Ռուսաստանը և Բելառուսն անվտանգության երաշխիքների մասին համաձայնագիր են ստորագրել (տեսանյութ)

Ռուսաստանի և Բելառուսի նախագահներ Վլադիմիր Պուտինն ու Ալեքսանդր Լուկաշենկոն ուրբաթ օրը Մինսկում ստորագրել են Անվտանգության երաշխիքների մասին համաձայնագիր, որը նախատեսում է միջուկային զենքի հնարավոր օգտագործում՝ «ի պատասխան ագրեսիայի», հաղորդում է «Ինտերֆաքսը»:

Հաղորդվում է, որ փաստաթուղթը սահմանում է «փոխադարձ պարտավորություններ Ռուսաստանի և Բելառուսի պաշտպանության, ինքնիշխանության, անկախության և սահմանադրական կարգի պաշտպանության, Միութենական պետության տարածքի և արտաքին սահմանի ամբողջականության ու անձեռնմխելիության ապահովման համար»:

Պուտինն ընդգծել է, որ նոր համաձայնագիրը նախատեսում է անվտանգության ապահովման համար բոլոր միջոցների կիրառման հնարավորություն, այդ թվում՝ Բելառուսում տեղակայված ռուսական մարտավարական միջուկային զենքի՝ ի պատասխան ագրեսիայի։

Մինսկում կայացած հանդիպման ժամանակ Լուկաշենկոն Պուտինին նաև խնդրել է Բելառուսում տեղակայել «Օրեշնիկ» համակարգերը։

ՌԴ նախագահն, ի պատասխան, ասել է, որ դա կարող է արվել 2025 թվականի երկրորդ կեսին։