Ինչով են աչքի ընկել Գյումրու ՔՊ-ական փոխքաղաքապետերը

Ընդամենը մի քանի ամիս Գյումրիում փոխքաղաքապետեր նշանակվեցին, ովքեր ներկայացնում էին իշխող կուսակցությունը: Բնականաբար, բոլորի համար էլ հասկանալի էր, որ այսպես ասած` կոալիցիոն կառավարման արդյունքում քաղաքի դե-ֆակտո ղեկավարումը իրականացնելու է ոչ թե առավել շատ քանակով ձայներ հավաքած Բալասանյան դաշինքի ներկայացուցիչ քաղաքապետը, այլ հենց ՔՊ-ական քաղաքապետերը: Սակայն, այս ամիսների ընթացքում վերջիններս մեղմ ասած ստվերում են, իսկ նրանցից մեկը՝ Դավիթ Առուշանյանը, արդեն հասցրել է տեղափոխվել այլ աշխատավայր՝ ԱԺ:

Գյումրու փոխքաղաքապետի պաշտոններից մեկը 5-6 ամիս թափուր մնալուց հետո ի վերջո այդ պաշտոնին նշանակվեց Վահագն Մկրտչյանը, ով վարչապետի տիկնոջ՝ Աննա Հակոբյանի մորաքրոջ թոռն է: Վերջինս  մինչ այս քաղաքական գործունեություն չի ծավալել, մասնագիտությամբ ատամնաբույժ է, ավելին՝ Գյումրու ավագանու ՔՊ խմբակցության ամենապասիվ անդամներից է և, բնականաբար, փոխքաղաքապետի պաշտոնում նշանակվելուց հետո էլ դեռևս ոչնչով աչքի չի ընկել:

Փոխքաղաքապետերից մյուսը` Արթուր Պապիկյանը, այս ընթացքում աչքի է ընկել  հերքում տարածելով: Դիցուք ՝ ֆեյսբուքյան իր էջում նա գրել էր. «Hraparak.am-ի՝ «Գյումրու փոխքաղաքապետը մեկ միլիոն դոլարից ավելի սպառողական վարկ է ստացել» հոդվածի առնչությամբ հայտնում եմ, որ 2021 թվականի իմ հայտարարագրի լրացված տվյալներում եղել է վրիպակ․ 546․794․90 դրամ սպառողական վարկի փոխարեն գրվել է 546,179,490․00»։ Միևնույն ժամանակ, հասկանալով, որ բուռն գործունեությամբ հպարտանալու առանձնակի առիթներ չկան, նշել էր, որ 2022 թվականը ծրագրերի իրականացման առումով հաջողակ տարի էր, սակայն պետք է արձանագրենք նաև, որ բազմաթիվ կիսատ մնացած անելիքներ տեղափոխվում են 2023 թվական: Լրահոսից տեղեկանում ենք, որ այս ընթացքում  Պապիկյանը համայնքապետարանի ոլորտային պատասխանատուների հետ այցելել է Ղարիբջանյան խճուղուն հարող տարածք, հանդիպել ապօրինի կառուցված 9 տների բնակիչների հետ։ Հետաքրքիր է, որ Պապիկյանը չի հանդիպել իր թիմակից ավագանու անդամի հետ, ում մոտ նույնպես նկատվել է ապօրինի շինություններ կառուցելու հանդեպ մեծ սեր: 

Ինչ վերաբերվում է ՔՊ նախընտրական գլխավոր խոստումներից մեկին՝ տրանսպորտային ցանցի բարեփոխումներին, ապա պետք է փաստել, որ այդ գործընթացը դեռևս շատ դանդաղ է առաջ ընթանում և առանձնակի հաջողություններ այս առումով չկան: