Ով է 21-րդ դարի մեծագույն փոփ աստղն՝ ըստ Billboard–ի

Հեղինակավոր Billboard հրատարակությունը երգչուհի Բեյոնսե Նոուլզին ճանաչել է 21-րդ դարի մեծագույն փոփ աստղ։ Պորտալում հրապարակվել է վերջին 25 տարիների լավագույն կատարողների վարկանիշային աղյուսակը։

Բեյոնսեին գլխավոր աստղի կարգավիճակ շնորհելու խմբագիրների որոշումը քննադատվել է սոցիալական ցանցերում և փորձագետների շրջանում։ Դա պայմանավորված է այն սկանդալներով, որոնցում արտիստուհին ներքաշվել է վերջին տարիներին, այդ թվում՝ նրա ընկերությունը սկանդալային ռեփեր P.Diddy-ի հետ, ով այժմ դատվում է սեռական ոտնձգությունների և մարդկանց թրաֆիքինգի համար։

Բացի այդ, Billboard-ի ցուցակի երկրորդ տեղում գտնվող Թեյլոր Սվիֆթի երկրպագուները հարձակվել են խմբագիրների վրա, քանի որ, ըստ նրանց, Սվիֆթը պետք է համարվի մոլորակի գլխավոր փոփ աստղը։ Խմբագիրները նույնիսկ ստիպված են եղել հիմնավորել, թե ինչու Սվիֆթն առաջին տեղում չէ։

«Չնայած Թեյլոր Սվիֆթը հարյուրամյակի ամենահայտնի փոփ աստղն է՝ ալբոմների վաճառքից մինչև սթրիմներ և հյուրախաղեր, խմբագիրներն ընտրել են Բեյոնսեին՝ վերջին 25 տարիների ընթացքում նրա ազդեցության և էվոլյուցիայի պատճառով», - ասվում է հրատարակության մեջ:

21–րդ դարի գլխավոր փոփ կուռքերի ցանկում են հայտնվել նաև Ռիհաննան, Լեդի Գագան, Դրեյքը, Բրիթնի Սփիրսը, Քանյե Ուեսթը, Ադելը և այլ կատարողներ։