Թուրքիան չի մասնակցել Սիրիայի իրադարձություններին․ Ֆիդան

Թուրքիան չի մասնակցել Սիրիայում զինված ընդդիմության գործողությանը, որը հանգեցրել է Բաշար ալ-Ասադի վարչակազմի տապալմանը։ Այս մասին հայտարարել է Թուրքիայի արտաքին գործերի նախարարության ղեկավար Հաքան Ֆիդանը, գրում է Economim-ը։

«Թուրքիան նման գործընթացի մաս չի կազմել։ «Հայաթ Թահրիր ալ-Շամ» և այլ ընդդիմադիր խմբավորումների գործողությունների մեկնարկից հետո մենք ինտենսիվ ջանքեր ենք գործադրել, որպեսզի այն իրականացվի ամենաանարյուն, անխոչընդոտ ճանապարհով, բայց մինչ այդ՝ մենք ոչ մի երկրի կամ խմբի հետ չենք միավորվել, նման համակարգմանը չենք մասնակցել»,- ասել է Ֆիդանը։

Նա նաև ասել է, որ չի հանդիպել Սիրիայի նախկին նախագահի հետ՝ Անկարայի և Դամասկոսի միջև հարաբերությունների կարգավորման հարցը քննարկելու համար, թեև նման փորձեր բազմիցս արվել են երրորդ երկրների միջնորդությամբ։

«Իսրայելը երբեք չի ցանկացել, որ Ասադը հեռանա: Նա, ընդհանուր առմամբ, օգտակար խաղացող էր նրանց համար», - ասել է Ֆիդանը: