Վահան Քերոբյանի պաշտոնավարումը՝ հարցականի տակ. Փաշինյանը «կզոհաբերի՞» նրան

Ամիսներ առաջ  ԱԺ-ում քննարկվեցին ՀՀ հաշվեքննիչ պալատի կողմից ՀՀ էկոնոմիկայի նախարարությունում ՀՀ 2021 թվականի պետական բյուջեի վեց ամիսների կատարման հաշվեքննության արդյունքների վերաբերյալ ընթացիկ եզրակացությունները: Կառույցի կողմից, մասնավորապես, ուսումնասիրվել է կորոնավիրուսի տնտեսական հետևանքների չեզոքացման հետևանքով տրամադրված վարկերի տոկոսադրույքների սուբսիդավորման ծրագրի շրջանակներում ներկայացված հաշվետվությունը: Ըստ այդմ, հաշվետվության մեջ առկա է եղել խեղաթյուրում՝ 1.249.486 հազար դրամի չափով:

Իսկ, օրինակ, էկոնոմիկայի ոլորտում պետական քաղաքականության մշակման, ծրագրերի համակարգման եւ մոնիթորինգի ոլորտում առկա է խեղաթյուրում՝ կապված նախարարության կողմից տրված պարգեւավճարների, ինչպես նաեւ հսկողության գործընթացի թերացում՝ կապված թափուր հաստիքների հետ, մասնավորապես՝ քաղաքացիական ծառայության պաշտոնը թափուր մնալուց հետո՝ երեք ամսվա ընթացքում, պետք է հայտարարվեր մրցույթ, ինչը չի իրականացվել: Այլ անհամապատասխանություններ եւս եղել են, որոնց մասին մանրամասն ներկայացված է 57 էջից բաղկացած եզրակացության մեջ:

Ամիսներ առաջ ՀՀ հաշվեքննիչ պալատի արդեն նախկին նախագահ Յոլյանի դեմ սպառնում էին քրեական գործեր հարուցել, ինչ է թե վերջինս հանդգնել էր վեր հանել պետական կառույցներում առկա բեսպրեդելն ու խախտումները: Հիմա պարզվում է` դրանք այնքան ճչացող են, որ անգամ ԱԺ-ն է կանչել Վահան Քերոբյանին ԱԺ՝ բացատրություններ տալու: Ընդհանրապես, Քերոբյանի համար բավական ծանր շրջան է: 

Դրանից առաջ էլ ՊՎԾ-ն էր խախտումներ հայտնաբերել էկոնոմիկայի նախարարությունում:  Դիցուք՝ Պետական վերահսկողական ծառայությունը ստացել էր տվյալներ ՀՀ տարածքից ավտոմեքենաների խլացուցիչների օգտագործված կատալիտիկ չեզոքացուցիչների (катализатор) թանկարժեք մետաղներ պարունակող կերամիկական թափոնների  արտահանման, ինչպես նաև այդ գործընթացում և թափոնների առուվաճառքի ոլորտում առկա խնդիրների մասին, ինչի կապակցությամբ նախաձեռնվել և իրականացվել էին վերահսկողական գործառույթներ: Կառույցը պարզել էր, որ 2018-2022 թվականների ընթացքում 11 կազմակերպությունների կողմից ՀՀ-ից դեպի երրորդ երկներ արտահանվել է ավելի քան  381 տոննա կերամիկական թափոններ: Նշված ժամանակահատվածում ՀՀ Էկոնոմիկայի նախարարությունը կազմակերպությունների կողմից կերամիկական թափոնների արտահանման լիցենզիաներ ստանալու համար ներկայացված հայտերի փաթեթներում առկա տեղեկությունների արժանահավատությունը չի գնահատել և տրամադրել է արտահանման լիցենզիաներ այն պարագայում, որ նշված թափոնների ձեռքբերման, ինչպես նաև որպես վաճառքի գին նշված արժեքները եղել են շուկայական նվազագույն արժեքներից էական՝ մոտ 10 անգամ պակաս:

Սա էլ դեռ բավական չէր, երեկ մեկ այլ ուշագրավ տեղեկություն ևս տարածվեց: ՀՀ հակակոռուպցիոն կոմիտեում իրականացված քրեական վարույթով ձեռք բերված ապացույցներով հիմնավորվել է, որ Ա. Ս.-ն, զբաղեցնելով ՀՀ էկոնոմիկայի նախարարության գյուղատնտեսական ծրագրերի իրականացման վարչության գլխավոր մասնագետի պաշտոնը, կաշառք տվողի մատնանշած անձանց օգտին հովանավորչության, թողտվության և ապօրինի անգործության համար կաշառք է ստացել Վ. Դ.-ից: Վերը նշված հանցավոր գործողությունների արդյունքում շուրջ չորս տասնյակ անձանց հնարավորություն է ընձեռնվել ՀՀ պետական բյուջեից հափշտակել առանձնապես խոշոր չափերով՝ մի քանի հարյուր միլիոն ՀՀ դրամի հասնող գումարներ: Այսինքն՝ Վահան Քերոբյանի ղեկավարած կառույցում կոռուպցիոն դեպքեր են արձանագրվում և սա, անշուշտ, լուրջ մտածելու տեղիք է տալիս:

Տպավություն է ստեղծվում, որ էկոնոմիկայի նախարար Վահան Քերոբյանի գլխին իսկապես սկսել են մութ ամպեր կուտակվել և սա կարող է առիթ հանդիսանալ, որպեսզի թիմակիցներից հենց նրան հաջորդ զոհաբերի Նիկոլ Փաշինյանը: Հատկապես ստեղծված իրավիճակում, երբ ՌԴ-ն արգելք է դրել հայկական կաթնամթերք արտադրող ընկերությունների ապրանքների ներկրման վրա, իսկ ԱՄՆ-ն սպառնում է տնտեսական սեկտորի դեմ սանկցիաներ կիրառել՝ Փաշինյանին օդի և ջրի պես մեղավորներ են անհրաժեշտ...