Ինչ գործունեությամբ է աչքի ընկել Ճապոնիայում ՀՀ դեսպան Արեգ Հովհաննիսյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Ճապոնիայում ՀՀ արտակարգ և լիազոր դեսպան Արեգ Հովհաննիսյանի գործունեությանը: Վերջինիս կենսագրությունը բավական հարուստ է: 2001-2006թթ․աշխատել է Լիբանանի Հանրապետությունում ՀՀ արտակարգ և լիազոր դեսպան, 2006-2007թթ․` ՀՀ ԱԳՆ խորհրդական, 2007-2010թթ․` ՀՀ ԱԳՆ Ասիայի, Օվկիանիայի և Աֆրիկայի վարչության պետ, 2010-2013թթ․` ՀՀ ԱԳՆ Մերձավոր Արևելքի վարչության պետ, 2013-2017թթ․` Վիեննայում միջազգային կազմակերպություններում ՀՀ մշտական ներկայացուցչի տեղակալ, 2017-2021թթ․` ՀՀ ԱԳՆ Ասիայի, Օվկիանիայի վարչության պետ, 2021թ․ փետրվարի 16-ից Ճապոնիայում Հայաստանի Հանրապետության արտակարգ և լիազոր դեսպան (նստավայրը՝ Տոկիո):

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է: 2019թ. դրությամբ Ճապոնիայում բնակվում են 70-80 հայեր, մեծամասամբ` Տոկիոյում, նրանցից ոմանք նախկինում հայաստանաբնակ են եղել և ընտանիք կազմելով ճապոնացիների հետ՝ հաստատվել այստեղ: Ճապոնաբնակ հայերի աշխատանքային գործունեությունը մի շարք ոլորտներ է ընդգրկում, նրանց թվում կան գործարարներ, դասախոսներ, իրավաբաններ, ՏՏ ոլորտի մասնագետներ, արվեստագետներ, ուսանողների թիվը մոտ 15-ն է: Ճապոնիայում գործում է Ճապոնիա-Հայաստան բարեկամության ասոցիացիա (Japan Armenia Friendship Association, JAFA): Հաշվի առնելով, որ Ճապոնիայում հայ համայնքը այնքան էլ բազմամարդ չէ, դեսպանատուն-համայնք համագործակցություն որպես այդպիսին առկա չէ: Սակայն, դեսպան Հովհաննիսյանի վերջին հանդիպումներից կարելի է առանձնացնել Նոր Զելանդիայի Օքլենդ քաղաք կատարած աշխատանքային այցելության շրջանակներում  Նոր Զելանդիայի Հայկական Միության 25-ամյակին նվիրված միջոցառման մասնակցությունը:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Սխալ կլինի ասել, որ դեսպանը հագեցած աշխատանքային հանդիպումների շարք  է ունենում ճապոնացի պաշտոնյաների հետ: Կարելի է ասել, որ այդ հանդիպումները հիմնականում կրում են արարողակարգային բնույթ:

Ինչ իրավիճակ է հանրային դիվանագիտության դաշտում: Այստեղ իրավիճակը շատ ավելի տխուր է: Դեսպանատան պաշտոնական ֆեյսբուքյան էջում կարելի է գտնել ցանկացած տիպի տեղեկատվություն, բացառությամբ Ճապոնիայում ՀՀ դեսպանատան գործունեությունը լուսաբանող ռելիզներից: Դիցուք, դժվար  է ասել, թե տվյալ տեղեկատվությունը ինչ կապ ունի ՀՀ դեսպանության և ընդհանրապես Ճապոնիայի հետ

Դեսպանը որևէ կերպ հանրային հարթակներում չի անդրադարձել Ադրբեջանի կողմից սանձազերծած երկու պատերազմներին և Լաչինի շրջափակման թեմային: Դրա փոխարեն դեսպանատան էջում կարելի է գտնել ԱԳՆ նախարարի ելույթների ռելիզները, այն էլ՝ ֆրանսերենով։