Հեղափոխականների մոռացված խոստումները. ովքեր են հարվածել վարորդների գրպանին

2018 թվականի Թավշյա հեղափոխության օրերին Նիկոլ Փաշինյանի և նրա թիմի հաջողության մեջ զգալի ավանդ էին ունեցել գյուղացիները, տաքսիստները, առևտրականները, բնապահպանները և այլն: Կարելի է ասել, որ հենց այս այսպես կոչված՝ հասարակ ժողովրդի ներկայացուցիչներն էլ ապահովեցին Փաշինյանի հաջողությունը փողոցում, իսկ այնուհետև ամրագրեցին այն դե-յուրե ընտրատեղամասերում: Բնականաբար, նրանք ունեին սպասելիքներ և առաջին հերթին այն պատճառով, որ այդպիսի սպասելիքների ակնկալիք ներշնչել էր ինքը՝ Փաշինյանն, իր խոստումներով: Սակայն, հեղափոխությունից հինգ տարի անց պետք  է փաստենք, որ հենց հանրության այս սեգմենտն է ամենաշատը խաբվել և քցվել հեղափոխականների կողմից:

Քցվածների թվում էին նաև տաքսիստները և, ընդհանրապես, վարորդները, որոնք հեղափոխության օրերին Փաշինյանի համար ճանապարհներ էին փակում: Ինչպե՞ս նրանց շնորհակալ եղավ Փաշինյանը: Նախ նշենք, որ Փաշինյանը խոստանում էր տաքսիստներին ազատել հարկերից, նրանց համար աշխատելու և երկու կոպեկ փող վաստակելու արժանավայել պայմաններ ստեղծել: Արդյունքում՝ ունեցանք տաքսիստների լիցենզավորման մասին օրենք, բալային համակարգի մասին օրենք, ԱՊՊԱ-ի թանկացում, ինչն ուղղակիորեն հարվածեց տաքսիստների գրպանին:

Այժմ դիտարկենք, թե ով ինչպես է հարվածել վարորդների գրպանին: Առաջին հարվածը, անշուշտ, այսպես կոչված՝ բալային համակարգի ներդրումն էր, որի գլխավոր լոբբիստներից էր ՔՊ-ական պատգամավոր Արմեն Խաչատրյանը:

 2018 թ․ սեպտեմբերի 18-ին ֆեյսբուքյան ուղիղ եթերի ժամանակ (5:38 րոպե) Փաշինյանը հայտարարել էր, որ շատ մոտ են ՀՀ տարածքում և Երևանում անհատ տաքսիների վարորդներին բոլոր տեսակի հարկերից ազատելուն։ Ըստ վարչապետի՝ եթե վարորդներն ազատվեն հարկերից, դա կբերի սակագների նվազման և կնպաստի տրանսպորտի խնդիրների կարգավորմանը։ «Կռացած երթևեկելուց ազատվելու կարևոր հանգրվաններից մեկը դա կդառնա»,— հայտարարել էր Փաշինյանը։ Տեղեկացնենք, որ անհատ տաքսու վարորդներն իսկապես ազատված են նախկինում սահմանված՝ Երևան քաղաքում 12000, իսկ մարզերում 8000 դրամ արտոնագրային վճարներ վճարելու պարտավորությունից, սակայն լիցենզավորման մասին օրենքի 43-րդ հոդվածի համաձայն՝ վերջիններիս գործունեությունը, այնուամենայնիվ, ենթակա է պարտադիր լիցենզավորման։

 ՀՀ տարածքային կառավարման և ենթակառուցվածքների նախարարության առաջարկած «Ավտոմոբիլային տրանսպորտի մասին» ՀՀ օրենքում փոփոխություն և լրացումներ կատարելու մասին», «Վարչական իրավախախտումների վերաբերյալ» Հայաստանի Հանրապետության օրենսգրքում լրացում կատարելու մասին», «Պետական տուրքի մասին» Հայաստանի Հանրապետության օրենքում լրացում կատարելու մասին», «Լիցենզավորման մասին» Հայաստանի Հանրապետության օրենքում լրացում կատարելու մասին» Հայաստանի Հանրապետության օրենքների նախագծերի փաթեթը նույնպես զգալի հարված է հասցրել վարորդների գրպանին: Դրանով նախատեսվում է, որ օդանավակայանների տարածքում աշխատելու իրավունք ստանալու համար տաքսի ծառայություններ մատուցողները պետք է Ա տիպի լիցենզիա ստանան, որի դիմաց պետք է տարեկան 200 000 դրամ պետտուրք վճարեն: Ընդ որում, կարգավորումը վերաբերում է ինչպես տաքսի ծառայություն մատուցող կազմակերպություններին, այնպես էլ անհատ ձեռներեցներին: Նախարարի տեղակալ էր այդ ժամանակ Քրիստինե Ղալեչյանը:

ՀՀ տարածքային կառավարման և ենթակառուցվածքների փոխնախարար Արմեն Սիմոնյանն  ԱԺ–ում ավետել էր, որ կառավարությունը փորձում է օրենքով կարգավորել Հայաստանում առցանց տաքսիների գործունեությունը։ Ինչը նույնպես հարվածելու է վարորդների գրպանին:

Հայաստանի ավտոապահովագրողների բյուրոն որոշում է կայացրել վերանայել ԱՊՊԱ-ի արժեքը, ինչի արդյունքում կբարձրացվեն բազային սակագները, ինչպես նաև փոփոխություններ կկատարվեն ապահովագրության արժեքի հաշվարկման համակարգում: Բյուրոյի ղեկավարը Արմեն Նուրբեկյանն է:

Առողջապահության նախկին նախարար, ԱԺ պատգամավոր, «Քաղաքացիական պայմանագիր» խմբակցության անդամ Արսեն Թորոսյանն էլ արդեն խորհրդարանում է որոշել հարածել քաղաքացիների գրպանին, հենց նրա հուշումով և լոբբինգի արդյունքում է առաջ մղվել ավտոմեքենաների ապակիների մգեցված թաղանթապատումը հանելու մասին որոշումը, որին չենթարկվելու դեպքում վարորդները կտուգանվեն կլորիկ գումարներով: