ՔՊ-ական պաշտոնյաների ինքնախոստովանական «ցուցմունքները»

Հայաստանյան պաշտոնյաները վերջին շրջանում աչքի են ընկնում իրենց անկեղծությամբ, բանն այն է, որ նրանց շուրթերից հաճախ է կարելի լսել ինքնախոստովանական ցուցմունքներ, որոնցից էլ պարզ է դառնում, որ նախկինում այդ պաշտոնյաներն այնքան էլ բաց ու թափանցիկ չեն եղել հանրության առջև:

Դիցուք՝ Նիկոլ Փաշինյանը վերջին ասուլիսի ընթացքում հայտարարեց, որ նոյեմբերի 7-ի կեսօրին ԳՇ պետ Օնիկ Գասպարյանը իրեն զեկուցել էր Շուշիի անկման մասին: Ստացվում է, որ վարչապետը գիտակցաբար մոլորեցնում էր հանրությանը, երբ նոյեմբերի 9-ի երեկոյան հայտարարում էր և գրառում էր անում առ այն, որ Շուշիի համար համառ մարտերը շարունակվում են:

Եթե ադրբեջանական կողմը կրակ է բացում, հայկական կողմն էլ է պատասխան կրակ բացում, որն առաջ չկար։ Այդ մասին ԱԺ–ում լրագրողների հետ ճեպազրույցում ասել էր ԱԺ պաշտպանության հանձնաժողովի նախագահ Անդրանիկ Քոչարյանը՝ անդրադառնալով Գեղարքունիքում հակառակորդի կրակոցների դեպքերին։ Անդրանիկ Քոչարյանի ասածից հասկացվում է, որ այն ժամանակ կար չկրակելու հրաման: Մինչդեռ ամիսներ առաջ ԱԺ ամբիոնից Նիկոլ Փաշինյանը հայտարարում էր, որ չկրակելու հրաման ինքը չի տվել և դա ընդհանրապես հավասարազոր է պետական դավաճանությանը:

Ազգային ժողովի տնտեսական հարցերի մշտական հանձնաժողովում հաջորդ տարվա պետական բյուջեի ծախսերի նախնական քննարկումների ժամանակ օրերս էկոնոմիկայի նախարարը, իր կամքից անկախ, սկանդալային արձանագրում կատարեց. բացահայտեց, թե ինչ է կատարվում կառավարությունում՝ վարագույրներից այն կողմ, կարծելով, որ քննարկումները փակ են։

Առողջապահության նախկին նախարար  Արսեն Թորոսյանը հայտարարում է, որ Քովիդի գործով բավական շատ բան ունի բացահայտելու, սակայն, չգիտես ինչու, ոտքը կախ է գցում` դրանով իսկ ապացուցելով, որ հանրությունից թաքցնելու բան ունի:

Հայաստանն ընդունում է Ադրբեջանի տարածքային ամբողջականությունը այնպես, ինչպես Ադրբեջանն է ընդունում Հայաստանի տարածքային ամբողջականությունը: Այս մասին Եռաբլուր պանթեոնում լրագրողների հետ զրույցում նշել էր ԱԺ ՔՊ խմբակցության պատգամավոր Արմեն Խաչատրյանը։ Այս հայտարարությունը ուշագրավ է նրանով, որ վարչապետ Նիկոլ Փաշինյանն ամիսներ շարունակ ամեն պատեհ և անպատեհ առիթով հայտարարում է տրամագծորեն հակառակը, այն, որ բանակցություններում առաջընթաց չի նկատվում, քանի որ Ադրբեջանը չի ճանաչում Հայաստանի տարածքային ամբողջականությունը։

Վարչապետ Նիկոլ Փաշինյանը մեկ տարի առաջ խիստ կասկածում է, որ անկլավների հարցն ունի իրավական հիմք: Այդ մասին նա հայտարարել է նոյեմբերի 23-ին առնցանց ասուլիսին՝ պատասխանելով հարցին, թե բանակցային սեղանին դրված է անկլավների փոխանակման հարցը։ «Պետք է հասկանալ՝ անկլավներն ունե՞ն իրավական հիմք, թե՞ ոչ։ Մենք խիստ կասկածում ենք, որ դա իրավական հիմք ունի», - նշել էր Փաշինյանը՝ նկատելով, որ Ադրբեջանը հետապնդում է անկլավների հարց, նույնիսկ նոյեմբերի 9-ին փորձ է արվել անդրադարձ կատարել այդ հարցին։ Մինչդեռ ամիսներ առաջ  իր ելույթում ԱԽ քարտուղար Արմեն Գրիգորյանը անդրադարձել է անկլավների թեմային` նշելով  մասնավորապես, հետևյալը:  «Մինչև այս պահն անկլավների հարց չի բարձրացվել: Կարելի է ասել, որ երկու կողմից էլ (Հայաստանի և Ադրբեջանի- խմբ)անկլավ կա, և դրանց տարածքները գրեթե հավասար են, երկու կողմն էլ լուռ է այս հարցում և այն դեռևս չի  քննարկվել: Մեր հույսն այն է և հնարավոր լուծման տարբերակն այն է, որ  Հայաստանի անկլավը թողնվում է Ադրբեջանին, Ադրբեջանի անկլավները, որոնք Հայաստանի տարածքում են, մնում են Հայաստանին: Իհարկե, կա այսպիսի հարց, թե ինչպես են դրանք առաջացել, որոնք շարունակում ենք ուսումնասիրել, բայց ընդհանուր երկարաժամկետ տարբերակը սա է»,- ասել է Գրիգորյանը։ 

Ոստիկանական բեսպրեդելին վերջ տալու խոստումներով իշխանության եկածներից Գարիկ Սարգսյանը փաստացի բացահայտել է իր թիմի իրական կարծիքը այդ բեսպրեդելի մասին` ասելով, որ ոստիկանությունը միշտ էլ օրվա իշխանության ծառայողն է: