Ռուսաստանը կարող է հարձակում գործել Շվեդիայի վրա

Շվեդիայի խորհրդարանի պաշտպանության հանձնաժողովը խոստովանում է, որ Ռուսաստանը կարող է հարձակվել երկրի վրա։ Այս մասին ասվում է կոմիտեի զեկույցում, հայտնել է շվեդական SVT հեռուստաալիքը։

Այսօր հրապարակված խորհրդարանական զեկույցում նշվում է, որ չնայած ռուսական զորքերը ներգրավված են Ուկրաինայում պատերազմին, Շվեդիայի վրա հարձակումները չեն կարող բացառվել:

«Ռուսաստանը նաև ավելի է իջեցրել ռազմական ուժի կիրառման շեմը և ցուցաբերում է քաղաքական և ռազմական ռիսկերի դիմելու բարձր հակվածություն։ Շվեդիայի դեմ Ռուսաստանի՝ օդային, ռազմածովային, հեռահար կամ միջուկային գործողություններ իրականացնելու հնարավորությունները մնում են անփոփոխ։

Հեռուստաալիքի տվյալներով՝ զեկույցի հեղինակներից մեկն այն անվանել է «հստակ ազդանշան Ռուսաստանի համար»։ Զեկույցը վերնագրված էր Allvarstid («Խստության ժամանակը»): SVT-ի աղբյուրները նշում են, որ սա ուղղակի հղում է Երկրորդ համաշխարհային պատերազմի ժամանակաշրջանին։

Զեկույցը նախանշում է Շվեդիայի պաշտպանության նոր դոկտրինը՝ հիմնված ՆԱՏՕ-ի անդամակցության վրա:

Շվեդիայի ռազմական հետախուզության և անվտանգության ծառայության ղեկավար Թոմաս Նիլսոնը կարծում է, որ Ռուսաստանը տարբեր խոչընդոտներ է ստեղծում Շվեդիայի՝ Հյուսիսատլանտյան դաշինք մտնելու համար։

ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ երաշխիքներ չկան, որ Շվեդիան կմիանա դաշինքին Վիլնյուսում դաշինքի գագաթնաժողովում, որը տեղի կունենա հուլիսի 11-12-ը։