Վայոց ձորի մարզպետ Արարատ Գրիգորյանի ուշագրավ գնումները

Չնայած այն հանգամանքին, որ ՔՊ-ական մարզպետները հաճախ են բողոքում սուղ բյուջեից և կրճատում են սոցիալական ոլորտին ուղղված ծախսերը, վերջիններս թե՛ նախորդ տարի, թե՛ այս տարի շարունակել են մեկ անձից միլիոնների հասնող գնումներ կատարել:

Դիցուք՝ Վայոց Ձորի մարզպետ Արարատ Գրիգորյանը 120,000 դրամի ներկայացուցչական ծառայություններ է գնել Ա/Ձ Անուշ Աստվածատուրյանից, 1,020,000 դրամի տրանսպորտային փոխադրումների ծառայություն՝ ԱՁ Մարտին Համբարձումյանից, 435,000 դրամի ներկայացուցչական ծառայություններ՝ «Արփա Պառնաս» ՍՊԸ-ից, 216,000 դրամի գրասենյակային ապրանքներ՝ Ա/Ձ Արմենակ Խալխաթյանից, 780,000 դրամի մեքենաների պահպանման ծառայություն է ձեռք բերվել Ա/Ձ Աշոտ Մկրտչյանից, 600,000 դրամի ավտոմատացման համակարգեր՝ «ԼՍՈՖՏ» ՍՊԸ-ից: 

Արարատ Գրիգորյանը մարզպետի պաշտոնը ստանձնել է 2019 թվականին և այդ պահից ի վեր մարզը չի կարող հպարտանալ գրանցած փոքր կամ մեծ հաջողություններով, այն պատճառով, որ դրանք պարզապես չկան: Առաջին խնդիրը, որը չհաջողվեց լուծել Գրիգորյանին, մարզի առջև կանգնած լուրջ բնապահպանական խնդիրն էր: Ամուլսարի հանքի վերաբացման մասով բնապահպաններին խոստումներ շռայլած և նրանց հետ քննարկումներ անցկացնող մարզպետը, ըստ մամուլի, մինչև վերջին ամիսները շարունակում էր ճնշում գործադրել Ջերմուկի համառող ավագանու վրա: ՏԻՄ ընտրություններին հետո նման խնդիր Գրիգորյանը այլևս չունի: Ավելորդ է ասել, թե ինչ բնապահպանական խնդիրներ են առաջանալու մարզում Ամուլսարի հանքի վերագործարկումից հետո:

Ոչ պակաս փոքր ձախողում է արձանագրվել մարզի ներդրումային ոլորտում: Չնայած այն բանին, որ մարզում ներդրումային համաժողով է կայացել՝ ներդրումային բում, մեղմ ասած, չկա: Ընդհանրապես Գրիգորյանը և իր թիմը նախընտրում են լռել իրենց ներգրավված ներդրումների մասին և նրանց կարելի է հասկանալ: 

Մամուլի ունեցած տեղեկատվության համաձայն՝ իշխանափոխությունից հետո Վայոց ձորի մարզպետարանում բացի վերը նշված ձախողումներից նաև ամենաթողություն է տիրում։ Մասնավորապես, AntiFake.am-ին դիմած քաղաքացին տեղեկություններ էր փոխանցել Վայոց ձորի մարզպետարանում առկա «ֆեյք» հաստիքների մասին: Մասնավորապես, քաղաքացու պնդմամբ՝ մարզպետարանում ստեղծվել են «ֆեյք» հաստիքներ` իշխանական ուժի ներկայացուցիչների մտերիմներին և «հեղափոխության» իրականացման մեջ իրենց «ավանդը» ներդրած անձանց «տեղավորելու» համար։

Ինչպես տեսնում ենք`  կառավարման տարիների ընթացքում ՔՊ-ական մարզպետին հաջողվել է տապալել իր կուռացիայի տակ գտնվող մարզի գրեթե բոլոր կարևորագույն խնդիրների լուծումը, ինչը չի խանգարում մարզպետարանին մեկ անձից գնումներ կատարել, չնայած այն հանգամանքին, որ անձամբ վարչապետն էր պահանջել հնարավորինս նվազագույնի հասցնել այդ կոռուպցիոն ռիսկեր պարունակող պրակտիկան...