ՀՀ-ում որեւէ զինված ապօրինի խմբավորում չի կարող լինել. Անդրանիկ Քոչարյան

Երեկ երեկոյան օպերատիվ առումով շատ տագնապալի իրավիճակ էր երկրի ներսում: Ոստիկանական բաժիններից մեկը ներխուժել էին զինված մարդիկ, եւ պարզ չէր, թե ինչ զարգացումներ եւ ինչ հեռանկար կարող էր լինել: Ի պատիվ մեր ուժային կառույցների` ՆԳՆ-ի եւ ԱԱԾ-ի, այդ խնդիրը լիկվիդացվեց: Բայց, բնականաբար, դա մեզ մտածելու տեղիք է տալիս, պարոն Աբազյան, որ փաստորեն դեռ տներում շատ զենք կա. նախորդ օրվա դեպքին անդրադառնալով` ասել է ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը, երբ քննարկվում էր Հայաստանի Հանրապետության կառավարության ծրագրի (2021-2026 թթ.) 2023 թվականի կատարման ընթացքի եւ արդյունքների մասին զեկույցի համապատասխան հատվածը:

Անդրանիկ Քոչարյանի խոսքով ՀՀ-ում որեւէ զինված ապօրինի խմբավորում չի կարող լինել: «Թաքնված զենք չի կարող լինել, որովհետեւ հին ասացվածք կա` պատից կախված հրացանը մի օր կրակում է: Կրակոցները չեն կարող մեր երկրի ներսում լինել, մենք ունենք բազմաթիվ անվտանգային խնդիրներ, եւ մենք պետք է ամուր զգանք մեր երկրի ներսում»,- ընդգծել է հանձնաժողովի նախագահը` նշելով, որ ուժային կառույցների հետագա բոլոր աշխատանքները պետք է միտված լինեն նման դրսեւորումներն օր առաջ բնում խեղդելուն:

ՀՀ ազգային անվտանգության ծառայության տնօրեն Արմեն Աբազյանը ներկայացրել է հաշվետու տարում կառույցի իրականացրած աշխատանքները: Զեկուցողի խոսքով ԱԱԾ-ն շարունակել է իրականացնել իր առջեւ դրված խնդիրները: Մասնավորապես, 2023 թվականին շահագործման են հանձնվել ամբողջությամբ կահավորված մի շարք սահմանապահ ուղեկալներ եւ պարետատներ: Սարքավորումներով հագեցվել եւ կահավորվել են սահմանապահ կետեր, կառուցվել են դիտակետեր, իրականացվել են ամրացման տեխնիկական հագեցման եւ կահավորման այլ աշխատանքներ: Մի շարք հատվածներում տեսահսկման համակարգերը համալրվել են ստացիոնար տեսադիտարկման սարքերով եւ այլ տեխնիկական միջոցներով, աշխատանքներ են տարվել կապի լավարկման ուղղությամբ:

2023 թվականի ընթացքում ՀՀ պետական սահմանի «Գյումրի», «Բավրա» «Գոգավան» եւ «Զվարթնոց» անցման կետերում իրականացվել են տեխնիկական վերազինման մի շարք աշխատանքներ:

ՀՀ պետական սահմանի անցման կետերում «Մեկ կանգառ, մեկ պատուհան» սկզբունքով սահմանային հսկողության գործընթացի ներդրման շրջանակում արդիականացվել է Սահմանային էլեկտրոնային կառավարման տեղեկատվական համակարգի ծրագրային ապահովումը:

Գործարկվել է նույնականացման քարտերով Հայաստանի եւ Վրաստանի քաղաքացիների սահմանահատման ձեւակերպման համար անհրաժեշտ ծրագրային ապահովումը:

Վազգեն Սարգսյանի անվան ռազմական ակադեմիայում բացվել է «Սահմանապահ զորքերի կառավարում» ցիկլը (մասնագիտությունը), որտեղ ուսումնառություն են անցնում ՀՀ սահմանապահ զորքերի կուրսանտները:

Սահմանապահ զորքերում 2022 թվականի համեմատ կին զինծառայողների թիվն ավելացել է շուրջ 9 տոկոսով, 2021 թվականի համեմատ` շուրջ 20 տոկոսով:

2023 թվականին ԱԱԾ-ում մեկնարկել է ատեստավորման գործընթացը, որն իրականացվել է փուլային սկզբունքով: Ատեստավորմանը մասնակցել եւ դրական արդյունք է գրանցել ծառայողների շուրջ 20 տոկոսը: Ատեստավորված անձնակազմի աշխատավարձն ավելացել է միջինը 57 տոկոսով: 2023 թվականին որոշում է կայացվել ՀՀ ԱԱԾ-ի սահմանապահ զորքերի ու հատուկ ստորաբաժանումների ֆունկցիոնալության խոր կամ ծանր աստիճանի սահմանափակումով հաշմանդամության զինվորական կենսաթոշակի իրավունք ունեցող նախկին զինծառայողների եւ զոհված (մահացած) զինծառայողների ընտանիքների համար սահմանել բնակարանային պայմանների բարելավման հնարավորություն:

Հաշվետու տարվա ընթացքում շարունակվել են պետական մարմինների պաշտոնական կայքերի, էլեկտրոնային հարթակների եւ այլ տեղեկատվական համակարգերի կիբեռանվտանգության ապահովման աշխատանքները, այդ թվում` նշված համակարգերի ուղղությամբ կիբեռմիջադեպերի արձագանքման գործընթացի համակարգման ուղղությամբ: Կանխվել են ավելի քան 2 մլն կիբեռհարձակման փորձեր:

Թմրամիջոցների մաքսանենգության եւ ապօրինի շրջանառության դեմ պայքարի շրջանակում իրականացված օպերատիվ-հետախուզական աշխատանքների արդյունքում բացահայտվել է 14 խոշոր դեպք:

Քննարկման մի մասն ընթացել է փակ ձեւաչափով: Հանձնաժողովն ի գիտություն է ընդունել զեկույցը: Նիստը տեղի է ունեցել մարտի 25-ին: