Ֆեոդալական բարքերի «վերածնունդը» Նոր Հայաստանում

ֆեոդալներին (այսպես էր Փաշինյանը անվանում ՀՀԿ-ական մարզպետներին և քաղաքապետերին) թույլ է տալիս առանց բացառության ամեն բան, միայն թե վերջիններս անխոնջ կատարեն ՀՀԿ ցուցումները և որոշումները:

Հեղափոխությունից հետո տպավորություն է ստեղծվում, որ ՔՊ-ն այս հարցում ևս որոշել է հետ չմնալ ՀՀԿ-ական ավանդույթներից: Դիցուք՝ անցած տարվա նոյեմբերի 21-ին Մեղրիի այն ժամանակվա համայնքապետ Բագրատ Զաքարյանի եղբայրն ու զարմիկները ծեծել էին քաղաքացի Արթուր Աթանեսյանին։ Պատճառն էլ այն էր, որ Աթանեսյանին ստիպում էին աշխատանքից ազատվելու դիմում գրել, բայց նա չէր համաձայնվում։ Հարուցվել էր քրեական գործ, բայց հետագայում գործը կարճվեց, քանի որ տուժող Արթուր Աթանեսյանը հետ էր վերցրել բողոքը։ Երեկ էլ հայտնի դարձավ, որ արդեն հասցրել է աչքի ընկնել Մեղրիի համայնքապետի տեղակալը; Aravot.am-ի տեղեկություններով, Մեղրի համայնքի ղեկավարի տեղակալ Լեւոն Միրզոյանը ծեծել է Մեղրիի բնակիչ Վանո Սարգսյանին։  Ըստ մեր աղբյուրների, Ջրօգտագործողների ընկերության Մեղրիի մասնաճյուղի աշխատակիցները փորձել են տարածաշրջանի գյուղեր գնացող ոռոգման ջրատարի խողովակներն անցկացնել Վանո Սարգսյանի հողամասի տարածքով։ Վերջինս փորձել է պարզել, թե ինչո՞ւ հենց իրեն պատկանող սեփական հողատարածքով, ու նրան հաջողվել է «լեզու գտնել» ջրօգտագործողների հետ։ Սակայն, դրանից հետո Վանո Սարգսյանին է հանդիպել Մեղրի համայնքի ղեկավարի տեղակալ Լեւոն Միրզոյանը՝ Սարգսյանից փորձել պարզել, թե ինչո՞ւ է ընդդիմանում  համայնքապետարանի կողմից իրականացվող ծրագրերին։   

Ամիսներ առաջ լուրեր էին տարածվել, որ  այն ժամանակ դեռ Արարատի մարզպետի պաշտոնը զբաղեցնող Գարիկ Սարգսյանը ծեծել էր տվել իրեն արտահերթ սպասարկելուց հրաժարված վարսավիրին:

Դրան հաջորդել էր տեղեկությունը, որ Օձունի համայնքապետ Արսեն Տիտանյանին Լոռու մարզպետարանում 10 հոգով, նրանց թվում՝ մարզպետ Արամ Խաչատրյանը, ծեծի են ենթարկել։ 

Արարատի համայնքապետ Ասլան Ավետիսյանը աշխատանքից ազատել է Երասխի գյուղապետին, մինչդեռ վերջինս այդ քայլը համարում է ապօրինի և պնդում, որ իրական պատճառն այն էր, որ ինքը պատրաստվում էր ջրի երես հանել Ավետիսյանի կողմից կատարված խախտումները:

ԶԼՄ-ից «Իրավունք»-ը գրել էր, որ Արտաշատ խոշորացված համայնքի ՔՊ-ով առաջադրված եւ ընտրված համայնքապետ Կառլեն Մկրտչյանը, ով մինչ ավագանու ընտրությունները արտաշատցիների շրջանում ուներ «մեր տղա» համբավը, բազմելով համայնքապետի աթոռին, ստանձնելով 39 համայնքի մլրդ. դրամի հասնող բյուջեի ղեկավարությունը, ըստ նշված լրատվամիջոցի աղբյուրի, դարձել է ինքնահավան, որոշումներ է կայացնում միայն իր ու մերձավորների շահերից ելնելով: Իսկ ավագանու նիստերից մեկի ժամանակ վերջինս սահմանափակել է ՀԿ-ների ղեկավարների մուտքը եւ զրկել ձայնի իրավունքից, ավելին, մեղմ ասած, վռնդել է դուրս, ինչը բարձրաձայնել է նաեւ ՀԿ-ի ղեկավարներից մեկը։

Նիկոլ Փաշինյանի քավոր, Տավուշի մարզպետ Ղալումյանը Տավուշում գրեթե ֆեոդալական կարգեր է հաստատել և, բնականաբար, դա անգամ ՔՊ-ականների սրտով չէ, ուստի նրանք փորձում են հակակշռել վերջինիս: Սա հանգեցրել է նրան, որ Տավուշում ՔՊ-ականների միջև լարված հարաբերություններ են հաստատվել և բավական լուրջ պայքար է մղվում յուրայիններին տարբեր պաշտոնների նշանակելու և այդ միջոցով սեփական դիրքերը ամրապնդելու համար:

Դիլիջանի համայնքապետ Դավիթ Սարգսյանը բավականին ոչ միանշանակ պատմության կիզակետում է հայտնվել: Մամուլը ահազանգում է, որ Սարգսյանը որոշումներ է ընդունել, որով համայնքի հողերը շուկայականից ցածր գներով օտարել է Երեւանի բնակիչների, երբ Դիլիջանի շատ բնակիչներ տուն կառուցելու համար հողամաս չունեն։ Դիլիջանի համայնքապետարանի ինտերնետային կայքը տեղեկացնում է, որ 2022թ․ ապրիլի 18-ին Դ․ Սարգսյանը որոշում է ընդունել քաղաքացի Սուրեն Մանուկյանին աճուրդային կարգով հողամաս օտարելու մասին։ Դիլիջան համայնքի ղեկավարի 2022թ. մարտի 18-ի թիվ 149-Ա որոշմամբ 2022թ. ապրիլի 18-ին աճուրդի է ներկայացվել Դիլիջան համայնքի սեփականությունը հանդիսացող «Բնակավայրերի հողերից» 690.9քմ հողամաս, Դիլիջանի Սարալանջի փողոցի թիվ 40/2 հասցեում բնակելի տան կառուցման նպատակով, 4836300 դրամ մեկնարկային գնով, աճուրդում 4836300 դրամ առավելագույն գնով հաղթել է Երեւանի Կոմիտասի 7/2 շենքի բնակիչ Սուրեն Մանուկյանը, այդ մասին հողամասերն աճուրդային կարգով օտարող հանձնաժողովի կողմից կազմվել է արձանագրություն: 

Մեկ այլ օրինակ՝ օրեր առաջ Սպիտակի խոշորացված համայնքի Սարամեջ բնակավայրի վարչական ղեկավարի ամուսնուն ծեծի ենթարկելու կասկածանքով ձերբակալված Գոռ Նիկողոսյանը ազատ է արձակվել, նրան այս պահի դրությամբ մեղադրանք առաջադրված չէ: Հիշեցնենք՝ մայիսի 18-ին, կեսգիշերին մոտ, Սպիտակի բժշկական կենտրոն բուժօգնության էր դիմել 42-ամյա Էդգար Հովհաննիսյանը, որը Սպիտակ խոշորացված համայնքի Սարամեջ բնակավայրի վարչական ղեկավար Թամարա Մինասյանի ամուսինն է: Բժշկական կենտրոնում ստանալով առաջին բուժօգնություն՝ տղամարդը դուրս էր գրվել, սակայն հաջորդ օրը կրկին դիմել էր բուժօգնության, այնուհետ տեղափոխվել Երեւան, նրա մոտ ախտորոշվել էր ուղեղի ցնցում: Տեղի ունեցած վիճաբանություն-ծեծկռտուքի հետ կապված ձերբակալվել էր այնուհետև ազատ էր արձակվել Սպիտակ խոշորացված համայնքի ղեկավարի որդին՝ Գոռ Նիկողոսյանը:

Գյումրիում շաբաթներ առաջ տեղի ունեցած խուլիգանության ու հափշտակության գործով կալանավորվածներից մեկը ավագանու «Քաղաքացիական պայմանագիր» խմբակցության անդամ Աղասի Մաթևոսյանն է։  Ավելորդ է անգամ նշել, որ ավագանու անդամի անունը մինչ այս դեպքը որևէ այլ, առավել կառուցողական գործողության համատեքստում չի հիշատակվել և թերևս միայն այս դրվագից հետո գյումրեցիների մի ստվար հատված տեղեկացավ, որ համայնքապետարանում նման անուն ազգանունով ավագանի էր աշխատում:

Մամուլում տարածված լուրերին համաձայն՝ օրեր առաջ գիշերը Թաիրով գյուղում գործող «Կալիֆորնիա» գիշերային ակումբում միջադեպ է եղել: Փարաքար խոշորացված համայնքի ղեկավար Դավիթ Մինասյանը եւ Գոռ անունով ևս մեկ անձ իրենց ընկերների հետ միասին, գտնվելով ոգելից խմիչքի ազդեցության տակ, անհարկի վիճաբանել են նշված ակումբում գտնվող անձանց հետ, հնչեցրել սեռական բնույթի հայհոյանքներ, բացահայտ անհարգալից վերաբերմունք դրսևորել հաճախորդների, նշված ակումբի աշխատակիցների նկատմամբ, բռնություն գործադրել հաճախորդների նկատմամբ և ապակյա բաժակներով հարվածել պատերին, կոտրել ակումբի ապակիները, այնուհետև նույն վարքագիծը դրսևորել ակումբից դուրս ճանապարհի երթևեկելի հատվածում, խափանել են ավտոմեքենաների բնականոն երթևեկությունը: Մինչ այս պահը, սակայն, որևէ մեկը որևէ կարգավիճակ չունի այս գործով, իսկ դա նշանակում է, որ, կարծես թե, փորձ է արվում ջրել աղմկահարույց դրվագը: