«Հրապարակ». Աննա Վարդապետյանը ստում է

Դատախազության կազմավորման 106-ամյակի եւ Դատախազության աշխատողի օրվա կապակցությամբ Գլխավոր դատախազությունում հուլիսի 1-ին տեղի ունեցած կոլեգիայի հանդիսավոր նիստում ՀՀ գլխավոր դատախազ Աննա Վարդապետյանը գերազանցիկ աշակերտի կեցվածքով վարչապետին էր զեկուցում, թե ինչ մեծ ու կարեւոր գործեր է արել ինքը, ինչպես է «թալանը» հետ բերել պետբյուջե եւ այլն: Վարդապետյանը մասնավորապես նշել է. «Դատարաններում բավարարվել է 4 մլրդ 503 մլն 686 հազար դրամ բռնագանձելու պահանջով 8 հայց (2023 թվականին՝ 318 մլն 759 հազար դրամ պահանջով 22 հայց): Դրանցից միայն մեկը ներկայացնեմ. Հակակոռուպցիոն դատարանի՝ 2024 թվականի ապրիլի 5-ի վճռով բավարարվել է դատախազության կողմից ներկայացված հայցը: Որոշվել է գործարար Սամվել Մայրապետյանից եւ «Գլոբուս» ՍՊ ընկերության տնօրեն Գագիկ Հակոբջանյանից հօգուտ Հայաստանի Հանրապետության բռնագանձել 4.4 մլրդ դրամ»: 

Դատարանում Սամվել Մայրապետյանի շահերը ներկայացնող փաստաբանական խմբի անդամ Արսեն Հարությունյանը մեզ հետ զրույցում նշեց, որ դատախազ Վարդապետյանի այս հայտարարությունն առնվազն հասկանալի չէ, որովհետեւ այն իրականության հետ կապ չունեցող հայտարարություն է, անմեկնաբանելի։ «Դատական ակտը բողոքարկվել է եւ այս պահին գտնվում է Հակակոռուպցիոն վերաքննիչ դատարանում: Այսինքն` Վարդապետյանը հիմք է ընդունում առաջին ատյանի որոշումը, որն անգամ ուժի մեջ չի մտել, վճիռ է հրապարակվել, որից հետո օրենքով սահմանված ժամկետում մենք ներկայացրել ենք վերաքննիչ բողոք: Գումար չի բռնագանձվել: Վերաքննիչում էլ դեռեւս միայն վարույթ է ընդունվել, չկա նոր բան: Իրականության հետ կապ չունի դատախազի ասածը, բայց թե ինչու է նման հայտարարություններ անում, ես չեմ կարող մեկնաբանել: Իրականությունն այլ է»,- նշեց փաստաբանը: 

Հիշեցնենք, որ ՀՔԾ-ում Սամվել Մայրապետյանին մեղադրանք էր առաջադրվել ՀՀ ՔՕ 38-311 հոդվածի հատկանիշներով։ Դատախազությունից հայտնել էին, որ 2002թ. մայիսի 16-ից Գ. Հակոբջանյանը Ս. Մայրապետյանի առաջարկով ստանձնել է փաստացի վերջինիս պատկանող «Գլոբուս» ՍՊԸ-ի տնօրենի պաշտոնը։ Ընկերությունը պայմանագիր է կնքել այլ ՍՊԸ-ի հետ, որի հիմքով վերջինիս իրականացրած շինարարական աշխատանքների արդյունքում Երեւանի Տերյան 66 հասցեում 2006թ. կառուցվել է ընդհանուր 28650,63 քմ մակերեսով բնակելի շենք․ «Կառուցումից անմիջապես հետո Ս. Մայրապետյանը, ի սկզբանե նպատակ ունենալով չվճարել ընկերության ձեռնարկատիրական գործունեության արդյունքում ստացվելիք փաստացի եկամտից առաջացող առանձնապես խոշոր չափերով հարկերը, 2006թ. ընթացքում ընկերության տնօրեն Գ. Հակոբջանյանի միջոցով կազմակերպել է «Գլոբուս» ՍՊԸ-ին պատկանող՝ նշված բնակելի շենքի թվով 141 միավոր անշարժ գույքերն ընկերության կողմից առքուվաճառքի պայմանագրերում կեղծ՝ շուկայական արժեքներից էականորեն ցածր գներ նշելու գործընթացը: Գործընթացի հետեւանքով Հակոբջանյանը «Գլոբուս» ՍՊ ընկերության փաստացի եկամուտը չի ներառել հարկային մարմնին ներկայացված հաշվարկներում՝ այդկերպ պետական բյուջե չի վճարվել առանձնապես խոշոր չափերով՝ ընդհանուր 5.678.764.260 դրամի հարկ»։ 

Նշվում է, որ առկա է պետության գույքային շահի խախտման հանգամանք։ Գլխավոր դատախազության պետական շահերի պաշտպանության վարչությունը հայցադիմում է ներկայացրել դատարան՝ Ս. Մայրապետյանից եւ Գ. Հակոբջանյանից 5 մլրդ 678 մլն 764 հազար 260 դրամ բռնագանձելու պահանջով: Նրա հաշիվների եւ գույքի վրա կալանք է դրվել: Սամվել Մայրապետյանը 2019 թվականին` բուժման նպատակով, մեկնել է Գերմանիա եւ այլեւս չի վերադարձել: Նրա նկատմամբ դատավարություններն իրականացվում են նրա բացակայության պայմաններում, փաստաբանների մասնակցությամբ: