Ինչու է Փաշինյանը ռեաբիլիտացնում «մերժված» ՔՊ-ականներին

Հայաստանում արդեն ավանդույթ է ձևավորվել, համաձայն որի՝ երբ որևէ պատասխանատու պաշտոնյա ազատվում է իր զբաղեցրած պաշտոնից, եթե նրան դեսպան նշանակելու հնարավորություն չի լինում, ապա նա համալրում է նախագահի խորհրդականների շարքը: Այս հարցում բացառություն չէ ՀՀ վարչապետ Նիկոլ Փաշինյանը:

ԱԺ նախկին պատգամավոր, այնուհետև Շիրակի մարզպետ Նազելի Բաղդասարյանը, երբ այդ պաշտոններում իրեն «սպառեց», Փաշինյանը որոշեց նրան անգործ չթողնել ու նշանակեց իրեն օգնական: Նշենք, որ փետրվարի 16-ին Բաղդասարյանը նշանակվել է վարչապետի օգնական: Նույն «ճակատագրին» արժանացավ նաև ՀՀ նախկին փոխվարչապետ Համբարձում Մաթևոսյանը, երբ Փաշինյանը տեղեկացավ, որ Մաթևոսյանը «պրավալ» է տվել Բրյուսովի համալսարանի ռեկտորի ընտրությունները, նրան ազատեց աշխատանքից: Իսկ ահա փետրվարի 16-ին նշանակվեց վարչապետ Նիկոլ Փաշինյանի գլխավոր խորհրդական։

Հաջորդը Երևանի «մերժված» քաղաքապետ Հրաչյա Սարգսյանն էր, որը հրաժարական ներկայացրեց ու կրկին մնաց առանց աշխատանքի ու Նիկոլ Փաշինյանը որոշեց ապրիլի 4-ից նրան նշանակել իրեն խորհրդական, իսկ շաբաթներ առաջ էլ ՊՆ փոխնախարար: Ի դեպ, ՊՎԾ ուսումնասիրությունների թիրախում հենց Սարգսյանն էր, քանի որ, ըստ կառույցի, հենց նրա կառավարման ընթացքում են նոր ավտոբուսների գնման պայմանագրերում անճշտություններ հայտնաբերվել:

Անցյալ տարի մեծ աղմուկ բարձրացրեց կառավարական առանձնատների վերանորոգման հարցը: Ըստ լուրերի` կառավարական առանձնատների վերանորոգման համար 2 մլն դոլար էին ծախսել և այստեղ առկա էր բացահայտ կոռուպցիոն ռիսկ: Կոնդի առանձնատների տնտեսություն ՊՈԱԿ-ի տնօրենի լիազորությունները կատարում էր Արուսյակ Մանավազյանը, ով այսօր արդեն ԱԺ պատգամավոր է, շրջանառվում էր նաև ներկայումս պատգամավորի աթոռը զբաղեցնող էդուարդ Աղաջանյանի անունը: Ուշագրավը, սակայն, այն է, որ մինչ շարքային պատգամավոր դառնալը Աղաջանյանը վարչապետի աշխատակազմի ղեկավարի պաշտոնն էր զբաղեցնում և հեռացավ անմիջապես այդ սկանդալից հետո:

ՔՊ վարչության ընտրության ժամանակ գրանցված կեղծիքների կատարելու մեջ ի թիվս այլ ՔՊ-ականների, շոշափվում էր այն ժամանակվա փոխվարչապետ Համբարձում Մաթևոսյանի անունը: Անմիջապես ընտրություններից հետո նա հրաժարական ներկայացրեց և նշանակվեց վարչապետի գլխավոր խորհրդական:

 44 –օրյա պատերազմից անմիջապես հետո ՀՀ ֆինանսների նախարարությունը պաշտոնական հաղորդագրություն տարածեց այն մասին, որ «Հայաստան» համահայկական հիմնադրամը պատերազմի ընթացքում հավաքված գումարից 52 մլրդ 703 մլն 113 հազար դրամ գումար է նվիրաբերել Կառավարությանը: Ներկայացված պարզաբանման մեջ նշվում էր, որ նվիրաբերված միջոցները մուտքագրվել են գանձապետական միասնական հաշվին՝ ռազմական գործողությունների հետևանքով ծագած լրացուցիչ բյուջետային կարիքները ֆինանսավորելու նպատակով։ Այդ ժամանակ նախարարի պաշտոնը զբաղեցնում էր Ատոմ Ջանջուղազյանը, ով այնուհետև հրաժարական ներկայացրեց և նշանակվեց Հաշվեքննիչ պալատի նախագահ, նոնսենսը կայանում է նրանում, որ այժմ ինքն էլ պետք է ստուգի ժամանակին իր իսկ ղեկավարած կառույցի գործողությունների օրինաչափությունը:

Հակակոռուպցիոն կոմիտեն քրեական գործ է հարուցել՝ պարզելու, թե արդյո՞ք 2020-ին՝ քովիդի համավարակի ժամանակ, պետական միջոցներն արդյունավետ են ծախսվել։
Քրեական գործը հարուցվել է մի քանի հոդվածներով՝ յուրացում, պաշտոնական լիազորությունների չարաշահում, պաշտոնական կեղծիք։ Առայժմ կասկածյալներ ու մեղադրյալներ չկան։ Սակայն, նրանց թվում հաճախակի է շոշափվում նախկին նախարար Արսեն Թորոսյանի անունը և վերջինս լինելով արդեն պատգամավորի կարգավիճակում՝ օր-օրի կարող  է կանչվել հարցաքննության:

Աջափնյակ վարչական շրջանի նախկին ղեկավար Գևորգ Բաբայանը, որը մեղադրվում է կոռուպցիոն հանցագործություն կատարելու համար, նշանակվել է Տարածքային կառավարման և ենթակառուցվածքների նախարարության պետական գույքի կառավարման կոմիտեի նախագահի տեղակալ: Բաբայանը չէր հիմնավորել իր ազատման պատճառները, սակայն այդ ընթացքում Factor.am-ը գրել էր, որ նա Աջափնյակ համայնքի ազդեցիկ բնակիչներից մեկի՝ Շինանյութի կամ Ջերմուկի Նորո անուններով հայտնի գործարարի հարազատներին 17-րդ թաղամասում երեք առանձնատուն կառուցելու հնարավորություն էր տվել՝ առանց թույլտվության:

Շաբաթներ առաջ հրաժարականի դիմում էր ներկայացրել ՔՊ աշխատակազմի ղեկավար Տրդատ Սարգսյանը: Նա hraparak.am-ի հետ զրույցում հաստատել է լուրն ու հավելեց, որ դա ամենևին էլ հրաժարական չէ, այլ պարզապես չի ցանկացել շարունակել զբաղեցնել պաշտոնը: Նշենք, որ, հավանաբար, Սարգսյանի հրաժարականը կապված է օրեր առաջ ՔՊ վարչության ընտրությունների նախադեպը չունեցող կեղծիքների հետ: Հիշեցնենք, որ Տրդատ Սարգսյանի  օգտին կեղծվել էր ավելի քան 30 ձայն, սակայն նա հայտնել էր, որ տեղյակ չէ, թե ինչի մասին է խոսքը: Նրան դեռ պաշտոն չեն շնորհել, սակայն, մամուլում առկա են խոսակցություններ, որ շուտով Սարգսյանը կհամալրի դիվանագիտական կորպուսը՝ նշանակվելով դեսպան:

Սյունիքի նախկին մարզպետ Մելիքսեթ Պողոսյանը հրաժարականի դիմում ներկայացրեց իր որդու շուրջ ծագած սկանդալի ֆոնին: Հիշեցնենք, որ  2021թ հուլիսի 14-ին՝ ժամը 01.00-ի սահմաններում, Գորիս քաղաքում Սյունիքի մարզպետ Մելիքսեթ Պողոսյանի որդու՝ 33-ամյա Կարեն Պողոսյանի և Սյունիքի նախկին մարզպետ Սուրիկ Խաչատրյանի որդու՝ Տիգրան Խաչատրյանի միջեւ առաջացած վիճաբանությունը վերածվել էր ծեծկռտուքի, հնչել էին կրակոցներ, կային տուժածներ։ Դեպքի առթիվ հարուցվել է քրեական գործ ՀՀ քրեական օրենսգրքի 34-104-րդ հոդվածի 1-ին մասով, 258-րդ հոդվածի 4-րդ մասով և 235-րդ հոդվածի 1-ին մասով՝ սպանության փորձի, զենքի գործադրմամբ խուլիգանության և ապօրինի կերպով հրազեն պահելու հատկանիշներով: Կարեն Պողոսյանը մեղադրվում է սպանության փորձի և ապօրինի հրազեն պահելու մեջ։ Պողոսյանը, սակայն, առանց պաշտոն չմնաց, նա նշանակվեց ՊՆ նախարարի խորհրդական:

Նույնը կարելի է ասել նաև սոցապ նախկին նախարար Զարա Բաթոյանի մասին: ՀՀ հաշվեքննիչ պալատը հրապարակել է 266 էջանոց զեկույց, որտեղ տեղ են գտել Սոցապնախարարությունում հայտնաբերված հրեշավոր խախտումների մասին տեղեկություններ: Փաստերն արդեն իսկ ուղարկվել են դատախազություն: Դրանք վերաբերում են 2019 թվականի հունվարի 1-ից մինչև դեկտեմբերի 31-ն ընկած ժամանակահատվածին, երբ ՀՀ աշխատանքի և սոցիալական հարցերի նախարարը Զարուհի Բաթոյանն էր:Սակայն, վերջինս հրաժարական տալուց հետո հանգրվանել է ԱԺ-ում և դա հասկանալի է, Բաթոյանը ներկայացնում է այսպես կոչված սորոսական շրջանակները, որոնց հետ թարսվելը Փաշինյանի ծրագրերի մեջ չի մտնում:

Ակնհայտ է, որ Նիկոլ Փաշինյանը չի գտնում, որ դեռ ժամանակն է ժերտվա տալու յուրայիններին, հակառակ դեպքում՝ վերը նշված ՔՊ-ականները նոր պաշտոններ ստանալու փոխարեն կարող էին հայտնվել կասկածյալների աթոռին: Ակնհայտ է նաև մոտիվացիան, որը Նիկոլ Փաշինյանին ստիպում է մերժված ՔՊ-ականներին պահել ձեռքի տակ․ նա չի ցանկանում, որպեսզի իր թիմակիցները համալրեն ընդդիմադիր դաշտը, ինչպես դա եղավ օրինակ՝ Երևանի նախկին քաղաքապետ Հայկ Մարությանի դեպքում, ով այսօր համարվում է Երևանի ավագանու ընտրություններում ՔՊ թեկնածու Տիգրան Ավինյանի հիմնական մրցակիցը: