«Ռուսաստանը ստիպված կլինի միջուկային հարված հասցնել Եվրոպային». ՌԻԱ Նովոստիի հոդվածը

«Մեր նախագահը ինչ-որ պահի պետք է պրոյեկտի միջուկային զենք օգտագործելու իր վճռականությունը»,- գրում է ռուս քաղաքագետ և տնտեսագետ, Արտաքին և պաշտպանական քաղաքականության խորհրդի նախագահության պատվավոր նախագահ Սերգեյ Կարագանովը «Ընտրություն չի մնում։ Ռուսաստանը ստիպված կլինի միջուկային հարված հասցնել Եվրոպային» հոդվածում, որը հրապարակել է ՌԻԱ Նովոստին։

Սա վերջին երկու շաբաթվա ընթացքում երկրորդ հոդվածն է, որտեղ Կարագանովն անդրադառնում է այն իրավիճակներին, որոնցում միջուկային հարվածներն ընդունելի են։ Առաջինը հունիսի 13-ին հրապարակվել է «Պրոֆիլ» և «Ռուսաստանը գլոբալ հարցերում» հրատարակություններում և կոչվում է «Միջուկային զենքի կիրառումը կարող է փրկել մարդկությանը համաշխարհային աղետից»։

Առաջին հոդվածում Կարագանովը կիսում է իր կարծիքը, որ «միջուկային զենքի հայտնվելը Ամենակարողի միջամտության արդյունքն է, որը սարսափեց՝ տեսնելով, որ մարդիկ (եվրոպացիները և նրանց միացած ճապոնացիները) սանձազերծեցին երկու համաշխարհային պատերազմներ, որը տասնյակ միլիոնավոր կյանքեր խլեց, և մարդկությանը հանձնեց Արմագեդոնի զենքերը»։ Քաղաքագետը կարծում է, որ վերջին 75 տարիների ընթացքում «հարաբերական խաղաղությունը հիմնված է» այդ զենքից վախի վրա, սակայն այժմ այդ վախը վերացել է, և այն «պետք է վերականգնել, այլապես մարդկությունը դատապարտված է»։

«ՌԻԱ Նովոստի»-ի հոդվածը պարունակում է նմանատիպ փաստարկներ. Կարագանովը կրկին խոսում է միջուկային զենքի ի հայտ գալու «սուպերգաղափարի» մասին՝ «ապոկալիպսիսի զենքը, որը Տեր Աստվածը հանձնեց մարդկանց, որպեսզի այն անընդհատ մարդկանց աչքի առաջ լինի և վախեցնի նրանց»։ «Եվ հիմա մարդիկ կորցրել են իրենց վախը»,- նույն եզրակացությանն է հանգում քաղաքագետը, ինչ առաջին հոդվածում։

Նա հույս է հայտնում, որ Ռուսաստանը երբեք միջուկային զենք չի օգտագործի։ «Բայց այն, որ մենք հրաժարվում ենք դրա օգտագործման հնարավորությունից բոլոր իրավիճակներում, բացառությամբ պետության համար մահացու վտանգի դեպքում, ինձ անլուրջ է թվում», - գրում է Կարագանովը:

Նրա խոսքով՝ եթե Ռուսաստանի հակառակորդները «խելքի չգան», ապա երկրի ռազմաքաղաքական ղեկավարությունը ստիպված կլինի «սարսափելի բարոյական ընտրություն» կատարել և «դժվար որոշում» կայացնել։ «Բայց ես կարծում եմ, որ մեր նախագահը ինչ-որ պահի պետք է պրոյեկտի միջուկային զենք օգտագործելու իր վճռականությունը»,- իր կարծիքը կիսում է քաղաքագետը։