Վաշինգտոնին ուղղված մեղադրանքները «ցինիկ» են և «անիմաստ». Ադրբեջանում ԱՄՆ դեսպան

Ադրբեջանում ԱՄՆ դեսպան Մարկ Լիբբին հերքել է ադրբեջանցի պաշտոնյաների մեղադրանքները՝ Բաքվի նկատմամբ Վաշինգտոնի ոչ բարեկամական քաղաքականության վերաբերյալ։

Կիրակի օրը ելույթ ունենալով Ամերիկյան առևտրի պալատի (AmCham) նիստին, նա բարձր է գնահատել երկու երկրների միջև համագործակցությունը և նշել ապագայի մեծ ներուժը։

«Ադրբեջանն ունի շահավետ աշխարհագրական դիրք՝ դառնալու տարածաշրջանային տրանսպորտային և նյութատեխնիկական ապահովման անփոխարինելի կենտրոն»,– նշել է նա։

Լիբբին հայտարարել է, որ չնայած ամերիկա-ադրբեջանական համագործակցության հաջողություններին, Բաքվում հնչում են նաև Վաշինգտոնի հասցեին քննադատության ձայներ։ Նա հերքել է Ադրբեջանի նկատմամբ ԱՄՆ–ի ոչ բարեկամական վերաբերմունքի մասին մեղադրանքները՝ դրանք անվանելով՝ «ցինիկ» և «անիմաստ»։

«Այս տարի մենք նշեցինք «Դարի պայմանագրի» 30-ամյակը։ Այս կարևոր իրադարձությունը մեզ հիշեցրեց, թե ինչպես է Ադրբեջանի ղեկավարության նախաձեռնությունը ԱՄՆ-ի ներդրումների և քաղաքական աջակցության հետ միասին փոխել պատմության ընթացքը։ Այդ ժամանակ ստեղծված համաձայնագրերն ու ենթակառուցվածքը Ադրբեջանին դարձրին համաշխարհային էներգետիկ անվտանգության առանցքային և հուսալի ներդրող։ Չափազանցություն չի լինի ասել, որ առանց ամերիկա-ադրբեջանական գործընկերության, որը դրված է «Դարի պայմանագրի» հիմքում, այս ամենն անհնար կլիներ»,- նշել է դեսպանը։