Կառավարությունը սահմանել է բյուջետային ծրագրերի գնահատման կարգը

Կառավարությունն առաջիկայում նախատեսում է ընդունել որոշում, որը սահմանում է բյուջետային ծրագրերի գնահատման կարգը։  Որոշման նախագիծը հրապարակվել է e-draft իրավական ակտերի հարթակում։

Նախաձեռնությունը նպատակ ունի ապահովել բյուջետային համակարգի ծրագրերի ազդեցության և արդյունավետության պարբերական գնահատումը, ինչը կնպաստի պետական ֆինանսների կառավարման որակի բարձրացմանը։

Նախագծով նախատեսվում է բյուջետային ծրագրերի գնահատման գործընթացի կանոնակարգում՝ համապատասխան ՀՀ կառավարության 2019-2023 թվականների պետական ֆինանսների կառավարման բարեփոխումների ռազմավարությանը։ Դրա հիմքում ընկած է ՀՀ կառավարության 2021-2026 թվականների գործունեության ծրագրում ընդգրկված բյուջետային ծրագրերի գնահատման գործընթացի ներդրման միջոցառումը։

Թեև բյուջետային համակարգում ծրագրային բյուջետավորման սկզբունքները ներդրվել են դեռևս 2015 թվականին, սակայն բյուջետային ծրագրերի կանոնավոր գնահատման կառուցակարգեր մինչ այժմ չեն սահմանվել։ Սա սահմանափակում է ծրագրերի արդյունավետության և արդյունքների վերլուծման հնարավորությունը։

Նոր կարգի հաստատմամբ նախատեսվում է ստեղծել գնահատման գործընթացի համար լիազորությունների հստակ շրջանակ և ՀՀ ֆինանսների նախարարության կազմում հատուկ ստորաբաժանում, որը կզբաղվի ծրագրերի գնահատմամբ։

Որոշման նախագծի հաստատման դեպքում ակնկալվում է, որ գնահատման պարբերական գործընթացը թույլ կտա վերահսկել ծրագրերի ազդեցությունը, վերանայել դրանց նպատակահարմարությունը և իրականացնել անհրաժեշտ բարեփոխումներ, կառավարությունը կունենա ծրագրերի ազդեցության վերաբերյալ ամբողջական տեղեկատվություն՝ հիմնված գնահատման հստակ չափորոշիչների վրա, բյուջետային միջոցների արդյունավետ օգտագործումը կլինի վերահսկելի և հաշվետու հանրությանը։

Նախագիծը բխում է ՀՀ կառավարության՝ պետական ֆինանսների կառավարման բարեփոխումների ռազմավարությունից և բյուջետային ծրագրերի գնահատման գործընթացի ներդրման պահանջներից։