Մութ ամպեր՝ Փաշինյանի թիմակիցների գլխավերևում. ինչ է բացահայտել Հաշվեքննիչ պալատը

Ազգային ժողովը օրերս քննարկելու է Հաշվեքննիչ պալատի 2022 թվականի աշխատանքի ամփոփ արդյունքները: Ըստ այդմ, հաշվետվությունը 34 էջից է կազմված։ 2022 թվականի գործունեության ընթացքում կառույցն իրականացրել է 54 հաշվեքննություն, որից 40-ը՝ 2022 թվականի գործունեության շրջանակներում։ Իրականացված 11 հաշվեքննության արդյունքներով Հաշվեքննիչ պալատի կողմից հաստատվել են եզրակացություններ և դրանք ուղարկվել Ազգային ժողով, կառավարություն և համապատասխան մարմիններ։ 18 գերատեսչություններում իրականացվել են հաշվեքննություններ, որոնցիցի 13-ում արձանագրվել են 138 անհամապատասխանություններ։ 6 գերատեսչությունում արձանագրվել է 26 խեղաթյուրում, որի ընդհանուր գումարը կազմել է 2 մլրդ 651 մլն դրամ։

Դիցուք՝  հաշվեքննիչ պալատն ուսումնասիրություններ է կատարել ՀՀ տարածքային կառավարման և ենթակառուցվածքների նախարարությունում Ճանապարհային ցանցի բարելավման դրամաշնորհային և վարկային ծրագրերի նկատմամբ համապատասխանության վերաբերյալ: Ըստ այդմ, արձանագրվել է, որ Եվրոպական ներդրումային բանկի աջակցությամբ իրականացվող Վանաձոր-Ալավերդի-Վրաստան միջպետական նշանակության ճանապարհի վերականգնման և բարելավման ծրագրի շրջանակներում 19 մլրդ 36 մլն դրամ գումարի կապիտալ ծախսումները չեն ավելացվել ասֆալտբետոնյա ճանապարհների հաշվեկշռային արժեքին: Եվ դրանով խախտվել է պարտադիր պահանջի կատարումը: Նույն ուսումնասիրության արդյունքներով այդ ծրագրի շրջանակներում 6 մլրդ 171 մլն դրամի ասֆալտբետոնյա ծածկույթի վերին շերտի աշխատանքներն ընդունվել և վճարվել են առանց ավտոմոբիլի անիվի կառճումը ծածկից կամ ծածկի անողորկությունը ստուգելու: Այլ խնդիրներ ևս առկա են:

Հաշվեքննիչ պալատը հանրայնացրել է Առողջապահության նախարարության 2022 թվականի պետական բյուջեի տարեկան մուտքերի ձևավորման և ելքերի իրականացման մասին եզրակացությունը: Հաշվեքննությունն ընդգրկող ժամանակաշրջանը 2022 թվականի հունվարի 1-ից 2022 թվականի դեկտեմբերի 31-ն է, կատարման ժամկետը՝ 2023 թվականի հունվարի 9-ից 2023 թվականի ապրիլի 30-ը ներառյալ: Եզրակացությամբ արձանագրվել է, որ 2022 թ.-ին, բացի տարեկան պետական բյուջեի ԱՆ համար նախատեսված շուրջ 117 միլիարդ 808 միլիոն 508 հազար դրամ գումարը, կորոնավիրուսային վարակի կանխարգելման, վերահսկման, բուժման և այլ համալիր միջոցառումների իրականացման շրջանակներում նախարարության ներկայացմամբ կառավարության 5 որոշումներով նախարարությանը հատկացվել է ևս 10 միլիարդ 466 միլիոն 626 հազար դրամ: Հաշվեքննությունից պարզ է դառնում, որ չնայած այն հանգամանքին, որ բժշկական ծառայությունների գների հաշվարկման մեթոդաբանությունը հաստատվել է դեռ 2019 թվականին, սակայն առ հաշվեքննության ավարտի օրն այն չի կիրառվում, նախարարությունը չի ապահովել նաև կառավարության 2004 թվականի մարտի 4-ի N 318 Ն որոշմամբ սահմանված բժշկական օգնության և սպասարկման գների հաստատման կարգի պահանջների կատարումը, ինչի հետևանքով բացակայում են ոլորտում ծառայությունների համար կիրառվող գների իրավամեթոդաբանական հիմնավորումները:

Հիշեցնենք, որ մինչ այս էլ Հաշվեքննիչ Պալատը խախտումներ էր արձանագրել առողջապահության նախարարությունում, որոնք վերաբերվում էին արդեն նախկին նախարար Արսեն Թորոսյանի ղեկավարման շրջանին:

Բացի այդ, հաշվեքննիչ պալատը պարզել է, որ ՀՀ ոստիկանության պարեկային ծառայության համար էլեկտրոնային աճուրդի միջոցով գնում կատարելու արդյունքում 5 կիսաճտքավոր կոշիկներ և 6 ամենօրյա կոշիկներ չափաբաժիններով մասնակցել և հաղթող է ճանաչվել «ԷԼԱԱՄՈԴԱ» ՍՊԸ-ն: Միայն 6 /ամենօրյա կոշիկներ/ չափաբաժնով մյուս մասնակիցն է հանդիսացել՝ «Աշոտ Ղարագյոզյան» ՍՊԸ-ն: Պայմանագիրը կնքվել է 17.12.2021թ., պայմանագրի գինը՝ 103,514,400 դրամ, որի շրջանակներում նախատեսվում է մատակարարել 1600 զույգ կիսաճտքավոր և 1600 զույգ ամենօրյա կոշիկներ: Ինչպես պարզվում է, սակայն, մատակարարման ապրանքների տեխնիկական բնութագրերում անհամապատասխանություններ են եղել, մասնավորապես, թեև նկարագրություն տրված եղել է, դրանք եղել են վերացական, հստակեցված չի եղել, թե կոնկրետ ինչ կաշվից, ինչ մետաղից պետք է լինեն կոշիկները, օգտագործման համար կոնկրետ քանի տարի ժամկետն է սահմանվել որպես ողջամիտ, ինչ է ասել կայուն և այլն, ինչն էլ Հաշվեքննիչ պալատի տեսադաշտում է հայտնվել:

Հաշվեքննիչ պալատը խնդիրներ է հայտնաբերել «Հայանտառ» ՊՈԱԿ-ում: «Ժողովուրդ» օրաթերթը պաշտոնական փաստաթղթերից տեղեկացավ, որ ՊՈԱԿ-ի կողմից կնքված 9 վարձակալության պայմանագրերում չի պահպանվել անտառների վարձավճարների սահմանված նվազագույն չափը: Այս հանգամանքը հանգեցրել է մի իրավիճակի, որ 2019-2020 թվականների ժամանակահատվածում 14 մլն դրամի վարձավճարներ չեն գրանցվել: Այլ խախտումներ եւս կան. բացակայում են ՊՈԱԿ-ի «Մեկ անձից գնում» ընթացակարգի համաձայն կատարված գործարքների հաշվետվությունները: Նաեւ մատուցվել են այնպիսի ծառայություններ, որոնք նորմատիվ իրավական ակտերի կանոններով չեն եղել: Նշենք, որ այս ընթացքում ՊՈԱԿ-ի տնօրեն Վահե Մացակյանն արդեն իշխանական թիմի ներկայացուցիչ էր: Նա 2019 թվականի սեպտեմբերի 24-ին նշանակվել է «Հայանտառ» ՊՈԱԿ-ի տնօրենի պաշտոնակատար, 2020 թվականի ապրիլի 8-ին՝ «Հայանտառ» ՊՈԱԿ-ի տնօրեն։

ՀՀ Հաշվեքննիչ պալատը խախտումներ է հայտնաբերել էկոնոմիկայի նախարարության կողմից գյուղատնտեսական կենդանիների պատվաստումների ժամանակ։ Խախտումներ են հայտնաբերվել նաեւ գյուղատնտեսական վարկերի տոկոսադրույքների սուբսիդավորման, գյուղատնտեսական հումքի գնման կամ ներմուծման նպատակով ագրովերամշակման ոլորտին տրամադրվող վարկերի տոկոսադրույքների սուբսիդավորման հարցում։

Ինչպես տեսնում ենք՝ խախտումները արձանագրվել են, սակայն, ոչ պատկան կառույցներն են զբաղվում դրանց հետագա ուսումնասիրությամբ, ոչ էլ Նիկոլ Փաշինյանն է խոստացածի պես ուշադրության կենտրոնում պահում այս դրվագները, էլ չենք խոսում թիմակիցներին պատժելու մասին...