Ադրբեջանը ՄԻԵԴ որոշումը չի կատարի. երբեմն-երբեմն՝ հիվանդների համար կբացի ճանապարհը

«Ի տարբերություն ՄԱԿ-ի դատարանի որոշման` ՄԻԵԴ որոշումը հատվածական է և վերաբերվում է միայն հիվանդների և անապաստանների տեղափոխմանը։ Ադրբեջանը ոչ թե կկատարի ՄԻԵԴ որոշումը, այլ՝ ըստ իր հայեցողության, երբեմն- երբեմն հիվանդների համար կբացի ճանապարհը, ինչպես մինչ այժմ անում է»,-այս մասին ԼՈՒՐԵՐ.com-ի հետ զրույցում ասաց իրավապաշտպան Ավետիք Իշխանյանը` անդրադառնալով այն որոշմանը, որ սույն թվականի հուլիսի 12-ին Մարդու իրավունքների եվրոպական դատարանը, ուսումնասիրելով Լաչինի միջանցքն ապաշրջափակելու առնչությամբ Ադրբեջանի նկատմամբ միջանկյալ միջոցներ կիրառելու ՀՀ կառավարության պահանջը, որոշել է վերահաստատել իր՝ 2022 թվականի դեկտեմբերի 21-ին կայացրած որոշումը, այն է՝ պարտավորեցնել Ադրբեջանին ձեռնարկել բոլոր անհրաժեշտ և բավարար միջոցները՝ ապահովելու «Լաչինի միջանցքով» Հայաստանում բժշկական օգնություն ստանալու կարիք ունեցող ծանր հիվանդ անձանց տեղաշարժը, ինչպես նաև ճանապարհին անապաստան մնացած կամ ապրուստի միջոցների կարիք ունեցող անձանց անվտանգ տեղաշարժը:

«Ադրբեջանը Եվրոպայի խորհրդի անդամ պետություն է, ըստ այդմ, պարտավոր է կատարել ՄԻԵԴ-ի կայացրած որոշումները։ Սա իհարկե, տեսականորեն։ Նախ, Եվրոպայի Խորհրդի անդամ դարձած երկրները պետք է համապատասխանեն ԵԽ կողմից սահմանված ժողովրդավարական չափանիշներին։

Արդյոք Ադրբեջանը ժողովրդավարական երկիր է։ Իհարկե՝ ոչ։ Ուղղակի, 90-կաններին ԵԽ-ն կայացրեց քաղաքական որոշում՝ կազմ ընդունելով ԵԽ չափանիշներին չհամապատասխանող երկրներ՝ Հայաստան, Վրաստան, Մոլդովա, Ռուսաստան և որքան էլ զարմանալի թվա՝ բռնապետական Ադրբեջան։ Այնպես որ, Ադրբեջանը, լինելով ԵԽ անդամ, որպես կանոն, չի կատարում ՄԻԵԴ որոշումները»,- ասաց մեր զրուցակիցը և հավելեց` ավելին, եթե Ադրբեջանը չի կատարում ՄԱԿ-ի դատարանի կայացրած որոշումը, ապա ՄԻԵԴ-ինն առավել ևս չի կատարի։ 

Իշխանյանի  խոսքով`  ՄԱԿ-ի դատարանի որոշումը չկատարած Ադրբեջանի նախագահին ջերմ ընդունելություն ցուցաբերեց Եվրոպական Խորհրդի նախագահ Շառլ Միշելը՝ ողջունելով Աղդամի կողմից, այսպես ասած հումանիտար աջակցության առաջարկը։

Ի տարբերություն Հայաստանի քաղաքական, հասարակական գրեթե բոլոր գործիչների, որոնց համար միջազգային իրավունք կոչվածը «Սուրբ գիրք է», Ադրբեջանի նախագահը քաջ գիտակցում է, որ աշխարհն առաջնորդվում է միմիայն ազգային շահերով և ուժի գործոնով։

Զալիբեկյան Լիլիթ