Ինչ գործունեությամբ է աչքի ընկել Հնդկաստանում ՀՀ դեսպան Յուրի Բաբախանյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Հնդկաստանում ՀՀ արտակարգ և լիազոր դեսպան Յուրի Բաբախանյանի գործունեությանը: ՎԵրջինիս կենսագրությունը բավական ուշագրավ է: 2004-2005թթ. աշխատել է Սիրիայում ՀՀ գործերի հավատարմատար, 2006-2008թթ. ԱԳՆ աշխատակազմում քարտուղարության խորհրդական, 2008թ. ԱԳՆ ԱՊՀ վարչության խորհրդական, 2008-2010թթ. ԱԳՆ Միջազգային տնտեսական համագործակցության վարչության խորհրդական, 2010-2013թթ. ԱԳՆ բազմակողմ և երկկողմ տնտեսական համագործակցության վարչության խորհրդական, 2013թ.  ԱԳՆ Մերձավոր և Միջին Արևելքի վարչության խորհրդական, 2013-2016թթ. ԱՄԷ-ում ՀՀ դեսպանության խորհրդական, 2016-2019թթ. ԱԳՆ Մերձավոր և Միջին Արևելքի վարչության խորհրդական, 2019-2020թթ. ԱԳՆ Միջին Արևելքի և Աֆրիկայի վարչության խորհրդական, 2020-2021թթ. ԱԳՆ Միջին Արևելքի և Աֆրիկայի վարչության Մերձավոր Արևելքի և Հյուսիսային Աֆրիկայի բաժնի վարիչ, 2021թ. մարտի 15-ից Հնդկաստանի Հանրապետությունում Հայաստանի Հանրապետության արտակարգ և լիազոր դեսպան (նստավայրը` Նյու Դելի), 2022թ. նոյեմբերի 10-ից համատեղության կարգով Շրի Լանկայի Ժողովրդավարական Սոցիալիստական Հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Նյու Դելի):

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է։ Այս առումով պետք է առանձնացնել 2023թ. հունվարի 16-ին Հնդկաստանում Հայաստանի Հանրապետության դեսպանությունում կազմակերպված «Համայնքային ներգրավվածություն» խորագրով հանդիպում-քննարկումը: 2022թ. ապրիլի 24-ին Հնդկաստանում ՀՀ դեսպանության նախաձեռնությամբ Հնդկաստանի միջազգային կենտրոնում տեղի է ունեցել «Հայոց ցեղասպանություն. Օսմանյան կայսրության մեղքը» (Armenian Genocide: The sin of the Ottoman Empire») գրքի շնորհանդես:

Արտաքին քաղաքականության արդյունավետ իմպլեմենտացիայի կարևորագույն տարրերից է եկեղեցական դիվանագիտությունը՝ մանավանդ, երբ խոսքը Հայաստանի արտաքին քաղաքականության մասին է։ Այստեղ էլ պետք է փաստենք դեսպանատուն-եկեղեցի կապի զուտ արարողակարգային բնույթը: Այս առումով տեղեկատվությունը շատ ավելի սուղ է: Միակ պաշտոնական հանդիպումը, որ ունեցել է դեսպանը, կայացել է 2021-ին, այն ժամանակ  Բաբախանյանը դեսպանությունում ընդունել էր «Saltdiscovery» Media հնդկական տեղեկատվական կենտրոնի տնօրեն Կարան Բհաթիային: Այսինքն` ստացվում է, որ մի կողմից բավական բարձր մակարդակի հանդիպումներ են կազմակերպվել, դիցուք՝ ՀՀ ԱԳՆ ղեկավարն է այցելել Հնդկաստան, սակայն, դեսպանը, բառի բուն իմաստով, պարապուրդի է մատնված և որևէ կերպ չի էլ փորձում աշխատել հնդկական քաղաքական վերնախավի ներկայացուցիչների հետ:

Հանրային դիվանագիտույան մասով պատկերը կրկին տխուր է: Դեսպան Բաբախանյանը այս ընթացքում հանդես չի եկել և ոչ մի հարցազրույցով, իսկ դեսպանատան պաշտոնական էջում տեղեկատվությունը հիմնականում վերաբերվում է ԱԳՆ նախարարի կամ ՀՀ վարչապետի ելույթներին և տարածած հաղորդագրություններին:

Թե ինչ կապ ունի Հնդկաստանում ՀՀ դեսպանատունը ԱԳՆ նախարարի` Գերմանիա կատարած այցի հետ և ինչու է ստանձնել ԱԳՆ կայքի մոդերատորի դերը՝ դժվար է ասել: Թերևս սա կարելի է բացատրել այն հանգամանքով, որ դեսպանատունը բեղուն աշխատանքի արգասիքներ չունի՝ հանրությանը ներկայացնելու և հրամցնելու համար:

Դեսպանատունը պասիվ էր նաև սեպտեմբերյան ագրեսիայի օրերին. դեսպանն այդ ընթացքում զբաղված էր կինոփառատոնին իր մասնակցությունը բերելով: Նույնը կարելի է ասել նաև Լաչինի միջանցքի շրջափակման շուրջ 60 օրերի ընթացքում դեսպանատան ցուցաբերած վարքագծի մասին: Այս մասով նույնպես տոտալ լռություն է:

Շատ կարևոր է նաև աշխատանքը Հնդկաստանում հավատարմագրված այլ երկրների դեսպանների հետ, սակայն դիտարկված ժամանակահատվածում դեսպան Բաբախանյանը նմանատիպ հանդիպումներ չի ունեցել: Կարող ենք փաստել, որ դեսպանին այդպես էլ չի հաջողվել համայնքի հետ ինստիտուցիոնալ փոխհարաբերությունների հիմքեր դնել,  իսկ գործադիր իշխանության մարմինների հետ շփումները հիմնականում կրել են ճանաչողական և արարողակարգային բնույթ, ինչը որևէ կերպ չի կարող տեղավորվել կառավարության կողմից սահմանված հայ-հնդկական հարաբերությունների զարգացման տեսլականի մեջ:

Շարունակելի...