«Նախկինների» առոք-փառոք կյանքը Նոր Հայաստանում

Վերլուծական 26 Օգոստոս, 2023 21:55

Նախկին իշխանություններին մերժած հեղափոխականները թվում էր, թե անհաշտ պայքար են սկսելու վերջիններիս հետ, իհարկե, օրենքի սահմաններում՝ պարզելու համար, թե իրեն կողմից իսկ բազմիցս բարձրաձայնված այսպես կոչված՝ թալանված գումարները ուր են, ինչպես են վաստակվել և ինչի վրա են ծախսել: Սակայն, եթե նայում ենք առկա իրականությանը, ապա պատկերը հետևյալն է՝ նախկին պաշտոնյաների մի մասը տաքուկ վերարտադրվել են իրենց պաշտոններում՝ արդեն ՔՊ ցուցակներով, մի մասն էլ առոք-փառոք ապրում է ստանալով միլիարդների հասնող արտոնություններ:

Դիցուք՝ Արագածոտնի Ծաղկահովիտ համայնքում ՏԻՄ ընտրությունների ժամանակ ՔՊ ցուցակի առաջին համարը Նորայր Հակոբյանն էր, որն արդեն 20 տարի զբաղեցնում է Ծաղկահովիտի համայնքապետի պաշտոնը։ 2012-ի համայնքի ղեկավարի ընտրությունում նա եղել է ՀՀԿ անդամ, իսկ 2017-ին՝ անկուսակցական։

Արենիում ՔՊ-ի առաջին համարը գործող համայնքապետ Հուսիկ Սահակյանն է, որն այդ պաշտոնում ընտրվել է 2017-ին՝ որպես ՀՀԿ-ական։ Ավելի վաղ՝ 1996-2005 և 2007-2017 թթ. նա եղել է Ռինդի համայնքապետ։ Ռինդն այժմ Արենի խոշորացված համայնքի մաս է կազմում։

Գյուլագարակում ՔՊ հաղթած թեկնածու, ներկայիս համայնքապետ Խաչիկ Վարդանյանը այդ պաշտոնում նշանականվել է 2021-ի հուլիսին, այն բանից հետո, երբ 2017-ին համայանքապետ ընտրված Մհեր Գևորգյանը վաղաժամկետ դադարացրել էր լիազորությունները։ Վարդանյանը 2017-ի ընտրություններին մասնակցել է որպես ՀՀԿ-ական։ Իսկ 2016-ին նա Գյուլագարակի համայնքապետ էր ընտրվել որպես «Հայկական վերածնունդ» («Օրինաց երկիր») կուսակցության անդամ։

Կոտայքի մեկ այլ համայնքում՝ Ակունքում, ՔՊ-ի ցուցակը գլխավորում էր և հաղաթանակ է տարել Հունան Ռուբենյանը, որը 1996-ից է գլխավորում համայնքը։ 2012 և 2017 թվականների համայնքապետի ընտրություններում նա ևս եղել է «Բարգավաճ Հայաստան» կուսակցության անդամ։ Հատկանշական է, որ Ռուբենյանի ղեկավարած համայնքի խոշոր գնումների մասին 2018-ի հունիսին ահազանգում էր վարչապետ Նիկոլ Փաշինյանի «Հայկական ժամանակ» թերթը։

Վայոց Ձորի մարզի Եղեգիս համայնքում ՔՊ հաղթած թեկնածուն նախկին համայնքապետ, ՀՀԿ-ական Արթուր Ստեփանյանն է, ում մասին մամուլը հեղեղված է աղմկոտ նյութերով։ Համագյուղացիները 2018-ին նրա դեմ բողոքի ակցիա էին անում՝ առանց թույլտվության ՀԷԿ կառուցելու համար, եւ գյուղը ողողվել էր «Արթուր՝ հեռացիր» գրառումներով։

Ըստ ՀՔԾ-ի՝ հարկեր չվճարելու տեսքով պետությանը 30 միլիոն դրամ էր վերադարձել «ՄԱՊ» ընկերությունը։ Այս փաստը բացահայտվել է բնապահպանության նախկին նախարար Արամ Հարությունյանի կողմից Աիլվա Համբարձումյանից 14 միլիոն դոլարի կաշառք ստանալու գործի քննության շրջանակում։ «ՄԱՊ»-ը գինի, կոնյակ, ալկոհոլային խմիչքներ արտադրող ձեռնարկություն է, ընկերության սեփականատերը նախկին ՀՀԿ-ական պատգամավոր Ալեքսան Պետրոսյանն է։ ՄԱՊ գինու և կոնյակի գործարանը՝ մեկ միլիոն դրամ է փոխանցել ՔՊ-ին որպես նվիրատվություն: Իսկ վերջերս էլ պարզ դարձավ, որ Սնուպ Դոգի երևանյան համերգի կազմակերպումը վստահվել է հենց Պետրոսյանի որդու ընկերությանը:

2018 թվականի մայիսին ԱԱԾ-ն հայտարարել էր, որ ձեռք բերված նախնական տվյալներով պարզվել է, որ «Ալեքս Հոլդինգ» ՍՊ ընկերությունը, հանդիսանալով ավելացված հարկ վճարող կազմակերպություն, դեռեւս 2016 թվականի վերջին, տեղական գյուղմթերքի գնաճ չառաջացնելու պատրվակով, համաձայնություն է ձեռք բերել ՀՀ ՊԵԿ նախկին ղեկավարության հետ` գյուղացիներից գնված գյուղմթերքի վաճառքը «Երեւան Սիթի» սուպերմարկետների ցանցից իրականացնել տարբեր անձանց անվամբ հիմնադրված ԱՁ-ներով, որոնց իրացման շրջանառության սահմանաչափը 115 մլն ՀՀ դրամ է, ինչը հնարավորություն է ընձեռել 20 տոկոս ԱԱՀ-ի եւ շահութահարկի փոխարեն վճարել ընդամենը 2 տոկոսի չափով շրջանառության հարկ: Արդյունքում Ալեքս Հոլդինգի սեփականատեր Սամվել Ալեքսանյանը պետությանն է վերադարձրել 5.2 միլիարդ դրամ: Վատացե՞լ են արդյոք դրանից հետո Ալեքսանյանի գործերը: Բնավ: Կառավարությունը 3 տարվա ընթացքում 2 միլիարդ դրամի արտոնություն է տրամադրել Ալեքսանյանի դստերը՝ Աստղիկ Ալեքսանյանին պատկանող «Տեքսաս փրոդաքշըն» ընկերությանը; Հեղափոխությունից հետո առողջապահության նախարարությունը պետպատվերի ամենամեծ պատվերն իջեցվել էր «Աստղիկ» բժշկական կենտրոնին, որը, ինչպես գիտենք, պատկանում է հենց Սամվել Ալեքսանյանին։ Եթե 2018-ին նա ստացել է 1 միլիարդ 579 միլիոնի պատվեր, ապա 2019-ին դա կրկնապատկվել է՝ 2 միլիարդ 641 միլիոն։

ՊԵԿ նախկին նախագահ Վարդան Հարությունյանի հետ առչնվող «Նորֆոլկ Քոնսալթինգ» ընկերության դեմ նույնպես քրեական գործ էր հարուցվել, գործը սակայն կարճվել է, իսկ ընկերությունը պետությանն է վերադարձրել 5 միլիոն ԱՄՆ դոլար: Ամիսներ անց կառավարության որոշմամբ Վարդան Հարությունյանի որդիների ընկերությունը՝ Գրին Ֆարմեր-ը ազատվեց 660 միլիոն դրամ արժեքով ապրանքների ներմուծումից, ԱԱՀ-ի վճարն էլ երեք տարով հետաձգվեց:

Բացի այդ, կառավարությունը արտոնություն էր տվել «ՄԼ ՄԱՅՆԻՆԳ» ընկերությունը, որն ազատվեց 311 մլն դրամի մաքսատուրքի վճարումից: Այդ գումարը հաշվարկվել էր 3,6 մլրդ դրամ կամ մոտ 7 մլն դոլար արժողության բոլդոզերներ, այլ մեքենաներ ու մեխանիզմներ ներկրելու համար: Ընկերությունը վերագրվում է Հատուկ քննչական ծառայության աշխատակազմի նախկին ղեկավար Դավիթ Սուքիասյանին:

Նախկին պաշտոնյաների ընկերություններից շարունակում են միլիոնների հասնող գնումներ կատարել: Բնապահպանության նախարարությունը գնումը կատարել է առողջապահության նախկին նախարար Լևոն Ալթունյանի հետ կապվող «Ինգո Արմենիա»-ից՝ վճարելով 839,000 ՀՀ դրամ։ ԱԱԾ-ն շարժիչներով փոխադրամիջոցների ապահովագրման ծառայություններ է գնել«Ինգո Արմենիա»-ից՝ վճարելով 18,836,000 ՀՀ դրամ: ՀՀ սահմանադրական դատարանը մեկ անձից գնման ընթացակարգով մեքենաների ապահովագրության ծառայություններ է ձեռք բերել վերը նշված ՍՊԸ-ից՝ վճարելով 580 հազար դրամ: