Ինչ գործունեությամբ է աչքի ընկել Չինաստանում ՀՀ դեսպան Սերգեյ Մանասարյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Չինաստանում ՀՀ արտակարգ և լիազոր դեսպան Սերգեյ Մանասարյանի գործունեությանը: ՎԵրջինիս կենսագրությունը բավական ուշագրավ է:  2005-2010թթ. վերջինս աշխատել է որպես Բուլղարիայի Հանրապետությունում Հայաստանի Հանրապետության արտակարգ և լիազոր դեսպան:  2010-2016թթ․ ՀՀ արտաքին գործերի նախարարի տեղակալ, 2016թ-ից Չինաստանի Ժողովրդական Հանրապետությունում  Հայաստանի Հանրապետության արտակարգ և լիազոր դեսպան (նստավայրը՝ Պեկին), 2016թ-ից Մոնղոլիայում Հայաստանի Հանրապետության դեսպան, 2018թ-ից Թաիլանդի Թագավորությունում Հայաստանի Հանրապետության արտակարգ և լիազոր դեսպան Թաիլանդի Թագավորությունում (նստավայրը՝ Պեկին)։

Նշենք, որ Մանասարյանը այն եզակի դեսպաններից է, ում հեղափոխությունից հետո Նիկոլ Փաշինյանը հետ չկանչեց, փոխարենը՝ նույնիսկ համատեղության կարգով այլ երկրներում նույնպես նշանակում կատարեց:

Դիտարկելով Չինաստանում ՀՀ դեսպանության և անձամբ դեսպանի աշխատանքը՝ պետք է, անշուշտ, հաշվի առնել նաև հյուրընկալող երկրի բնույթը և քաղաքական կարգը: Այստեղ հնարավորությունը հանրային դիվանագիտություն ծավալելու և այս դաշտում մանեվրելու համար բավական սուղ է, և հիմնական գործընթացները տեղի են ունենում դիվանագիտական կուլուարներում:

Ինչևէ, վերլուծենք այն տեղեկությունը որը առկա է: Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է։ Ասել, որ Չինաստանում առկա է մեծ և կուռ հայկական համայնք՝ սխալ կլինի, սակայն, դեսպանատունը, ամեն դեպքում, կապի մեջ է այդ երկրում բնակվող կամ ուսուցանող հայազգի քաղաքացիների հետ: Այդ ամենը հատկապես ցայտուն դարձավ համավարակի օրերին: Բերենք մեկ հայտնի օրինակ: Հայազգի զույգը Չինաստանում ՀՀ դեսպանություն էր տեղափոխվել մարտի 28-ին այն բանից հետո, երբ Պեկինի օդանավակայանում, ի հակառակ օր առաջ տրված հավաստիացումներին, նրանց չէին թույլատրել թռչել AEROFLOT ավիաընկերության Պեկին-Մոսկվա-Երևան չվերթի ինքնաթիռով։ ՌԴ օդանավակայաններից օտարերկրյա օդանավակայաններ և հակադարձ ուղղությամբ իրականացվող կանոնավոր և չարտերային ավիահաղորդակցության դադարեցման պատճառով ավիաընկերությունը տեղափոխել էր բացառապես Ռուսաստանի քաղաքացիներին: Դեսպանատան ջանքերի շնորհիվ Միջազգային թռիչքների համար այդ օրերին փակ օդանավակայանը բացվել է հայազգի զույգի համար՝ մեկնման ընթացակարգը ապահովելու, ելքի օրինականությունը կնիքով վավերականացնելու համար:

Դեսպանատունը բավական երկար տարիներ ակտիվորեն աշխատում է հայ-չինական հարաբերությունների կրթական սեգմենտի զարգացման ուղղությամբ: Այդ աշխատանքի վերջին արգասիքներից կարելի է առանձնացնել ԵՊՀ ռեկտոր Հովհաննես Հովհաննիսյանի և Թյանջինի նորմալ համալսարանի նախագահ Ճոնգ Յինհուանի առցանց ստորագրած երկու համալսարանների միջև փոխգործակցության համաձայնագիրը, որը կոչված է ամրապնդելու և զարգացնելու գործընկերային հարաբերությունները, ինչպես նաև իրականացնելու ակադեմիական փոխանակման ծրագրերը:

Դեսպանատունը իր մասնակցությունն է ունենում նաև ռազմական համագործակցության շրջանակում ձեռք բերված պայմանավորվածությունների իրագործմանը: Դիցուք՝  մոտ 150 հայ սպա մասնագիտական կրթություն է ստանում այդ երկրի ազգային պաշտպանության ակադեմիայում: Այն համարվում է ոչ միայն Չինաստանի, այլև աշխարհի մակարդակով հիմնական կրթական կառույցներից մեկը:

Ինչպես նշեցինք հանրային դիվանագիտության հարթակը Չինաստանում օտագործելու համար, անշուշտ, ամենահարմարն ու օպտիմալը չէ: Թերևս սրանով է պայմանավորված, որ դեսպան Մանասարյանը որպես կանոն հարցազրույցներ է տալիս հիմնականում հայկական լրատվամիջոցներին: Միակ չինական լրատվամիջոցը, որին դեսպանը հարցազրույց է տվել, Չինաստան ամսագիրն է:

Դեսպանատունը նաև ակտիվ է տնտեսական հարաբերությունների և գործարար շրջանակների հետ կապեր հաստատելու մասով: Դիցուք՝ 2021 թվականի ապրիլի 20-ին փոխըմբռնման հուշագիր է ստորագրվել «Էնթերփրայզ Արմենիայի» և «Արտերկրում ձեռնարկությունների զարգացման չինական ասոցիացիայի» միջև: Հուշագրի ստորագրման առցանց ձևաչափով արարողությանը՝ որպես հատուկ հրավիրյալներ, բացման խոսքով հանդես են եկել Չինաստանում Հայաստանի դեսպան Սերգեյ Մանասարյանը և Հայաստանում Չինաստանի դեսպանության տնտեսական և առևտրային խորհրդական Վան Ռուիծուանը: 

Շարունակելի...