2009-2014թթ.՝ Սիրիայի Արաբական Հանրապետությունում ՀՀ դեսպանության խորհրդական, 2014-2017թթ.՝ Հալեպում ՀՀ գլխավոր հյուպատոս, 2017-2018թթ.՝ ՀՀ ԱԳՆ Մերձավոր Արևելքի երկրների վարչության խորհրդական: 2018թ. ՀՀ նախագահի հրամանագրով նշանակվել է ՀՀ արտակարգ և լիազոր դեսպան Սիրիայի Արաբական հանրապետությունում:

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է։ Գաղտնիք չէ, որ Սիրիայում ունենք բավական կուռ համայնք և կազմակերպված համայնքային կառույցներ: Սակայն, թե՛ դեսպանատան պաշտոնական էջում, թե՛ դեսպանատան ֆեյսբուքյան էջում բացակայում են տեղեկությունները դեսպանի և համայնքային կառույցների ներկայացուցիչների միջև կայացած հանդիպումների վերաբերյալ: Դեսպան Գևորգյանի գործունեության մասին ինքնին տեղեկությունը բավական սուղ է, փոխարենը լայնորեն լուսաբանված է ԱԳՆ գործունեությունը և դիցուք՝ այլ երկրներում ՀՀ դեսպանների ելույթները և հայտարարությունները:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Հաշվի առնելով, որ Սիրիան պատմականորեն հանդիսանում է բարեկամ երկիր և առկա են բոլոր հնարավորությունները ճիշտ աշխատելու դեպքում ստանալ արաբական աշխարհի առանցքային պետություններից մեկի քաղաքական աջակցությունը, այս առումով դեսպան Գևորգյանի գործունեությունը նույնպես բազմաթիվ հարցեր է առաջացնում: Պաշտոնական հաղորդագրություններից տեղեկանում ենք, որ Սիրիայում ՀՀ դեսպան Տիգրան Գևորգյանը այս ընթացքում այցելել է Սիրիայի Խորհրդարան /Ժողովրդական Ժողով/ և հանդիպում է ունեցել ՍԱՀ խորհրդարանի նախագահ Համուդա Սաբբաղի հետ: Դեսպանը հանդիպում է ունեցել նաև ՍԱՀ խորհրդարանի Սիրիա-Հայաստան բարեկամության խմբի անդամների հետ՝ խմբի նախագահ Լուսի Իսքենյանի գլխավորությամբ: Դեսպանը հանդիպում է ունեցել նաև Հալեպի նահանգապետ Հուսեյն Դիաբի հետ:

Արտաքին քաղաքականության արդյունավետ իմպլեմենտացիայի կարևորագույն տարրերից է եկեղեցական դիվանագիտությունը՝ մանավանդ, երբ խոսքը Հայաստանի արտաքին քաղաքականության մասին է: Սակայն, պաշտոնական հաղորդագրություններից տեղեկանում ենք, որ բացի Բերիո հայոց թեմի և Դամասկոսի հայոց թեմի առաջնորդների ղկավարած պատվիրակությունների՝ դեսպանատուն այցելությունից, որևէ այլ կոմունիկացիա դեսպանատուն-եկեղեցի գծով չի իրականացվել և չի իրականացվում, ինչը լրջորեն նվազեցնում է համայնքի հետ հաջող համագործակցության հնարավորությունները:

Հանրային դիվանագիտության ասպարեզում դեսպանը նույնպես չի փայլում:  Դեսպանատան ֆեյսբուքյան պաշտոնական էջը առավելապես հիշեցնում է ԱԳՆ կամ կառավարության պատի թերթ, այստեղ գրեթե բացակայում է որևէ հիշատակում առ այն, թե ինչով է զբաղված եղել դեսպան Գևորգյանը՝ 44-օրյա պատերազմից, նախորդ տարի սեպտեմբերին ադրբեջանական կողմի կազմակերպած ագրեսիայից հետո: Դեսպանատան պաշտոնական ֆեյսբուքյան էջում կարելի է հանդիպել միայն ԱԳՆ ռելիզները:  Հարցազրույցներից կարելի է առանձնացնել միայն դեսպան Գևորգյանի տված հարցազրույցնը «ՙԱլ-Ուատան» օրաթերթին՝ ՀՀ Անկախության 30-ամյակի կապակցությամբ:

Դեսպանատունը, կարծես թե, այնքան էլ ակտիվ չէ նաև քաղաքացիների հետ կոմունիկացիան պահելու հարցում, հակառակ դեպքում՝ նմանատիպ մեկնաբանությունների առիթ չէր առաջանա։

Ընդհանուր առմամբ, պետք է փաստենք, որ չնայած Սիրիայում առկա բավական կուռ և կազմակերպված համայնքին և գործունյա համայնքային կառույցներին՝ վերջիններիս հետ դեսպանատան կոմունիկացիան բավական թույլ է, նույնը կարելի է ասել սիրիական իսթեբլիշմենթի հետ ՀՀ դիվանագիտական ներկայացուցչության կապերի մասին: 

Շարունակելի...