Պետական բյուջեն անխնա «մսխող» ՔՊ-ական պաշտոնյաների 10-յակը

Թեև ՔՊ-ական պաշտոնյաների մեծամասնությունն օգտագործում է պատեհ և անպատեհ առիթները հայտարարելու համար, որ իրենք խնայում են հարկատուների գրպանի հաշվին ձևավորվող բյուջեի յուրաքանչյուր լուման, իրականությունը փոքր–ինչ այլ է և այդ իրականությունը արտահայտվում է այն բանում, թե ինչպես են այդ նույն պաշտոնյաները մսխում պետական բյուջեի գումարները, այն էլ՝ սեփական կարիքները հոգալու համար:

Դիցուք՝ պարզվում է՝ թանկարժեք ավտոմեքենաների հանդեպ թուլություն ունեն ոչ միայն ՀՀ վարչապետն ու ԱԺ նախագահը, այլեւ ավելի ցածր կալիբրի պաշտոնյաները, օրինակ՝ Իջեւանի նորընտիր համայնքապետ Արթուր Ճաղարյանը։ Նա դեռեւս համայնքապետի պաշտոնակատար եղած ժամանակ՝ 2021 թվականին, ձեռք է բերել «Տոյոտա Պռադո» մակնիշի ծառայողական ավտոմեքենա, այն դեպքում, երբ համայնքապետարանն ունեցել է մեկ այլ՝ մի քիչ ավելի ցածր դասի «Տոյոտա»։ Սակայն ուշագրավ է, որ Իջեւանի համայնքապետարանի գնումների տեղեկագրի մեջ այս մասին ոչ մի ինֆորմացիա չկա, եւ, առհասարակ, 2020-ից այս կողմ որեւէ գնման մասին տեղեկություն չկա։ 

Դեկտեմբերի ընտրություններում Մեծամորի համայնքապետ ընտրված ՔՊ-ական Վահրամ Խաչատրյանը որոշել է բյուջեի հաշվին շքեղ ծառայողական մեքենա ձեռք բերել։ Խոսքը մոտ 32 մլն դրամ արժողությամբ Toyota Prado ամենագնացի մասին է։ Դրա համար մրցույթ է հայտարարվել, որտեղ այնպիսի պարամետրեր են նշել, որոնցով հնարավոր չէ ավելի էժան ու ցածր դասի մեքենա ձեռք բերել։

Լոռու նախկին մարզպետ Անդրեյ Ղուկասյանը բյուջեի հաշվին պարբերաբար իրեն պարգևատրություններ էր դուրս գրում, իհարկե՝ հասկանալի չէ, թե ինչ տիտանական աշխատանքի դիմաց։

Ատոմ Ջանջուղազյանը, ով 44-օրյա պատերազմի ժամանակ զբաղեցնում էր ֆինանսերի նախարարի պաշտոնը և ում պահ է տրված պետության ամբողջ գանձարանը, պատերազմի ամենաթեժ օրերին ևս զերծ չի մնացել ինքն իրեն պարգևատրելուց մոտ 73 մլն դրամով։

Առողջապահության նախկին նախարար Արսեն Թորոսյանը  Մարտի 8-ի կապացությամբ  ինքն իրեն պարգևատրել էր 2 մլն 381 հազար դրամով, որը մոտ 5000 ԱՄՆ դոլար է կազմում: 

Ծագումով ապարանցի Մաթեւոս Ասատրյանը, օրինակ, որ 11 անշարժ գույք ունի, ամեն ամիս պետությունից 100 հազար դրամ տան վարձի փոխհատուցում է ստացել: Պաշտոնական հայտարարագրից տեղեկանում ենք, որ Ազգային ժողովի «Քաղաքացիական պայմանագիր» խմբակցության պատգամավոր Մաթեւոս Ասատրյանը 2023 թվականի հունվարին բազմաբնակարան շենքի ոչ բնակելի տարածք է գնել։ Պատգամավորն այն ձեռք է բերել 800 հազար դրամով, որը գտնվում է Երեւանում՝ Աջափնյակ վարչական շրջանում։ Բացի այս տարածքից, ահա թե ինչ եկամուտներ, շարժական և անշարժ գույք ունի պատգամավորը․

ՔՊ վարչության անդամ Արփի Դավոյանը 2021 թվականին, երբ ԱԺ պատգամավոր է ընտրվել, պատգամավորի աշխատավարձին, ներկայացուցչական ծախսի համար նախատեսված գումարին եւ պարգեւավճարներին զուգահեռ, նաեւ ամսական 100 հազար դրամ գումար է ստացել՝ որպես բնակարանի վարձավճար: Ըստ կենսագրության՝ Արփինե Դավոյանը 2009-ից աշխատել է Երեւանի դպրոցներից մեկում՝ որպես հոգեբան, այսինքն՝ երկար տարիներ բնակվել է Երեւանում, տուն չի ունեցել: ԱԺ պատգամավոր է ընտրվել 2018 թվականին ու սկսել է պետության հաշվին վարձավճար ստանալ:

Վայոց ձորի մարզի Վայք համայնքի ղեկավար Մխիթար Մաթևոսյանն ընդհանուր 537 միլիոն դրամի պայմանագրեր է կնքել իր կնոջը պատկանող ընկերության հետ, ընդ որում՝ մինչև 2022 թվականն այդ ընկերությունը ղեկավարել է հենց ինքը՝ Մխիթար Մաթևոսյանը, սակայն համայնքի ղեկավար ընտրվելուց հետո ընկերության իր բաժնեմասն ու կառավարումը հանձնել է կնոջը՝ Մերի Մարգարյանին։ Պետական գնումների armeps.am համակարգի տվյալներով՝ 2022 թվականի ընթացքում Վայքի համայնքապետարանը՝ ի դեմս Մխիթար Մաթևոսյանի, 4 պայմանագիր է կնքել «Մավշին» ՍՊԸ-ի հետ։

ՀՀ հանրային ծառայությունները կարգավորող հանձնաժողովի նախագահ Գարեգին Բաղրամյանը 300 հազար դրամով ղեկավարի բազկաթոռ է ձեռք բերել:

Ինչպես տեսնում ենք՝ հեղափոխական պաշտոնյաները պետական բյուջեին վերաբերվում են ինչպես իրենց սեփական բանկային հաշվին և անխնա ծախսում են, մինչդեռ գոտիները ձգելու պահանջ-առաջարկը վերաբերվում է, կարծես թե, միայն շարքային քաղաքացիներին: