Բելառուսական շուկան փակվում է. Արևմուտքի հետ «սիրախաղի» առաջին ծիծեռնակները

Բելառուսի գլխավոր պետական սանիտարական բժիշկ Ալեքսանդր Տարասենկոն արգելել է «Արարատի կոնյակի գործարանի» արտադրանքի ներմուծումն ու իրացումը։ Այդ մասին, ըստ ՏԱՍՍ ռուսաստանյան լրատվական գործակալության, հայտնել է Գոմելի հիգիենայի, համաճարակաբանության և հանրային առողջության տարածաշրջանային կենտրոնի մամուլի ծառայությունը։ Հաղորդագրությունում ասվում է, որ Բելառուս «Արարատի կոնյակի գործարան» ՍՊԸ-ի արտադրանքի ներմուծումը, պահպանումը, փոխադրումը, վաճառքը և օգտագործումը արգելվում է արտադրանքում «անհամապատասխանության հայտնաբերման կապակցությամբ»։

Ուշագրավ է, որ այս տեղեկությունը տարածվեց այն բանից հետո, երբ պարզ դարձավ, որ ՀՀ իշխանությունները պատրաստվում են քաղաքական ապաստարան տրամադրել բելառուս Յարոսլավ Նովիկովին, որը կալանավորվել է բելառուսական ուժայինների պահանջով։  Ամռանը Նովիկովի նկատմամբ Բելառուսում քրեական գործ էր հարուցվել զինվորական ծառայությունից խուսափելու համար (քրեական օրենսգրքի 435-րդ հոդվածի 1-ին մաս): Նախորդ տարվա սեպտեմբերին նրա նկատմամբ միջազգային հետախուզում էր հայտարարվել։ Բացի այդ, Հայաստանից քաղաքական ապաստան է հայցում ևս մեկ բելառուսցի ընդդիմադիր ակտիվիստ՝ Մաքսիմ Վաիտկիավիչուսը: Նրա մասով գլխավոր դատախազությունից լրատվամիջոցներին միայն փոխանցում են, որ ստացել են արտահանձնման միջնորդությունը, այն կքննարկվի միջազգային պայմանագրերի և Հայաստանի օրենսդրության պահպանմամբ: Այլ մանրամասներ դատախազությունը դեռ չի հաղորդում։ Եթե ՀՀ իշխանությունների այս բարեգթությանը գումարենք նաև Եվրանեսթի գագաթնաժողովի ընթացքում Բելառուսի ընդդիմության առաջնորդ, նախագահի նախկին թեկնածու Սվետլանա Տիխանովսկայայի հետ ջերմ և բարեկամական շփումները, ապա պարզ է դառնում, որ հայկական կոնյակի ներմուծման արգելքը ընդամենն Բելառուսի առաջին նախազգուշացնող քայլն է պաշտոնական Երևանին:

Փաշինյանն ու թիմակիցներն այնքան են տարվել արևմտյան կուրատորների սիրտը շահելով, որ մոռացել են նայեն պաշտոնական վիճակագրության կողմը: Իսկ այդ վիճակագրությունը բավական ուշագրավ է: Համաձայն Վիճակագրական կոմիտեի տվյալների` 2023 թվականին առևտրաշրջանառությունը ԵԱՏՄ անդամ երկրների հետ ՀՀ-ում կազմել է 7 մլրդ 616 մլն ԱՄՆ դոլար, ինչը նախորդ տարվա համեմատ աճել է մոտ 43 տոկոսով: 2023 թվականին արտահանումը ՀՀ-ից ԵԱՏՄ անդամ երկրներ կազմել է 3 մլրդ 609 մլն ԱՄՆ դոլար, ինչը 2022 թվականի համեմատ աճել է մոտավորապես 41 տոկոսով: Ստացվում է, որ եթե ՀՀ իշխանությունների վարած պատեհապաշտ արտաքին քաղաքականության արդյունքում մենք կորցնենք ԵԱՏՄ շուկա արտադրանք արտահանելու հնարավորությունը, ապա ՀՀ տնտեսությունը կանգնելու է կոլապսի առաջ, տուժելու են շարքային քաղաքացիները: Ահա այսպես է լինում, երբ առաջնորդվում ես ոչ թե սեփական երկրի և ժողովրդի, այլ Արևմուտքի աշխարհաքաղաքական շահերը սպասարկելու առաջնահերթությամբ, Արևմուտքի, որտեղ հայկական ապրանքների համար սեփական շուկան բացել չեն շտապում...