Պաշտոնյաների առեղծվածային և անաղմուկ հրաժարականները սկանդալների ֆոնին

Վերջին շրջանում պաշտոնատար անձանց հրաժարականների շքերթ էր նկատվում և ինչն էլ ավելի ուշագրավ է, այդ հրաժարականների մեծ մասը տեղի ունեցավ բավական անաղմուկ, իսկ հրաժարական տվող պաշտոնյաները մինչ այդ հայտնվել էին բավական պիկանտ, եթե չասենք կոռուպցիոն տարրեր պարունակող պատմությունների կիզակետում:

Դիցուք՝ ՊԵԿ փոխնախագահ Շուշանիկ Ներսիսյանի հրաժարականը: Մամուլը գրել էր, որ ՊԵԿ նախագահ Բադասյանը իր տեղակալի կողմից թույլ տրված հավանական չարաշահումների կամ նրա հովանավորչությամբ դրսևորվող կոռուպցիոն երևույթների վերաբերյալ «դոսյեներ» է հավաքել ու տարել դրել է Փաշինյանի դիմաց՝ պահանջելով, որ Ներսիսյանին ազատի պաշտոնից, բայց Փաշինյանը ձգում էր երանելի պահը։ Ի վերջո նա հրաժարական ներկայացրեց և կորավ ռադարներից:

Հաջորդը վարչապետի աշխատակազմի ղեկավարի տեղակալ Բագրատ Բադալյանն է, ով օրեր առաջ անաղմուկ հրաժարական ներկայացրեց: Վերջինս կասկածելի ակտիվություն էր դրսևորում մրցույթների ոլորտում: Բագրատ Բադալյանի եկամուտներն ավելացել են հատկապես պետական պաշտոններ զբաղեցնելու տարիներին: Մասնավորապես, նրան է պատկանում «Ճաննախագիծ ինստիտուտ» ՍՊԸ-ի 88.13%-ը: Այս ընկերությունն ակտիվ մասնակցություն ունի պետական գնումներում՝ հատկապես ճանապարհաշինության ոլորտում:

Նախկին ՄԻՊ Քրիստինե Գրիգորյանի հրաժարականը նույնպես բավական ուշագրավ էր: Տեղեկություններ են տարածվում, որ վերջինիս գաղտնալսում էին և հենց դա էր հրաժարական ներկայացնելու պատճառը: Բանն այն է, որ առնվազն 13 հայաստանցի հասարակական գործիչներ, այդ թվում՝ լրագրողներ և իրավապաշտպաններ, հայտնվել են Pegasus լրտեսող ծրագրերի թիրախում։ Նման հայտարարություն էր արել Amnesty International իրավապաշտպան միջազգային կազմակերպությունը։

Բավական անաղմուկ հրաժարական ներկայացրեց նաև քաղավիացիայի նախկին պետ Տաթևիկ Ռևազյանը; Նրա կառավարման ընթացքում՝ 2019-ի օգոստոսից մինչեւ 2020-ի հունիս, հայկական քաղավիացիան սահուն քայլերով շարժվում էր դեպի ԵՄ «սեւ ցուցակ», որտեղ եւ, ի վերջո, հայտնվեց ու գտնվում է մինչ օրս։

Ինչպես գիտենք՝ մինչ ԱԺ-ում հայտնվելը սոցապ նախարարի պաշտոնը զբաղեցնում էր Զառա Բաթոյանը: Վերջինս այդ պաշտոնից հրաժարական ներկայացրեց, սակայն դրան նախորդել էր բավական հետաքրքիր մի պատմություն:   Դատախազությունն ուսումնասիրել է եւ պարզել, որ 2020 թվականից հետո մանկատան նախկին սաներին պետական ծրագրով բնակարան ապահովելու ընթացքում եղել են չարաշահումներ։ Քեական գործ է հարուցվել «Պաշտոնեական անփութություն» հոդվածով (ՀՀ քրեական օրենսգրքի 315-րդ հոդվածի 1-ին մաս)։ Մինչեւ այս տարվա սեպտեմբերի 1-ը 163 նախկին սանի պետք է բնակարան տրամադրվեր, սակայն, ըստ դատախազության տվյալների, այս 163 նախկին սաների թվում կան այնպիսիք, ովքեր օրենքով իրավունք չեն ունեցել բնակարան ստանալ։  Այդ ընթացքում նախարարի պաշտոնը զբաղեցրել է հենց Բաթոյանը:

Տրդատ Սարգսյանը հրաժարականի դիմում էր ներկայացրել Վայոց Ձորի մարզպետի պաշտոնից այն բանից հետո, երբ մարզպետի օգնականին մեղադրանք է առաջադրվել դիտավորությամբ անձին ծանր մարմնական վնաս պատճառելու համար: Մարզպետի օգնականը կալանավորված է: Քննչական կոմիտեն ստուգում է փոխգնդապետ Արա Մխիթարյանին դաժան ծեծի ենթարկելու միջադեպին մարզպետի մասնակցությունը: Սարգսյանը արդեն ԱԺ պատգամավոր է, իսկ պատկան մարմինները դեռ ստուգում և ստուգում են:

Առողջապահության նախարարի պաշտոնից հրաժարական տալուց առաջ Արսեն Թորոսյանը, ով այսօր ԱԺ պատգամավոր է, հայտնվել էր ուշագրավ պատմությունների կենտրոնում, կապված համավարակի ընթացքում ցուցաբերած ոչ պրոֆեսիոնալիզմի և բազմաթիվ բացթողումների հետ, որոնք հետագայում Հաշվեքննիչ պալատի և հակակոռուպցիոն կոմիտեի կողմից ուսումնասիրություններ սկսելու հիմք դարձան:

Ինչպես տեսնում ենք՝ ՔՊ-ականների մոտ, կարծես թե, ավանդույթ է դարձել սկանդալների կիզակետում հայտնվելն ու այնուհետև անաղմուկ հրաժարական տալը, մինչդեռ հանրության մոտ, անշուշտ, կարող են բազմաթիվ հարցեր առաջանալ, թե ինչպես է ստացվում, որ սույն պաշտոնյաները կարողանում են գլուխները ազատել՝ ընդամենը հրաժարական տալով կա՛մ ռադարներից անհետանալով, կա՛մ պաշտոնի իջեցումով բավարարվելով...