Վրաստանի ընդդիմությունը փողոցային պայքարի դուրս չի գալու․ Զուրաբիշվիլիի քաղաքական կյանքը այսքանով կավարտվի․ քաղաքագետը՝ Վարաստանի ԱԺ ընտրությունների մասին

Վրաց ժողովուրդն ընտրել է մի քաղաքական ուժի, որն ազգային արժեքների վրա է հիմնված։ Շատ է տարածված այն տեսակետը, թե Վրաստանը ԵՄ-ին ոչ է ասել, բայց դա այդպես չէ։ ԼՈՒՐԵՐ․com-ի հետ զրույցում Վրաստանի ընտրությունների և հետընտարական հնարավոր զարգացումների մասին այս կարծիքը հայտնեց քաղտեխնոլոգ Արմեն Բադալյանը։ 

Բադալյանն ընդգծեց՝ ընտրությունների ձայների 100 %-ի հաշվարկից հետո, երբ պարզ դարձավ, որ «Վրացական երազանք» կուսակցությունը հաղթանակ է տարել խորհրդարանական ընտրություններում, Վրաստանի վարչապետ Իրակլի Կոբախիձեն հայտարարեց՝ Վրաստանի կառավարությունն ունի արտաքին քաղաքականության կարևոր առաջնահերթություններ, և, բնականաբար, նշեց՝ գլխավորը Վրաստանի եվրաինտեգրումն է, որի համար էլ կառավարությունը հնարավորը կանի։

 «Այս քայլով «Վրացաական երազանքը» ցույց տվեց, որ նպատակ ունի շարունակել Վրաստան-ԵՄ կապերի ամրապնդումը։ Առհասարակ, եթե վերլուծենք, ապա կտեսնենք, որ վրաց հասարակությունը ռուսամետ չէ» ,- ընդգծեց նա։ 

 Ինչ վերաբերվում է ընտրությունների օրը տեղի ունեցած բախումներին՝ Բադայանը դրանց «սադրանք» որակումը տվեց։ Վրաց ժողովուրդը, քաղաքագետի խոսքով, տաքարյուն է, նրանք շուտ են բռնկվում։ Այստեղ, ավելի շատ, մշակույթի և աշխարհայացքի հարցն է։  

 «Նկատենք, որ Վրաստանի ընտրությունները տեղի են ունեցել այնպես, ինչպես տարիներ առաջ մեր երկրում, սակայն մի փոքր ավելի «մաքուր» տարբերակով։ Լցոնումներ եղան, այո, մենք տեսանք, որ Մառնեուլի շրջանում մի տղամարդ խրձով լցոնումներ կատարեց։ Այս ընտրատեղամասի ընտրությունների արդյունքներն անվավեր ճանաչվեցին։ Պետք է նկատենք, որ շատ դեպքերում նաև ընդդիմությունն է լցոնումներ արել» ,- ասաց նա ու հավելեց՝ այս ամենը դեռ չի վկայում նրա մասին, որ ընտրությունները հարթ ու ազնիվ են անցել։ 

Անդրադառնալով Վրաստանի նախագահ Սալոմե Զուրաբիշվիլիի այն հայտարարությանը, թե այդ երկրում տեղի են ունեցել «ռուսական ընտրություններ», նոր տեխնոլոգիաներ են օգտագործվել կեղծիքների համար ու այն, որ ինքը չի ճանաչում այդ ընտրությունների արդյունքները, Բադալյանը նկատեց՝ Զուրաբիշվիլին ընդգծված արևմտամետ կողմնորոշում ունի։ 

«Ինքը գաղափարական տեսանկյունից ամբողջովին պրոսաակաշվիլական տեսակետ ունի, որը մտածում է՝ այն հրահանգները, որ գալիս են Արևմուտքից, պարտադիր պիտի կատարվեն։ Բացի այդ՝ ինքը լավ հասկանում է, որ այս ընտրությունների արդյունքներով ինքը՝ որպես նախագահ, դադարում է գոյություն ունենալ» ,- ասաց Բադալյանը։ Նշենք, որ գրեթե երկու ամսից Վրաստանը նոր նախագահ կընտրի, սակայն այս ամենի համատեքստում Բադալյանը վստահ է, որ Զուրաբիշվիլին չի կարող վերընտրվել։ 

«Անկախ այն հանգամանքից, թե ընդդիմությունը կվերցնի մանդատները, թե ոչ, միևնույն է, խորհրդարանը շարունակելու է իր աշխատանքը։ Սրանից խորհրդարանի լեգիտիմությունը չի տուժելու։ Այս խոսույթը շատ տարածված է նաև Հայաստանում» ,- ասաց նա։ 

«Այստեղ մի շատ կարևոր կետ կա․ ԵԱՀԿ դիտորդական առաքելությունը շաբաթ օրը կայացած ընտրությունները ճանաչել է կայացած․ սա նշանակում է, որ Եվրոպան համակերպվել է ստեղծված իրավիճակին» ,- ընդգծեց Բադալյանը։

Վրաստանի ԱԺ ընտրություններից հետո, ՀՀ վարչապետ Նիկոլ Փաշինյանը շնորհավորական ուղերձ է հղել Վրաստանի վարչապետին։ Ավելին, Փաշինյանն իր ուղերձում հետաքրքիր ձևակերպում է տվել, գրելով․

«Ջերմորեն շնորհավորում եմ Վրաստանի խորհրդարանական ընտրություններում «Վրացական երազանք» կուսակցության «տպավորիչ» հաղթանակի կապակցությամբ» ,- շնորհավորական իր ուղերձում գրել է Փաշինյանը։ Ի՞նչն էր տպավորիչ Նիկոլ Փաշինյանի համար։ 

«Տպավորիչն այն էր, որ 150 մանդատից 89 տեղը վերցրել են։ Այստեղ հատուկ բառ գտնել․․․ուղղակի Հայաստանի իշխանությունները փորձել են «դուր գալ» վրացիներին։ Նրանք բոլորին էլ փորձում են «դուր գալ» » ,- եզրափակեց նա։ 

ՍԻԼՎԻ ՄՈՒՐԱԴՅԱՆ