Հակասություններ՝ ՔՊ-ական նախարարների և պատգամավորների միջև. Նարեկ Զեյնալյան-Անահիտ Ավանեսյան

Որքան էլ որ ՔՊ ներսում փորձում են տպավորություն ստեղծել, որ ներթիմային որևէ լարվածություն տեղ չունի հեղափոխականների շրջանում, մի բան ակնհայտ է՝ վերջին շրջանում ՔՊ-ական տարբեր պաշտոնյաներ չեն թաքցնում հակասությունների այն շարանը, որն առկա է հատկապես գործադիրի անդամ ՔՊ-ականների և խորհրդարանում բազմած ՔՊ-ականների միջև։

Այսօր կանդրադառնանք պատգամավոր Նարեկ Զեյնալյանի և առողջապահության նախարար Անահիտ Ավանեսյանի միջև առկա լարված աշխատանքային հարաբերություններին: Սակայն, սկսենք նրանից, որ ԱԺ առողջապահության հանձնաժողովի նախագահ Նարեկ Զեյնալյանի հակամարտությունը առողջապահության նախարարի պաշտոնը զբաղեցնող թիմակցի հետ սկսվել է դեռևս Արսեն Թորոսյանից: Դեռ ժամանակին փոխվարչապետ Արարատ Միրզոյանն էր ուզում, որ Արա Մինասյանի փոխարեն «Գր. Լուսավորիչ» ԲԿ տնօրեն նշանակվի իր սանիկը` Նարեկ Զեյնալյանը, սակայն նախարար Թորոսյանը նշանակեց իր մարդուն: Մեկ տարի առաջ էլ Միրզոյան-Զեյնալյան դուետը հնարավորություն ունեցավ «կոնտրուդառ» հասցնել թիմակից նախարարին` Մաշկաբանության և սեռավարակաբանության կենտրոնի օրինագծով: Օրենսդիրը, ի դեմս Զեյնալյանի, թույլ չտվեց, որ կենտրոնը մասնավորեցվի և ԱԺ մեծամասնությունը հավանություն տա դրան: 

Մեկ տարի առաջ Զեյնալյանի՝ պարետատան նիստերին մասնակցելու որոշումից Թորոսյանը դժգոհ էր մնացել, սակայն լռել էր՝ հաշվի առնելով, որ այդ որոշումը կայացվել էր վարչապետի կողմից: Դեռ ավելին, վերջինս համաձայնություն էր տվել, որպեսզի այս ամենից զատ Նարեկ Զեյնալյանը ձևավորի մի մասնագիտական քննարկման հարթակ, որը պետք է պարբերաբար հավաքվի, քննարկումներ անցկացնի և ներկայացնի պարետատուն:

Նարեկ Զեյնալյանը համաձայն չէր Արսեն Թորոսյանի հետ նաև այն հարցում, որ մի քանի երկրում հակածխախոտային օրենքի նախագիծը ազդեցություն է ունեցել, ծխողների թիվը նվազել է։ Նշենք, որ ԱԺ տնտեսական հարցերի մշտական հանձնաժողովում հակածխախոտային օրենքի նախագծի ժամանակ Արսեն Թորոսյանը նշել էր, որ նախագծի մշակման հիմքում դրվել էր Մեծ Բրիտանիայի, Ռուսաստանի, Վրաստանի, Ֆինլանդիայի, Ֆրանսիայի և այլ երկրների՝ ծխելու դեմ պայքարի հաջող փորձը։ Նարեկ Զեյնալյանը, հակադարձելով Արսեն Թորոսյանին, հայտարարել որ, որ օրինակ՝ Վրաստանում ժամը 22։00-ից և 23։00-ից հետո բոլոր ակումբներում մարդիկ ծխում են։ «Ես անձամբ եմ ականատես եղել, այնպես չի, որ օրենքը, եթե կա, ուրեմն գործում է»,- ընդգծել էր Նարեկ Զեյնալյանը։ 

Զեյնալյան-Թորոսյան հարաբերությունների լարվածությունը մեկ անգամ ևս երևան եկավ այն պահին, երբ հարցազրույցներից մեկում Զեյնալյանը մատնանշեց՝ համավարակի թեժ պահին Թորոսյանի արձակուրդ գնալու աննպատակահարմարությունը: «Կարծում եմ, որ արձակուրդ գնալն այս փուլում այնքան էլ նպատակահարմար չէր, քանի դեռ վարակակիրների՝ 100-ից ավելի հաստատված դեպքեր կան, հատկապես, որ առաջիկայում վերսկսվելու են բուհերի, դպրոցների աշխատանքը և նախապատրաստական աշխատանքները վերահսկելու անհրաժեշտություն է լինելու»,-ասել էր Զեյնալյանը։

Ոչ պակաս լարված են Զեյնալյանի հարաբերությունները նաև գործող նախարար Անահիտ Ավանեսյանի հետ: Վերջինիս նշանակման առաջին իսկ օրը պատգամավորը կարծիք հայտնեց, որ ցանկալի կլիներ՝ առողջապահության նախարարը մասնագիտությամբ բժիշկ լիներ՝ ակնարկելով, որ Ավանեսյանը մասնագիտությամբ հեռու է բժշկական ոլորտից։

Նախորդ տարվա մարտի 29-ին ՀՀ ԱԺ առողջապահության հարցերի մշտական հանձնաժողովը հրավիրել էր աշխատանքային քննարկում՝ «ՀՀ-ում դեղերի շուկայում առկա խնդիրները» թեմայով: Քննարկմանը մասնակցել են ՀՀ-ում դեղերի ներկայացուցչությունների ներկայացուցիչներ: ԱԺ առողջապահության հարցերի մշտական հանձնաժողովի նախագահ Նարեկ Զեյնալյանը տեղեկացրել էր, որ նախորդ օրը նույն թեմայով քննարկում է անցկացվել նաեւ դեղերի ներմուծմամբ զբաղվող ընկերությունների ներկայացուցիչների հետ: Քննարկման ընթացքում հնչած գլխավոր մեսիջը թերևս այն էր, որ զուգահեռ ներմուծումը սահմանվել է դեղերի գնիջեցման նպատակով, որը գործնականում չի կիրառվում, ավելին՝ զուգահեռ ներմուծման անվան տակ շուկայում հայտնվում են անորակ դեղամիջոցներ՝ հաճախ նաեւ սպառնալով ազգային անվտանգությանը: Մասնակիցների կարծիքով՝ զուգահեռ ներկրողները հետապնդում են գերշահույթ ստանալու նպատակ: Փաստացի, տեսչական մարմնի ղեկավարը և առողջապահության նախարարը բաց են թողել այս փաստը, այն վրիպել է նրանց ուշադրությունից, ինչի արդյունքում ազգային անվտանգության սպառնալիք է առաջացել: Թեև միտքը, որ համապատասխան կառույցների ղեկավարներն իրենց անգործությամբ սպառնում են ազգային անվտանգությանը, Զեյնալյանինը չէ, սակայն այն հնչել է վերջինիս հանձնաժողովում և որևէ առարկության այս առումով չի արժանացել: Ստացվում է` Անահիտ Ավանեսյանը, ում ղեկավարած կառույցը արդեն իսկ հայտնվել է ՊՎԾ ուշադրության կենտրոնում, հարվածներ է ստանում նաև թիմակիցներից: Սակայն, այստեղ հարց է առաջանում՝ եթե առկա են հստակ տեղեկություններ Հայաստան ներմուծվող կեղծ և անորակ դեղերի մասին, ապա ինչո՞ւ այդ մասին տեղյակ չեն պահվում իրավապահները և ինչո՞ւ է այդ մասին բարձրաձայնվում հրապարակավ հանձնաժողովի նիստում:

Անահիտ Ավանեսյանի մասնակցությունը ԱԺ համապատասխան հանձնաժողովի նիստերին նույնպես հարթ չի անցնում, ինչը կարելի է նկատել հետևյալ տեսանյութում․