Ինչ գործունեությամբ է աչքի ընկել Լիբանանում ՀՀ դեսպան Վահագն Աթաբեկյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Լիբանանում ՀՀ արտակարգ և լիազոր դեսպան Վահագն Աթաբեկյանի գործունեությանը: ՎԵրջինիս կենսագրությունը բավական ուշագրավ է․  2002-2004թթ. վերջինս աշխատել է որպես ՀՀ Աժ աշխատակազմում արտաքին հարաբերությունների վարչության պետ, 2004-2008թթ. Ֆրանսիայում ՀՀ դեսպանությունում խորհրդական, 2008-2011 թթ. ՀՀ ԱԳ նախարարի խորհրդական, 2011թ. Ֆրանսիայի Հանրապետությունում ՀՀ դեսպանության արտակարգ դեսպանորդ և լիազոր նախարար, 2016թ. ՀՀ ԱԳ նախարարի խորհրդական` ֆրանկոֆոնիայի գծով 2018թ-ից Լիբանանի Հանրապետությունում ՀՀ արտակարգ և լիազոր դեսպան (նստավայրը' Բեյրութ):

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է։ Գաղտնիք չէ, որ Լիբանանում ունենք բավական կուռ համայնք և կազմակերպված համայնքային կառույցներ:  Լիբանանի դերը սփյուռքում դեռ եւս պահպանվում է նաև շնորհիվ այն բանի, որ այստեղ գտնվում են բազմաթիվ հայկական եկեղեցիներ, ինչպես նաեւ սփյուռքի այնպիսի կառույցների կենտրոնատեղիներ, ինչպիսիք են՝ «Համազգային» մշակութային միությունը www.hamazkayin.com, Հայ մարմնակրթական ընդհանուր միությունը, Հայ մարզական միությունը եւ այլն: Հայ համայնքը Լիբանանի կառավարությունում ներկայացված է ի դեմս էներգետիկայի եւ ջրի նախարար Արթուր Նազարյանի։ Դեսպանատուն-համայնք համագործակցության շրջանակներում հարկ է առանձնացնել Լիբանանում հավատարմագրված ֆրանկոֆոն դեսպանների խմբի այցելությունը հայաբնակ Անջար: Դեսպանը նաև մասնակցել էր Առաջին Հանրապետության հռչակման 104-րդ տարելիցին նվիրված միջոցառմանը:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Առանցքային հանդիպումների շարքից կարելի է առանձնացնել հետևյալները: Դեսպան Աթաբեկյանը հանդիպել է Լիբանանի Ազատ Հայրենասիրական Շարժում կուսակցության նախագահ Ջեբրան Բասիլին։ Հանդիպմանը քննարկվել են հայ-լիբանանյան և տարածաշրջանային օրակարգի հարցեր։Աթաբեկյանը հանդիպել է նաև Լիբանանի Ընդհանուր անվտանգության գլխավոր տնօրեն, գեներալ-մայոր Աբբաս Իբրահիմին։ Քննարկվել են Լիբանանում և տարածաշրջանում տեղի ունեցող քաղաքական զարգացումները, ինչպես նաև Հայաստանի և Լիբանանի միջև անվտանգային ոլորտում համագործակցության ընդլայնման ուղիները։ Դեսպանը հանդիպել է նաև Լիբանանի Հանրապետության Տեղեկատվության նախարար Զիյադ Ալ Մաքարիին։

Արտաքին քաղաքականության արդյունավետ իմպլեմենտացիայի կարևորագույն տարրերից է եկեղեցական դիվանագիտությունը՝ մանավանդ, երբ խոսքը Հայաստանի արտաքին քաղաքականության մասին է: Այս առումով Լիբանանը առանձնահատուկ դեր է խաղում, քանի որ այստեղ  է գտնվում Անթիլիասի մայրավանքը և կաթողիկոսի նստավայրը: Պետք է նշել, որ դեսպանատուն-եկեղեցի կապը բավական ակտիվ է գործում, պաշտոնական տեղեկատվությունը հուշում է, որ դեսպան Աթաբեկյանը հաճախ է հանդիպումներ ունենում Արամ Ա-ի հետ, բացի այդ, բաց չի թողնում եկեղեցական արարողությունները: Դիցուք՝ դեսպանը ներկա էր գտնվել Անթիլիասի մայրավանքում մյուռոնօրհնեքի արարողությանը: Եկեղեցական դիվանագիտության շրջանակներում պետք է առանձնացնել նաև դեսպան Աթաբեկյանի հանդիպումը Լիբանանի Մարոնի Լիգայի նախագահ, դեսպան Խալիլ Քարամի հետ: Բացի այդ կարևոր է առանձնացնել  Մարոնի համայնքի հոգևոր առաջնորդ Պշարա Ռայի Պատրիարքի հետ հանդիպումը:

Ինչ վերաբերվում է հանրային դիվանագիտությանը, ապա պետք է փաստենք, որ այստեղ դեսպանատունը ակնհայտորեն կաղում է: Թե՛ 44-օրյա պատերազմի, թե՛ սեպտեմբերյան ագրեսիայի և թե վերջերս՝ Լաչինի միջանցքի փակման ֆոնին դեսպանը հանդես չի եկել հարցազրույցներով, ինչը տվյալ դեպքում կարելի է համարել հանրային դիվանագիտության տապալում: Կարծես թե, ակտիվ չէ դեսպանատունը նաև քաղաքացիների հարցերի արձագանքման մասով:

Ինչով էր զբաղված դեսպանատունը 44-օրյա պատերազմի ընթացքում: Այս հարցը անչափ կարևոր է՝ հաշվի առնելով թե ինչ ռեսուրսների էր տիրապետում հայկական համայնքը և ինչ ազդեցություն կարող էր ունենալ լիբանանյան քաղաքական վերնախավի վրա՝ առնվազն կատարվածի քաղաքական գնահատական տալու մասով: Դեսպանատան ֆեյսբուքյան էջի մեկնաբանություններից պարզ է դառնում, որ դեսպանատունն այնքան էլ ոգևորված չի եղել համայնքի կողմից ցույցերի կազմակերպմամբ:

Ինչ վերաբերվում  Է Արցախի փաստացի շրջափակմանը, ապա այս թեմային դեսպանատունը անդրադարձել է՝ տարածելով միայն Լիբանանի արտաքին գործերի նախարարության հայտարարությունը։

Ընդհանուր առմամբ, պետք է փաստենք, որ Լիբանանում ՀՀ դեսպանի աշխատանքը պարունակում է ինչպես գովելի կետեր, այնպես էլ տարրեր, որոնք ակնհայտորեն բարելավելու կարիք է զգացվում:

Շարունակելի...