Կրասնոդարում 8-րդ դասարանցին դանակով հարձակվել է աշակերտների վրա. կան տուժածներ

ՌԴ Կրասնոդարի հյուսիսում № 94 միջնակարգ դպրոցի ութերորդ դասարանի աշակերտը դանակով հարձակվել է համադասարանցիների վրա, rbc.ru–ի փոխանցմամբ՝ հայտնում են տելեգրամյան ալիքները։

«Baza»-ն գրում է, որ հարձակվողն արդեն բերման է ենթարկվել, նա 14-ամյա Արտեմ Ս.-ն է։ Միևնույն ժամանակ, «Mash»-ը հայտնում է, որ տղայի անունը Սինգուր է։

Նախնական տվյալներով՝ դանակահարությունը սկսվել է երկու աշակերտների վիճաբանությունից հետո։ «Baza»-ի հետ զրուցած դպրոցականները պատմել են, որ տղաներից մեկը բարձր ձայնով երաժշտություն է լսելիս եղել, ինչը դուր չի եկել մյուս աշակերտին։

Կրասնոդարի ադմինիստրացիան հաստատել է դպրոցում տեղի ունեցած միջադեպը։ «Ռոսիյսկոյե գյուղի № 94-Ֆ դպրոցում կոնֆլիկտ է տեղի ունեցել դպրոցականների միջև։ Արդյունքում վիրավորվել են երեք աշակերտներ, նրանք արդեն գտնվում են բժիշկների հսկողության տակ։ Տեղում աշխատում են իրավապահ մարմինները և պարզում կատարվածը»,- ասված է հաղորդագրությունում։

Ըստ «Mash»-ի՝ վիրավորվել է հինգ երեխա։ Նրանք շտապ հոսպիտալացվել են։