Ոստիկանությունը խնայում է ՔՊ-ական պաշտոնյային․ չի հանրայնացնում Արագածոտնի մարզպետի օգնականի անունը

Ոստիկանությունը հաստատեց Euromedia24-ի տեղեկությունը, որ այսօր Աշտարակի ճանապարհին թմրանյութի կասկածանքով բերման ենթարկված, ապա ձերբակալված անձ կա, սակայն ոչ մի կերպ չի նշվել վերջինիս անուն, ազգանունը, ինչից ակնհայտ է դառնում, որ կա հատուկ վերաբերմունք գործող ՔՊ-ական պաշտոնյայի նկատմամբ։ 

Ոստիկանությունից մեր հարցադրմանն ի պատասխան մասնավորապես հայտնել են․ «Համայնքային ոստիկանության Աշտարակի բաժնի ծառայողները՝ իրացնելով ստացված օպերատիվ տեղեկությունը, դեկտեմբերի 16-ին Ագարակ-Աշտարակ ճանապարհահատվածից ապօրինի թմրամիջոց պահելու հիմնավոր կասկածով ձերբակալել, բաժին են տեղափոխել մի տղամարդու, ում անձնական խուզարկությամբ հայտնաբերվել է մոտ 11,5 գրամ դեղնականաչավուն զանգված։ Կազմվում են համապատասխան փաստաթղթեր նախաքննական մարմին ուղարկելու համար»,- փոխանցեցին ոստիկանության լրատվականից։

Նախադեպերը հաշվի առնելով՝ նկատենք, որ եթե մեքենայում թմրանյութ հայտնաբերված լիներ օրինակ Կապանի, Գորիսի կամ Մասիսի շրջանից որևէ պաշտոնյայի մոտ, ապա դժվար է կասկածել, որ ոստիկանությունը անխնա կտարածեր ձերբակալության տեսանյութը, կներկայացներ ու կհանրայնացներ անձին՝ առանց հաշվի առնելու անմեղության կանխավարկածը։ 

Քիչ առաջ գրել էինք, որ բերման է ենթարկվել է Արագածոտնի մարզպետի օգնական Ա․ Մարկոսյան, որի անունը ոստիկանությունը որևէ կերպ չի հանրայնացնում։ Նա այս պահին զբաղեցնում է Արագածոտնի մարզպետի օգնականի պաշտոնը և այդ մասին հստակ ինֆորմացիա կա մարզպետարանի կայքէջում։ 

Սոնա Հարությունյան