ՄԻՊ Անահիտ Մանասյանի գլխավոր «դարդը» Ստամբուլյան կոնվենցիա՞ն է

Մայիսի 30-ին Լորդ Նիկ Հերբերտի այցը Հայաստան մնաց գրեթե աննկատ, մինչդեռ նա «Գլոբալ հավասարության» խորհրդի նախագահն է և ԼԳԲՏ իրավունքների հարցերով Մեծ Բրիտանիայի վարչապետի հատուկ բանագնացը: Հանդիպելով ՀՀ ՄԻՊ Անահիտ Մինասյանի, ԱԺ պատգամավորների, ՀՀ կառավարության և քաղաքացիական հասարակական կազմակերպությունների ներկայացուցիչների հետ՝ Հերբերտը քննարկել է մարդու իրավունքների պաշտպանությանն առնչվող հարցեր։

Հետաքրքիր է, որ հանդիպմանը կառավարիչի նորաթուխ օմբուդսմեն Անահիտ Մինասյանն առաջարկել է համապարփակ քննարկել «Ստամբուլյան կոնվենցիան», սակայն, ըստ երևույթին, դա սկսել է անել ոչ թե հայ հասարակության, այլ Հայաստան ժամանած բանագնաց Նիկ Հերբերտի և Հայաստանում Մեծ Բրիտանիայի դեսպան Ջոն Գալագերի հետ, վերջինս միացել էր «Նոր սերունդ» մարդասիրական հասարակական կազմակերպության կողմից հոմոֆոբիայի, բիֆոբիայի, տրանսֆոբիայի և ինտերֆոբիայի դեմ պայքարի միջազգային օրվա կապակցությամբ կազմակերպված միջոցառմանը։

Ուշագրավ է, որ երբ Անահիտ Մանասյանին խնդրում են դիրքորոշում հայտնել դիցուք՝ այսպես կոչված անկլավների, Արցախի հարցի կարգավորման ընթացքում իշխանությունների որդեգրած քաղաքականության և հնչեցրած հայտարարությունների մասով, ապա նա պնդում է, որ չունի որևէ դիրքորոշում: Այսինքն, ստացվում է, որ ՄԻՊ-ը ունի դիրքորոշում միայն այն հարցերում, որոնք ուղղակիորեն չեն հակասում Փաշինյանի և նրա թիմի վարած քաղաքական գծին, օրինակ՝ ինչպես Ստամբուլյան կոնվենցիայի դեպքում: Մյուս բոլոր դեպքերում մարդու իրավունքների պաշտպանը նախընտրում է անշառ դիրքորոշում որդեգրել, այն է՝ չորդեգրել և ոչ մի դիրքորոշում: