Volkswagen-ը Գերմանիայում 3 գործարան կփակի, կկրճատի աշխատողներին մյուս ձեռնարկություններում

Գերմանական ավտոարտադրող Volkswagen ընկերությունը որոշել է փակել առնվազն երեք գործարան և կրճատել տասնյակ հազարավոր աշխատատեղեր մնացած բոլոր գործարաններում:

«Գերմանական խոշորագույն արդյունաբերական խումբը պատրաստվում է սկսել ակտիվների վաճառքն իր հայրենի երկրում,- ասել է Գլխավոր աշխատանքային խորհրդի նախագահ Դանիելա Կավալոն,- Գերմանական VW-ի բոլոր գործարաններն են տուժում դրանից։ Նրանցից ոչ մեկը լիովին ապահովված չէ»:

Ավելի վաղ Volkswagen-ը հրապարակել էր շահույթի նվազման մասին երկրորդ նախազգուշացումը երեք ամսից պակաս ժամանակահատվածում: Չինական և եվրոպական շուկաներում թույլ պահանջարկը, ինչպես նաև էլեկտրական մեքենաների արտադրությանն անհաջող անցումը հարվածել են արտադրողի եկամուտներին:

Ընկերության 87-ամյա պատմության ընթացքում սա կլինի առաջին դեպքը, երբ Volkswagen-ի գործարանները փակվում են հայրենի երկրում: Ներկայումս VW-ն Գերմանիայում ունի 10 գործարան և մոտ 300,000 աշխատակից։

Ավելի վաղ հաղորդվում էր, որ Volkswagen-ը դիտարկում է ծախսերի կրճատման մի շարք միջոցառումներ իր առաջատար ապրանքանիշի համար, ներառյալ աշխատավարձի 10%-ով կրճատում և աշխատավարձերի երկու տարով սառեցում, քանի որ ձգտում է 4 միլիարդ եվրո խնայել: