«Անտառային մաֆիայի» օդերը փակելու խոստումը մնաց օդում

Այսօր ԱԺ-ում անդրադառնալով ապօրինի ծառահատումների խնդրին՝ շրջակա միջավայրի   նախարար Հակոբ Սիմիդյանն ասաց, որ թվերը վատը չեն։ «2018 թվականին 3072 հատ ծառ է հատվել, սրանք արձանագրված թվերն են, 2019 թվականին այս թիվը հասել է 15 հազարի։ 2021 թվականին կազմել է 11 հազար, իսկ 2022 թվականին 6200։ Այսինքն՝ եթե դինամիկան տեսնենք՝ 2018 թվականից հետո բարձրացել է, հետո նվազող տրամաբանություն ունի»,- ասաց նախարարը։

Ըստ նրա՝ նոր ծառայության միջոցով կկարողանան անտառածածկ տարածքների նկատմամբ 24-ժամյա հսկողություն սահմանել։ «Մենք հիմա մեր ամբողջ էներգիան փորձում ենք դնել, որ պահպանությունը պատշաճ իրականացնենք, բայց այն ինստիտուցիոնալ համակարգը, որն այս պահին որպես գործիք ունենք, համոզված եմ, բավարար չէ, որովհետեւ 24 ժամից 9 ժամն է աշխատանքային։ Դրա համար ձեռնամուխ ենք եղել նոր ծառայության հիմնմանը, որը կփոխի իրավիճակն ամբողջությամբ»,- ասաց նա։

2019 թվականին Նիկոլ Փաշինյանը հայտարարում էր, որ իրենք գիտեն այսպես կոչված` անտառային մաֆիայի տեղը և օդերը արագ փակելու են: Այժմ ստացվում է, որ ոչ միայն օդերը չեն փակել, այլ այս ընթացքում վերը նշված մաֆիան ծաղկում և բարգավաճում է: Ավելին` այդ մաֆիայի դեմ պայքարելու համար հավելյալ միջոցներ են անհրաժեշտ, ասել է թե՝ հավելյալ գումարներ պետական բյուջեից: Ի՞նչ է սա, եթե ոչ բացահայտ ձախողում, սակայն ոչ շրջակա միջավայրի նախարարը, ոչ էլ առավել ևս վարչապետը չեն ցանկանում այդ ձախողման պատասխանատվությունը իրենց վրա վերցնել...