32 աշխատակից է ազատվել, էն հրահրող ընդդիմադիրները հասկանո՞ւմ են, որ մարդիկ խնդրի առաջ կանգնեցին. Ավինյան

«Երևանի ավտոբուս» ՓԲԸ-ի 32 աշխատակից ազատվել է աշխատանքից:

Այս մասին Հանրային ՀԸ եթերում ասաց Երևանի քաղաքապետ Տիգրան Ավինյանը՝ նշելով, որ այդ մասին ցավով է խոսում, քանի որ խոսքը 32 ընտանիքի մասին է:

«Օրինակ, էն ընդդիմադիրները, որոնք որ հրահրում էին, ուղղորդում էին էս գործընթացը, ոգևորվել էին, նոր շարժում էին ուզում սկսել էս պրոցեսի վրա, հասկանո՞ւմ են, որ էս մարդիկ նման խնդրի առաջ կանգնեցին»,- ասաց Ավինյանը:

Ըստ քաղաքապետի, որոշ դեպքերում անհրաժեշտ կոշտությունն այլընտրանք չունի և Երևանի քաղաքապետարանի համար սև գումարի շրջանառությունն ու նման բարքերի շարունակությունն անընդունելի է, հատկապես այն պարագայում, երբ նրանց առաջարկվում է բավական մրցունակ աշխատավարձ:

Արդյո՞ք հնարավոր է միանգամից 30 վարորդ գտնել ու փոխարինել՝ հարցին, Ավինյանն ասաց՝ ՀՀ-ում D կարգի վարորդական իրավունք ունեցող 50 հազար վարորդ կա և հնարավորությունները լայն են:

Հիշեցնենք՝ «Երևանի ավտոբուս» ՓԲԸ-ում վաղ առավոտից որոշ վարորդներ գործադուլ էին հայտարարել: Վերջիններս դժգոհություն էին հայտնել աշխատանքային պայմաններից և աշխատավարձերից: Ակցիայի վայր էին ժամանել ավագանու ընդդիմադիր անդամներ, պատգամավորներ, ակտիվիստներ և Երևանում նոր ընտրություններ անցկացնելու հայտարարություններ արել:

Երևանի քաղաքապետարանը նրանց այս գործողությունները որակել է շանտաժ և ներկայացրել, թե որքան աշխատավարձ են ստանում ավտոբուսների վարորդները:

Ըստ այդմ՝

«ՄԱՆ» - 401,500 ՀՀ դրամ,

«Ժոնգ Տոնգ» - 309 500 ՀՀ դրամ,

«Գազել Սիթի» - 219,500 ՀՀ դրամ:

Երևանի քաղաքապետ Տիգրան Ավինյանը ավելի վաղ անդրադարձել է հասարակական տրանսպորտի վարորդների գործադուլին՝ շեշտելով, որ կազմակերպիչները ենթարկվելու են խիստ պատասխանատվության, որևէ տեսակի շանտաժի չեն տրվելու, կոմպրոմիսի չեն գնալու։