Երկակի ստանդարտներով առաջնորդվող ՔՊ-ական պաշտոնյաները

Թեև հայաստանյան պաշտոնյաներն առիթը բաց չեն թողնում խոսելու իրենց սկզբունքայնությունից, բավական շատ են դեպքերը, երբ վերջիններս այսպես ասած՝ բռնվում են երկակի ստանդարտների կիրառման վրա, ինչը բնավ էլ չի խոսում տվյալ պաշտոնյայի սկզբունքայնության մասին։

Դիցուք՝ եթե Ռոմանոս Պետրոսյանի ղեկավարած ՊՎԾ-ն ցանկանում էր օբյեկտիվ աշխատել, ապա ստուգումներ պետք է իրականացվեին նաև այն կառույցներում, որոնցում առկա չարաշահումների մասին մամուլը բազմիցս էր բարձրաձայնել: Օրինակ՝ ինչու ՊՎԾ-ն ստուգումներ չի նախաձեռնում Տավուշի մարզպետարանում: Հայկ Ղալումյանի արկածների մասին մամուլը գրեթե յուրաքանչյուր շաբաթ է գրում, սակայն վերջինիս, կարծես, փրկում է այն հանգամանքը, որ ինքը հանդիսանում է Նիկոլ Փաշինյանի քավորը: ՊՎԾ-ն ցանկության դեպքում կարող էր ուսումնասիրել Իջևանի և Մեծամորի համայնքապետարաններում գնումների գործընթացները: Արթուր Ճաղարյանը և Վահրամ Խաչատրյանը վերջերս որոշել էին համայնքային բյուջեի հաշվին իրենց նոր ավտոմեքենաներ գնել: Արդյո՞ք գնումների գործընթացներն այս համայքնապետարաններում ՊՎԾ-ին չեն հետաքրքրում:

Բազմաթիվ գործող պաշտոնյաներ, ովքեր նախկինում բնապահպան կամ իրավապաշտպան ակտիվիստներ են եղել, կարծես թե, մոռացել են այդ մասին: Հաց բերողի մահվանից հետո Նիկոլ Փաշինյանը, Էդմոն Մարուքյանը, Տիգրան Ավինյանն ասուլիսի ընթացքում պահանջում էին իշխանություններից՝ հանրությանը սպառիչ պատասխաններ տալ, թե ովքեր են պատասխանատու Արթուր Սարգսյանի մահվան համար և պատժել վերջիններին։

Ինչպես տեսնում ենք՝ վերը նշված ակցիային մի շարք ծանոթ դեմքեր են մասնակցում, ովքեր այսօր ունեն բարձր պաշտոններ՝  Հայկ Կոնջորյանը, Մխիթար Հայրապետյանը, Տիրգան Ավինյանը, Արայիկ Հարությունյանը:

Իր հերթին ընդդիմադիր պատգամավոր Լենա Նազարյանը ժամանակին գլխավոր դատախազից պահանջում էր տալ քաղբանտարկյալ տերմինի սահմանումը, այսօր նա, իհարկե, նման պահանջներ դատախազությանը չի ներկայացնում:

Զառա Բաթոյանը հետաքրքրված է կալանավայրերում պահվող կանանց բժշկական խորհրդատվություն և ծառայություններ ստանալու իրավունքով: Այսօր նա այդ մասին ընդհանրապես չի հիշատակում, չնայած առիթները քիչ չեն:

Վահագն Հովակիմյանը, ով ժամանակին հասարակության մեծ մասի պես անհաշտ էր Արթուր Սարգսյանի կալանավորման հետ, այսօր լռում է, երբ իր ղեկավարած երկրում չորս տարվա մեջ արդեն իսկ չորս նման ողբերգական դեպք է արձանագրվում: Հետաքրքիր է՝ այլևս անհաշտ չէ՞, թե այլ պատճառ կա նման լռության համար, դիցուք՝ իշխանության քաղցրությունը:

ՀՀ նորանշանակ ՄԻՊ Անահիտ Մանասյանն, շնորհավորելով լրագրողներին մասնագիտական տոնի կապակցությամբ, վերջիններիս նաև հորդորել է պահպանել էթիկայի կանոնները և զերծ մնալ ատելության խոսքի տարածումից: Հետաքրքիր է, թե ինչու է նորանշանակ ՄԻՊ-ը նմանատիպ կոչ-պահանջ հնչեցնում լրագրողների հասցեին, մի դեպքում, երբ նմանատիպ վարքագծով աչքի են ընկնում հիմնականում իշխող քաղաքական ուժի ներկայացուցիչները:

Առողջապահության նախկին նախարար Արսեն Թորոսյանը հաթաթա և օրենքի գերակայության դասեր է տալիս երթևեկության կանոնները խախտող վարորդներին՝ մոռանալով, որ ինքն էլ աչքի չի ընկել օրինապաշտ կառավարմամբ, ինչի մասին էլ հուշում են հարուցված քրեական գործերը:

Նախորդ տարվա մայիսի 31-ին, երբ զինվորների դիերի և մասունքների ոչ պատշաճ պահման փաստի մասին համացանցում հայտնված տեսանյութը ցնցեց հասարակությանը, առողջապահության նախարարի՝ այն ժամանակ պաշտոնակատար Ավանեսյանն ընդամենը ներողություն խնդրեց հարազատներից, ընդունեց, որ տեղի ունեցածը իր բացթողումն է, բայց  աշխատանքից ազատեց դատական բժշկին ու դիահերձարանի աշխատակիցներին: Նույն փաշինյանական՝ համար մեկ պատասխանատուի, բայց ոչ համար մեկ մեղավորի  տրամաբանությամբ: Եվ իշխանական ամբողջ համակարգը, Նիկոլ Փաշինյանից սկսած, լծվեց Ավանեսյան Անահիտին արդարացնելու սուրբ գործին:

Արմեն Մելիքբեկյանի ղեկավարած ՀՖՖ-ն աշխատանքից ազատում 5 անընդմեջ պարտություն կրած մասնագետին՝ փոխարենը վստահելով 8 անըմդմեջ պարտությունների հեղինակ մարզչին։ Այս հարցի պատասխանը գտնելը բավական դժվար է։ Փաստենք նաև ՀՖՖ-ում գործում են երկակի ստանդարտներ։