«Սկզբունքային» ՔՊ-ականների 10-յակը. ովքեր են «մոռացել» սեփական անցյալը

Վերլուծական 30 Օգոստոս, 2023 21:00

Որևէ մեկի համար արդեն գաղտնիք չէ, որ գործող իշխանությունները անսկզբունքայնության խորհրդանիշ են։ Նիկոլ Փաշինյանի իշխանության գրեթե բոլոր անդամները պաշտոններ զբաղեցնելուց հետո 180 աստիճանով փոխել են իրենց դիրքորոշումները։

Դիցուք ՝ ՀՀ ԱԺ նախագահի տեղակալ Հակոբ Արշակյանը ամիսներ առաջ հանդիպել էր ՌԴ սենատոր, «Եդինայա Ռոսիա» կուսակցության գլխավոր խորհրդի քարտուղարի տեղակալ, կուսակցության գլխավոր խորհրդի նախագահության միջազգային գործունեության հանձնաժողովի նախագահ Անդրեյ Կլիմովի հետ: Հանդիպման ընթացքում վստահեցրել է, որ «Քաղաքացիական պայմանագիր» կուսակցությունը հետաքրքրված է «Եդինայա Ռոսիա» կուսակցության հետ երկարատեւ համագործակցության ընդլայնմամբ: Հիշեցնենք, որ Հակոբ Արշակյանը մինչև 2018 թվականը ակտիվ հակառուսական գործունեություն էր ծավալում։ Նրան հաճախ կարելի էր տեսնել ՌԴ դեսպանատան դիմաց կազմակերպվող բողոքի ակցիաներում։ Արշակյանն անգամ մասնակցում էր բողոքի ակցիաների, որոնց մասնակից ՀՀ քաղաքացիները չէին ընդունում ՌԴ ընտրությունների ադյունքները։

Հակոբ Արշակյանը արդեն ռուսամոլ է

Զառա Բաթոյանը մինչ հեղափոխությունը հետաքրքրված է կալանավայրերում պահվող կանանց բժշկական խորհրդատվություն և ծառայություններ ստանալու իրավունքով, մշտապես խոսում էր այդ մասին և պահանջներ ներկայացնում օրվա իշխանություններին: Այսօր նա այդ մասին ընդհանրապես չի հիշատակում, չնայած՝ առիթները քիչ չեն:

2018 թվականի մարտի 16-ին Երևանի ավագանու «Ելք» դաշինքից ավագանու անդամ Լենա Նազարյանը դատի էր տվել «Երևան» հիմնադրամին և Պետեկամուտների կոմիտեին: Դատական կարգով պահանջում էր տրամադրել տվյալներ, թե վերջին երկու տարիների ընթացքում ովքեր են 100 հազար դրամ և ավելի անանուն գումար փոխանցել «Երևան» հիմնադրամին։ Լենա Նազարյանն այն ժամանակ վստահ էր, որ նվիրատվությունները կոռուպցիոն ռիսկեր են պարունակում: Ճակատագրի հեգնանքով, այժմ Լենա Նազարյանը հանդիսանում է «Իմ քայլը» հիմնադրամի հոգաբարձուների խորհրդի անդամ և ոչ միայն չի նկատում այն, ինչ կատարվում է այդ հիմնադրամում և դրա շուրջ, այլ մի բան էլ ակտիվորեն ներգրավված է հիմնադրամի աշխատանքներում և գովազդում է Նիկոլ Փաշինյանի ընտանեկան հիմնադրամը:

Ընդդիմադիր Նիկոլ Փաշինյանը հայտարարում էր, որ քաղաքապետարանի տրանսպորտի վարչության պետին ծառայողական մեքենա տալը դա ճոխություն է և պադավատապետություն, այսօր Նոր Հայաստանում քաղաքապետարանի տրանսպորտի վարչության պետը շրջում է ծառայողական մեքենայով:

Ամիսներ առաջ 53 կողմ, 17 դեմ, 1 ձեռնպահ ձայներով Ազգային ժողովն առաջին ընթերցմամբ ընդունեց ՀՀ Ազգային ժողովի «Քաղաքացիական պայմանագիր» խմբակցության պատգամավորներ Արթուր Հովհաննիսյանի, Վահագն Հովակիմյանի, Թագուհի Ղազարյանի և Սարգիս Խանդանյանի հեղինակած ««Զանգվածային լրատվության մասին» օրենքում փոփոխություններ և լրացումներ կատարելու մասին» օրենսդրական փաթեթը: Մինչդեռ 2002-ին Զանգվածային լրատվամիջոցների (ԶԼՄ) ներկայացուցիչներն ու Ազգային ժողովի երկու մշտական հանձնաժողովների նախագահները կառավարությանը մեղադրում էին պայմանավորվածությունները խախտելու եւ «Զանգվածային լրատվամիջոցների մասին» օրենքի նախագիծը չնչին փոփոխություններով շրջանառության մեջ վերադարձնելու համար:

Էդմոն Մարուքյանն ամիսներ առաջ համաձայնել է պաշտոն ստանալ Նիկոլ Փաշինյանի կառավարությունում, նա դարձել է հատուկ հանձնարարություններով դեսպան: Իսկ ի՞նչ էր ասում Փաշինյանի և վերջինիս վարած քաղաքականության մասին Մարուքյանը պաշտոնը ստանալուց ամիսներ առաջ․ «Էս հեղափոխությունը էղել ա նրա համար, որ մարդիկ ավելի լավ ապրեն։ Էղել ա նրա համար, որ մարդիկ ավելի հավասար լինեն։ Բայց հավասարությունը խաբկանք ա, մեծ խաբկանք։ Էդ հավասարությունը չի ապավովվել. իրանք լավ են ապրում, դուք ոնց ապրում էիք էդպես էլ ապրում եք։ Տասը տոկոս ձեր կյանքից էս մարդիկ են ղեկավարում, թող ցույց տան տաս տոկոս որտեղ ա կյանքը լավացել։ Տաս տոկոս ցույց տվեք որտեղ են լավ բան արել... Դուք գնացել կառավարական ամառանոցներում ապրում եք, դուք դավաճանել եք հեղափոխությանը, սկսել եք լավ ապրել, ու էդ օրվանից սաղ կործանվել ա»:

Վեդի համայնքի ղեկավար Գարիկ Սարգսյանը մինչ հեղափոխությունը բողոքում էր իրավապահների ապօրինություններից, ամենաթողությունից: Հեղափոխությունից հետո նա ոչ ավել, ոչ պակաս հայտարարել է, որ ոստիկանությունը միշտ էլ օրվա իշխանության ծառայողն է:

Երբ ընդդիմադիր Նիկոլ Փաշինյանը պնդում էր, որ Հանրապետական համայնքապետերը թալանում են բյուջեն, այն ժամանակվա ֆինանսների նախարար Ատոմ Ջանջուղազյանը, ըստ էության, Փաշինյանին մեղադրեց ստախոսության մեջ` հայտարարելով, որ ինքը թալանի որևէ դեպք չի իմանում: Հեղափոխությունից հետո Ջանջուղազյանը մի քանի տարի պահպանեց իր պաշտոնը՝ դառնալով Փաշինյանի տնտեսական ռեֆորմների կնքահայրը: Ջանջուղազյանը ջանք ու եռանդ չէր խնայում հանրությանը համոզելու, թե ինչ ճիշտ քաղաքականություն է որդեգրել Փաշինյանի կառավարությունը և որ այդ քաղաքականությունը տալիս է սպասված արդյունքները: Այնուհետև վերջինս նշանակվեց ոչ ավել, ոչ պակաս՝ Վերահսկիչ պալատի նախագահ:

ՀՀ նորանշանակ ՄԻՊ Անահիտ Մանասյանը, շնորհավորելով լրագրողներին մասնագիտական տոնի կապակցությամբ, վերջիններիս նաև հորդորել է պահպանել էթիկայի կանոնները և զերծ մնալ ատելության խոսքի տարածումից: Հետաքրքիր է, թե ինչու է նորանշանակ ՄԻՊ-ը նմանատիպ կոչ-պահանջ հնչեցնում լրագրողների հասցեին, մի դեպքում, երբ նմանատիպ վարքագծով աչքի են ընկնում հիմնականում իշխող քաղաքական ուժի ներկայացուցիչները:

Ամիսներ առաջ խորհրդարանն առաջին ընթերցմամբ ընդունեց Պետական գաղտնիքի մասին օրենքի փոփոխությունների աղմկահարույց նախագիծը, որը քննադատվել է մասնագիտական օղակների, հասարակական կազմակերպությունների և խորհրդարանական ընդդիմության կողմից: Նախագծին կողմ էր քվեարկել նաև իշխող խմբակցության պատգամավոր Հերիքնազ Տիգրանյանը: Սա ուշագրավ է այն առումով, որ Տիգրանյանը նախկինում եղել է մի կազմակերպության անդամ, որը քննադատել է նախագիծը և բացասական կարծիք հայտնել դրա մասին: Խոսքը՝ Թրանսփարենսի ինթերնեյշնլ հակակոռուպցիոն կազմակերպության մասին է, որը, ի թիվս մի քանի այլ ՀԿ-ների, քննադատել է նախագիծը: