Ենթադրում եմ՝ դատախազը կգա ԱԺ ու Աղազարյանին անձեռնմխելիությունից զրկելու համար կդիմի հայտնի գործով. ՔՊ–ական պատգամավոր

Ենթադրում եմ՝ դատախազը կգա ԱԺ ու Հովիկ Աղազարյանին անձեռնմխելիություից զրկելու համար կդիմի հայտնի գործի շրջանակում, որը վերաբերում էր մանր եղջերավոր անասունների կոռուպցիոն կամ չգիտեմ՝ ինչ գործին, որը կար մինչ վարչապետի՝ Աղազարյանին մանդատից հրաժարվելու մասին խնդրանքը: Այդ գործը ամիսների վաղեմություն ունի։

Այս մասին լրատվամիջոցներին ասել է ԱԺ «Քաղաքացիական պայմանագիր» խմբակության պատգամավոր Հասմիկ Հակոբյանը՝ անդրադառնալով հրապարակումներին, որ, հավանաբար, հունվարին դատախազը կմտնի ԱԺ, կդիմի Աղազարյանին անձեռնմխելիությունից զրկելու հարցով, դրանից հետո վերջինիս կկալանավորեն կամ տնային կալանքի կենթարկեն:

Հարցին, թե որքանո՞վ է ժողովրդավարության մեջ տեղավորվում այն, որ մարդու՝ որոշ հարցերի վերաբերյալ անհամաձայնությունը, կարող է դառնալ նրան խմբակցությունից հեռացնելու առիթ՝ պատգամավորը պատասխանեց.«Պարոն Ասլանյանի հետ մենք մեկ խմբակցության  մեջ ենք եղել, նրա կարծիքը մենք կարող էինք լսել խմբակցության նիստի ժամանակ, որը չենք լսել։ Այդ մասին տեղեկացել ենք հրապարակային ելույթից և նա հայտարարել է, որ համագործակցությունը սառեցնում է խմբակցության հետ։ Չկա նման դեպք, երբ կարելի է սառեցնել համագործակցությունը։

Պարոն Ասլանյանը  խմբակցության նիստին ոչ մի անհամաձայնություն չի հայտնել, ավելին՝ ապշած էր լսածից։ Հետո մենք մամուլից ենք տեղեկանում նրա  անհամաձայնության մասին։ Ես ձեզ  վստահեցնում եմ, որ  խմբակցությունում բոլորը կարող են անվերջ հերթագրվել, հարցեր ուղղել, կարծիքներ հայտնել։ Ինքս Աղազարյանի նամակագրությունը չեմ կարդացել, քանի որ ենթադրել եմ, որ ինձ տհաճ կլինի այդ ամենը կարդալը։ Բայց գործընկերներս, ովքեր կարդացել են, հնարավորություն եղել է նրանցից լսելու իմ մտոհոգությունների պատասխանները»։