Իրանը վերականգնել է միջազգային ինտերնետի հասանելիությունը՝ շուրջ 90-օրյա սահմանափակումներից հետո

Իրանի նախագահ Մասուդ Փեզեշքիանը կարգադրել է վերականգնել միջազգային ինտերնետի հասանելիությունը երկրում։ Այդ մասին երկուշաբթի հայտնել են իրանական պետական լրատվամիջոցները՝ հղում անելով Իրանի կապի նախարարության հասարակայնության հետ կապերի պատասխանատուին։

Այս պահին դեռ հայտնի չէ, թե ինչ մեխանիզմով և երբ ամբողջությամբ կվերականգնվի երկրի միացումը համաշխարհային ցանցին։ Ըստ ինտերնետի մոնիթորինգ իրականացնող NetBlocks հարթակի՝ Իրանում քաղաքացիների մեծ մասը շուրջ 87 օր չի ունեցել ազատ հասանելիություն համաշխարհային ինտերնետին, իսկ սահմանափակումները շրջանցելու հնարավորություն ունեցել են միայն փոքրաթիվ օգտատերեր՝ վճարովի և ավելի բարդ VPN ծառայությունների միջոցով։

Իշխանությունները սկզբում ինտերնետի լայնածավալ սահմանափակումներ էին կիրառել հունվարի 8-ից՝ հակակառավարական բողոքի ակցիաների ֆոնին։ Փետրվարին կապը մասամբ վերականգնվել էր, սակայն փետրվարի 28-ին՝ ԱՄՆ-ի և Իսրայելի հարվածներից հետո, սահմանափակումները կրկին ուժեղացվել էին։ Նույնիսկ սովորական պայմաններում Իրանում համաշխարհային ինտերնետի հասանելիությունը խիստ վերահսկվում է․ բազմաթիվ կայքեր արգելափակված են, իսկ իշխանությունները ավելի հաճախ են օգտվում ներքին թվային ցանցից՝ ծառայություններ տրամադրելու համար, այդ թվում՝ կրթական ոլորտում։