Հեռախոսս 10 օրից ավելի գտնվել է քննիչի մոտ, պարզվում է՝ այն բացել են, շատ նյութեր հայտնվել են վարչապետի մոտ․ Աղազարյան

Պատգամավոր Հովիկ Աղազարյանն անդրադարձել է իրեն հասցեագրված մեղադրանքներին այն մասին, որ ինքը կազմակերպել է պետական, ազգային անվտանգությանը վերաբերող տեղեկությունների արտահոսք։

«Եթե խոսքը վերաբերում է խմբակցության նիստերից արտահոսքին, որտեղ մասնակցում են, առավել ևս վարչապետի ներկայությամբ 60-70 պատգամավոր, նաև կառավարության անդամներ, ասեմ՝  ես միշտ հասանելի եմ, լրագրողները գիշերն էլ զանգեն, ես պատասխանել եմ։ Հիմա այդ զրուցելու ընթացքում, թե հարցազրույցի ֆորմատով, թե ընդհանրապես, կարող է պատահի, որ ես մի բան եմ ասել, որ չէր կարելի ասել:

Ես չեմ հիշում կոնկրետ այդպիսի դեպք, որ նպատակամղված, պլանավորված, այսօր սա եմ ասել արտահոսք, հետո այն եմ ասել արտահոսք»,– լրագրողների հետ զրույցում ասել է նա։

Աղազարյանը նաև զարմանք է հայտնել, թե ինչպես են իր անձնական դաշտին վերաբերող նյութերը հայտնվել վարչապետի մոտ։

«Երբ որ պարոն Քյարամյանի հետ կապված միջադեպի շրջանակներում իմ փաստաբանը, իմ ուսանողական ընկերը հայց է ներկայացրել դատախազություն, որպեսզի քրեական վարույթ հարուցվի, պարզաբանումներ մտցվի, և այս շրջանակներում տեղի է եղել հարցաքննություն իմ հետ, իմ հեռախոսն  առգրավել են։ Ես չեմ դիմադրել, ասել եմ՝ վերցրեք:

Հեռախոսս 10 օրից ավելի գտնվել է այդ քննիչի մոտ, և քննիչն ասել է՝ իրենց հետաքրքրում է միայն ու միայն այն հեռախոսազանգերը, որոնք կապ ունեն պարոն Քյարամյանի հետ այդ գործով:

Ես ասեցի՝ խնդիր չունեմ, բայց ես այնտեղ լիքը այնպիսի բաներ ունեմ, որ չեմ ուզի, որ կարդաք: Բայց նաև ասացի՝  հանկարծ այնպես չլինի, որ դրանք հրապարակվեն: Ինձ ասաց՝ պարոն Աղազարյան, այս ինչե՞ր եք ասում, դուք գիտե՞ք  որ պետության մեջ եք: Ես հպարտ կեցվածք ընդունեցի՝ համոզված լինելով, որ չի լինի: Բայց պարզվում է, որ իմ հեռախոսը բացել են, իմ հեռախոսի մեջից շատ նյութեր հայտնվել են վարչապետի մոտ: Ո՞վ է այդ նյութերը տվել վարչապետին, ի՞նչ նպատակով է տվել, ես չեմ կարող ասել: Ես նաև չգիտեմ, թե որքանով է դա օրենքի շրջանակներում»:

Հարցին՝ Նիկոլ Փաշինյանի հրահանգո՞վ են այդպիսի բան արել, Աղազարյանն ասաց. «Ես չէի ուզի հավատալ դրան»: