Երբ քաղաքացուն խոշտանգած ոստիկանը նույնականացված է, բայց նրան չեն պատժում, նշանակում է՝ համակարգային մոտեցում կա․ փաստաբան

Երբ քաղաքացուն խոշտանգած կամ բռնության ենթարկած ոստիկանը նույնականացված է, բայց նրան չեն պատժում, նշանակում է՝ համակարգային մոտեցում կա։ Այս մասին այսօր՝ հոկտեմբերի 24-ին, մամուլի ասուլիսի ժամանակ հայտարարեց փաստաբան Հովհաննես Խուդոյանն՝ անդրադառնալով հունիսի 12-ին և դրանից առաջ, օրինակ՝ Եռաբլուրում, քաղաքացիների նկատմամբ ոստիկանների գործադրած անհամաչափ ուժին, բռնության դեպքերին։

«Երբ տեսնում ենք, որ ոստիկանը պատժի չի ենթարկվում, մենք հիմք ենք ունենում պնդելու, որ սա համակարգային թողտվության արդյունք է և բոլոր իրավապահ մարմինները համատեղ, իրար գործողություններ փոխլրացնելով, նպաստում են այս կարգի ապօրինությունների դրսևորմանը»,- ասաց Խուդոյանը։

Փաստաբանը շեշտեց, որ հետևողական են լինելու՝ բոլոր բռնությունների, խոշտանգումների դեպքերը հստակ արձանագրվեն, նաև դրանց ընթացքին են հետևելու։ Փաստաբանի կարծիքով՝ հարցին լուծում տալու համար հանրային լայն արձագանք, նաև իրավապաշտպանների, լրատվամիջոցների հետևողականությունն է պետք։

Ըստ նրա՝ իրավական գործընթացներն այն աստիճան են աղավաղվել, որ դժվար է հարցի լուծումը պատկերացնել միայն կաբինետային գործողություններով։ Խուդոյանն անդրադարձավ նաև այս տարվա ընթացքում անհնազանդության ակցիաների մասնակից քաղաքացիների ավտոմեքենաները պահպանվող տարածք տանելուց հետո «հորինված գործերին»։

Նրա խոսքով՝ ավտոմեքենաները ոստիկանության կողմից տարվել են պահպանման տարածք, ու երբ անձինք փորձել են վերադարձնել իրենց մեքենաները՝ մտածելով, որ որևէ վարչական իրավախախտման մեջ են մեղադրվելու, պարզվել է, որ երկնքից քրեական վարույթ է ընկել։ Իրավապահ մարմինները, փաստաբանի դիտարկմամբ, այս ամենը որպես պատրվակ են ծառայեցնում հավաքներին մասնակցության համար քաղաքացիներին պատժելու նպատակով։